Sēkope 5–6

Ko e ʻUluʻakau ʻŌlivé

Ko e ʻOfa ʻa e ʻOtuá ki Hono kakaí

ʻīmisi ʻo ha ʻuluʻakau ʻōlive lolotonga ʻa e lea ʻa Sēkopé

Ko Sēkopé ko ha palōfita ia ʻa e ʻOtuá. Naʻá ne fie akoʻi ki he kau Nīfaí ʻa e lahi ʻo e ʻofa ʻa e ʻOtuá ki Hono kakaí. Naʻe fai ange ʻe Sēkope ha talanoa fekauʻaki mo ha ngoue ʻōlive. Naʻe ngāue fakataha ʻa e ʻEiki ʻo e ngoué mo ʻEne tamaioʻeikí ke tauhi ʻa e ngoué.

Sēkope 5:1–4, 7; 6:4–5

keli sāvolo ʻa e ʻEiki ʻo e ngoué ʻi he veʻe fuʻu ʻōlivé

Naʻe ʻi ai ha fuʻu ʻōlive makehe ʻa e ʻEikí naʻe tupu ai ha fua lelei. Naʻe pehē ʻe Sēkope naʻe tatau ʻa e fuʻu ʻakau ko ʻení mo e kakai ʻa e ʻOtuá, pe ko e fale ʻo ʻIsilelí. Naʻe tatau ʻa e fuá mo e ngāue ʻa e kakaí. Naʻe tokangaʻi lelei ʻe he ʻEikí ʻa e fuʻu ʻakaú ni. Naʻá Ne tauhi ia ke tupu ʻaki ʻene tanumaki hono ngaahi aká pea ʻauhani mo hono ngaahi vaʻá. Naʻá Ne foaki ange ʻa e meʻa naʻe fiemaʻu ke moʻui ʻaí.

Sēkope 5:1–3, 5; 6:1, 7

kamata ke mate ʻa e fuʻu ʻōlivé

Hili ha kiʻi taimi siʻi, naʻe kamata ke mate ʻEne fuʻu ʻakau makehé. Naʻe toe siʻi pē ʻa e ngaahi vaʻa naʻe moʻui leleí. Naʻe fakamamahi ʻeni ki he ʻEikí. Naʻá Ne fakaʻamu ʻe hokohoko atu ʻene fua leleí.

Sēkope 5:3, 6–8

tuʻusi pea toʻo ʻe he ʻEiki ʻo e ngoué ha vaʻa moʻui lelei

Ke fakahaofi ʻa e ngaahi vaʻa moʻui leleí, naʻe tuʻusi kinautolu ʻe he ʻEikí pea fakapipiki kinautolu ki ha ʻuluʻakau kehe. Naʻá Ne fetongi leva kinautolu ʻaki ha ngaahi vaʻa moʻui lelei mei he ngaahi fuʻu ʻakau kehé.

Sēkope 5:7–14

tokangaʻi ʻe he ʻEiki ʻo e ngoué mo e kau tamaioʻeikí ʻa e ʻulu ʻōlivé

Ne ʻosi atu ha taimi lahi. Naʻe faʻa haʻu ʻa e ʻEikí mo e tamaioʻeikí ki he ngoué. Naʻá na tokangaʻi ʻa e fuʻu ʻakau makehe ʻa e ʻEikí. Naʻá na tokangaʻi foki mo e ngaahi vaʻa makehe naʻe fakamovetevete ke tupu ʻi he ʻuluʻakaú ʻi he ngoué kotoa. Naʻe tupu lelei ʻa e konga lahi ʻo e fuaʻiʻakaú. Naʻe fiefia ʻa e ʻEikí mo ʻEne tamaioʻeikí ʻi he ngaahi fua leleí.

