“ʻIsimeli mo Hono Fāmilí,” Ngaahi Talanoa ʻo e Tohi ʻa Molomoná (2023)
ʻIsimeli mo Hono Fāmilí
Kau atu ʻi he fononga ki he fonua ʻo e talaʻofá
Ko e fāmili pē ʻo Līhai mo Selaiá naʻe nofo ʻi he feituʻu maomaonganoá. ʻI ha ʻaho ʻe taha, naʻe folofola ʻa e ʻEikí kia Līhai ke fekauʻi atu hono ngaahi foha ko Leimana, Lēmiuela, Samu, mo Nīfaí ke nau ō ki Selusalema. Naʻe fekau ke nau foki ʻo kole kia ʻIsimeli mo hono fāmilí ke nau omi ke nau kau fakataha. ʻE lava ke ohi fakataha ʻe honau ngaahi fāmilí ha fānau ʻi he fonua ʻo e talaʻofá.
Naʻe loto ʻa ʻIsimeli mo hono fāmilí ke nau muimui ki he ʻEikí. Naʻa nau tui naʻe finangalo ʻa e ʻEikí ke nau kau fakataha mo e fāmili ʻo Līhai mo Selaiá. Naʻa nau fili ke mavahe mei Selusalema ʻo fakataha mo Līhai ʻi he feituʻu maomaonganoá.
ʻI heʻenau fonongá, naʻe ʻi ai ha kakai ʻe niʻihi naʻe ʻikai ke nau toe loto ke talangofua. Naʻa nau loto ke foki ki ʻapi. Naʻe kole ange ʻe Nīfai ke nau tui ki he ʻEikí.
Naʻe talaange ʻe Nīfai ʻe lava ke fai ʻe he ʻEikí ha meʻa pē ʻo kapau te nau maʻu ʻa e tuí. Ka naʻe ʻita ʻa Leimana mo Lēmiuela. Naʻá na haʻi ʻa Nīfai peá na loto ke liʻaki ia ʻi he feituʻu maomaonganoá.
Naʻe lotua ʻe Nīfai ha tokoni. Naʻe kamata ke homo ʻa e maeá, pea tuʻu hake ʻa Nīfai. Ka naʻe kei loto pē ʻa Leimana mo Lēmiuela ke fakamamahiʻi ia. Naʻe maluʻi ʻe ha taha ʻo e ngaahi ʻofefine ʻo ʻIsimelí ʻa Nīfai. Naʻe taukapoʻi foki ia ʻe heʻene faʻeé mo ha taha ʻo hono ngaahi tuongaʻané. Naʻe fakafanongo ʻa Leimana mo Lēmiuela kiate kinautolu pea naʻe ʻikai ke na toe feinga ke fakamamahiʻi ʻa Nīfai.
Naʻe fakatomala ʻa Leimana mo Lēmiuela ʻi he meʻa kuó na faí. Naʻá na kole kia Nīfai ke fakamolemoleʻi kinaua. Naʻe fakamolemoleʻi ʻe Nīfai hono ongo taʻoketé. Naʻe lotu leva ʻa Leimana mo Lēmiuela ʻo kole ki he ʻEikí ke fakamolemoleʻi kinaua.
Ne hoko atu ʻenau fonongá ʻo aʻu ki he fale fehikitaki ʻo Līhai mo Selaiá. Naʻe faifai pea fakataha ʻa e ongo fāmilí. Naʻa nau fakafetaʻi ki he ʻEikí mo hū kiate Ia.