“Ko e Tui ʻa ha Kuini,” Ngaahi Talanoa ʻo e Tohi ʻa Molomoná (2023)
“Ko e Tui ʻa ha Kuini,” Ngaahi Talanoa ʻo e Tohi ʻa Molomoná
Ko e Tui ʻa ha Kuini
Ko hono maʻu ʻa e fiefiá ʻia Sīsū Kalaisi
Naʻe pule ha kuini Leimana mo hono husepānití, ko e Tuʻi ko Lamōnaí. Naʻe kole ʻe he tuʻí ki ha tangata Nīfai ko ʻĀmoni ke akoʻi ia fekauʻaki mo e ʻEikí. Naʻe tui ʻa e tuʻí ki he meʻa naʻe talaange ʻe ʻĀmoni kiate iá. Naʻe tūʻulutui ʻa e tuʻí ʻo lotu ʻo kole ki he ʻEikí ke fakamolemoleʻi ia. Lolotonga ʻene lotú, naʻe tō ʻa e tuʻí ki he kelekelé. Naʻe hangē kuó ne pekiá.
Naʻe ʻave ia ʻe he kau tamaioʻeiki ʻa e tuʻí ki he kuiní. Naʻa nau fakatoka ia ki hono tokaʻangá. Naʻá ne toka ai ʻo ʻikai toe ngaue ʻi ha ʻaho ʻe ua mo e pō ʻe ua.
Lolotonga ʻa e taimi ko iá, naʻe loto-mamahi ʻaupito ʻa e kuiní mo ʻene fānaú. Naʻa nau nofo mo e tuʻí ʻo tangi koeʻuhí ko ia. Naʻe pehē ʻe ha kakai ʻe niʻihi naʻe totonu ke telio ʻa e tuʻí. Ka naʻe fiemaʻu ʻe he kuiní ke ʻuluaki talanoa mo ʻĀmoni. Naʻá ne fanongo naʻá ne maʻu ʻa e mālohi ʻo e ʻOtuá. Naʻe kole ʻe he kau tamaioʻeiki ʻa e kuiní kia ʻĀmoni ke haʻu ki he kuiní.
Naʻe meʻa ange ʻa e kuiní kia ʻĀmoni naʻá ne fanongo ko ha palōfita ia ʻa e ʻOtuá. Naʻá ne kole kia ʻĀmoni ke ʻalu ʻo vakai ki he tuʻí. Naʻe ʻiloʻi ʻe ʻĀmoni naʻe moʻui ʻa e tuʻí. Ko e mālohi ia ʻa e ʻOtuá naʻá ne ʻai ke mohe ʻa e tuʻí. Naʻe talaange ʻe ʻĀmoni ki he kuiní ʻe ʻā hake hono husepānití ʻi he ʻaho hono hokó.
Naʻe falala ʻa e kuiní kia ʻĀmoni peá ne tui lahi ki he ʻOtuá. Naʻá ne tui ʻe ʻā hake hono husepānití ʻi he ʻaho hono hokó. Naʻe talaange ʻe ʻĀmoni ʻoku tāpuakiʻi ia koeʻuhí ko ʻene tui lahí. Naʻá ne talaange ki he kuiní naʻe lahi ange ʻene tuí ʻi he tui ʻa e kakai [ʻo ʻĀmoní]. Naʻe nofo ofi holo pē ʻa e kuiní ʻo tauhi hono husepānití ʻi he poó kakato.
ʻI he ʻaho hono hokó, naʻe ʻā hake ʻa e tuʻí. Naʻá ne talaange ki he kuiní naʻá ne mamata kia Sīsū Kalaisi. Naʻe ʻiloʻi ʻe he kuiní mo e tuʻí ʻa e lahi ʻo e ʻofa ʻa Sīsū ʻiate kinauá, pea naʻá na fonu ʻi he fiefia.