Sēkope 5:15–29, 31

talanoa ʻa e ʻEiki ʻo e ngoué mo e tamaioʻeikí fekauʻaki mo e ʻulu ʻōlivé

Hili ha kiʻi taimi, naʻe tupu ha fua lahi ange ʻi he ʻuluʻakaú takitaha. Ka naʻe kovi kotoa ʻa e fuá he taimi ní. Naʻe loto-mamahi ʻaupito ʻa e ʻEikí. Naʻe ʻikai ke Ne loto ke mole ʻEne ngoué pe ko hono fuá! Naʻá Ne ngāue mālohi ke tokoni ki Heʻene ʻuluʻakaú. Naʻá Ne fifili pe ko e hā mo ha toe meʻa te Ne lava ʻo fai. Naʻá Ne talanoa mo e tamaioʻeikí peá Ne fili ke toe feinga pē.

Sēkope 5:29–51

tuʻusi pea toʻo ʻe he tangata ngāué ʻa e vaʻa moʻui leleí

Naʻe folofola ʻa e ʻEikí ke tānaki ʻa e ngaahi vaʻa kuó Ne toʻo mei he fuʻu ʻakau makehé, ke fakahaofi ʻEne ngoué. Naʻá Ne folofola ke toe fakapipiki kinautolu ki he fuʻu ʻakau makehé.

Sēkope 5:51–60

fakapipiki ʻa e ngaahi vaʻa moʻui leleí ki ha ʻulu ʻōlive kehekehe

Ko e taimi fakaʻosi ʻeni ʻe ngāue ai ʻa e ʻEikí ʻi Heʻene ngoué. Naʻá Ne ui mo ha kau tamaioʻeiki kehe ke tokoni. Naʻe ngāue fakataha ʻa e tokotaha kotoa pē ke tānaki mo fakapipiki ʻa e ngaahi vaʻá.

Sēkope 5:61–72

ʻū vaʻa ʻōlive moʻui leleí mo ha fua

Naʻa nau tokangaʻi kotoa ʻa e ʻuluʻakaú. Naʻa nau toʻo ʻa e ngaahi vaʻa koví pea tauhi ʻa e ngaahi vaʻa leleí. Hili ha kiʻi taimi siʻi, naʻe toe tupu ha fua lelei ʻi he fuʻu ʻakau makehe ʻa e ʻEikí. Naʻe tupu foki ʻi he ngaahi fuʻu ʻakau kehé ha fua naʻe lelei tatau mo e fua ʻo e fuʻu ʻakau makehé. Naʻe fiefia ʻa e ʻEikí. Naʻe fakahaofi ʻene ʻuluʻakaú! Naʻa nau fakatupu kotoa ʻa e fua naʻá Ne loto ke tupu meiate kinautolú.

Sēkope 5:73–75

vakai ʻa e ʻEiki ʻo e ngoué mo e kau tamaioʻeikí ki ha fuʻu ʻōlive lahi moʻui lelei

Naʻe fakamālō ʻa e ʻEikí ki he kau tamaioʻeikí. Naʻá Ne fakahā ange naʻe tāpuekina kinautolu ʻi heʻenau ngāue mālohi mo tauhi ʻEne ngaahi fekaú. Naʻá Ne vahevahe ʻa e fuá mo kinautolu, pea naʻa nau fiefia ʻaupito ai. Naʻe fiefia ʻa e ʻEikí ʻi he fuá ʻi ha taimi fuoloa.

Sēkope 5:75–77

ʻoku hā ʻa e ʻīmisi ʻo Sīsū Kalaisí ʻo hangē ko e lea ʻa Sēkopé

Naʻe fakaʻosi ʻe Sēkope ʻa e talanoa ʻo e ʻakau ko e ʻōlivé. Naʻá ne akoʻi ʻa e kakaí ʻoku tokangaʻi kinautolu ʻe he ʻOtuá ʻo hangē pē ko hono tokangaʻi ʻe he ʻEiki ʻo e ngoué ʻEne ʻuluʻakaú. Naʻe kole ʻe Sēkope ki he tokotaha kotoa pē ke fakatomala pea ʻunu ke ofi ange ki he ʻOtuá. Naʻá ne akoʻi kinautolu ke nau ʻofa mo tauhi ki he ʻOtuá he ʻoku tokoniʻi maʻu pē kinautolu ʻe he ʻOtuá.

Sēkope 6:1–5, 7, 11