1 Nīfai 4–5

Ko Nīfai mo e ʻŪ Lauʻi Peleti Palasá

Ko e ako ke muimui ʻi he Laumālié

Naʻe foki ʻa Leimana, Lēmiuela, Samu, mo Nīfai ki Selusalema ʻi he poʻulí. Naʻe ʻalu ʻa Nīfai ki he fale ʻo Lēpaní kae toitoi hono ngaahi taʻoketé ʻi he tuʻa koló.

1 Nīfai 4:4–5

Naʻe tuku ʻe Nīfai ke tataki ia ʻe he Laumālié. Naʻe ʻikai ke ne ʻiloʻi ʻa e meʻa naʻe totonu ke ne faí, ka naʻá ne ʻiloʻi ʻe tokoniʻi ia ʻe he ʻEikí ke maʻu ʻa e ʻū lauʻi peleti palasá.

1 Nīfai 4:6

ʻI he ofi ʻa Nīfai ki he fale ʻo Lēpaní, naʻá ne ʻilo ʻa Lēpani ʻoku tokoto he kelekelé. Naʻe mate konā ʻa Lēpani. Naʻe sio ʻa Nīfai ki he heletā ʻa Lēpaní peá ne toʻo hake ia.

1 Nīfai 4:7–9

ʻI he sio ʻa Nīfai ki he heletaá, naʻe fakahā ange ʻe he Laumālié ke ne tamateʻi ʻa Lēpani. Ka naʻe ʻikai fie tamateʻi ia ʻe Nīfai. Naʻe fakahā ʻe he Laumālié kia Nīfai ʻoku lelei ange ke mate ʻa Lēpani ʻi he ʻikai maʻu ʻe he fāmili ʻo Nīfaí ʻa e folofolá. Naʻa nau fiemaʻu ʻa e ngaahi fekau ʻa e ʻOtuá ʻa ia naʻe hiki ʻi he ʻū lauʻi peleti palasá.

1 Nīfai 4:10–11, 13–17

Naʻe ʻiloʻi ʻe Nīfai naʻe feinga ʻa Lēpani ke tamateʻi ia. Naʻe kaihaʻasi foki ʻe Lēpani ʻenau koloá pea ʻikai ke ne talangofua ki he ngaahi fekau ʻa e ʻOtuá.

1 Nīfai 4:11

Naʻe toe fakahā ʻe he Laumālié kia Nīfai ke tamateʻi ʻa Lēpani. Naʻe ʻiloʻi ʻe Nīfai kuo teuteu ʻe he ʻEikí ha hala maʻana ke maʻu ai ʻa e ʻū lauʻi peleti palasá. Naʻá ne fili ke talangofua ki he Laumālié. Naʻe tamateʻi ʻe Nīfai ʻa Lēpani peá ne tui ʻa e vala ʻo Lēpaní.

1 Nīfai 4:12–13, 17–19

Naʻe ʻalu leva ʻa Nīfai ki he tukuʻanga koloa ʻa Lēpaní ʻo fetaulaki mo e tamaioʻeiki ʻa Lēpani ko Sōlamí. Naʻe ngāue mo lea ʻa Nīfai ʻo hangē ko Lēpaní.

1 Nīfai 4:20–23, 35

Naʻe talaange ʻe Nīfai kia Sōlami naʻá ne fiemaʻu ʻa e ʻū lauʻi peleti palasá. Hili iá naʻe talaange ʻe Nīfai kia Sōlami ke muimui mai ʻiate ia. Naʻe fakakaukau ʻa Sōlami ko Lēpani ʻa Nīfai, ko ia naʻá ne fai ʻa e meʻa naʻe fiemaʻu ʻe Nīfaí.

1 Nīfai 4:24–26

ʻI he hū mai ʻa Nīfai mo Sōlami ki tuʻa mei he koló, naʻe fakakaukau ʻa Leimana, Lēmiuela, mo Samu ko Lēpani ʻa Nīfai. Naʻa nau ilifia pea kamata ke nau hola.

1 Nīfai 4:28

Naʻe ui ʻa Nīfai ki hono ngaahi tokouá. ʻI heʻenau ʻiloʻi ko Nīfaí, naʻe ʻikai ke nau toe lele. Ka naʻe kamata ke ilifia ʻa Sōlami peá ne feinga ke foki ki Selusalema.

1 Nīfai 4:29–30

Naʻe taʻofi ʻe Nīfai ʻa Sōlami. Naʻá ne talaange kia Sōlami kuo fekauʻi kinautolu ʻe he ʻEikí ke ʻomi ʻa e ʻū lauʻi peletí. Naʻá ne fakaafeʻi ʻa Sōlami ke nau ō ki he fonua ʻo e talaʻofá. Naʻe ʻiloʻi ʻe Sōlami te ne hoko ko ha tangata tauʻatāina, ʻo ʻikai ko ha sevāniti, peá ne palōmesi ke ʻalu mo Nīfai mo hono fāmilí.

1 Nīfai 4:31–37

Naʻa nau foki kia Līhai mo Selaia. Naʻe fiefia ʻaupito ʻa Līhai mo Selaia ke mamata ki hona ngaahi fohá. Naʻe fakakaukau ʻa Selaia kuo mate hono ngaahi fohá. Koeʻuhí naʻe maluʻi ʻe he ʻEikí hono ngaahi fohá, naʻá ne falala leva kuo fekauʻi honau fāmilí ke nau mavahe mei Selusalema. Naʻe fai ʻe he fāmili ʻo Līhai mo Selaiá ha ngaahi feilaulau ke fakamālō ki he ʻEikí.

1 Nīfai 4:38; 5:1–9

Naʻe lau ʻe Līhai ʻa e ʻū lauʻi peleti palasá. Naʻá ne mamata naʻe ʻi he ʻū lauʻi peletí ʻa e ngaahi akonaki ʻa e kau palōfitá. Naʻá ne ʻilo foki ko e taha ʻo ʻene ngaahi kuí ko Siosefa, ʻa ia naʻe fakatau ki ʻIsipite ʻe hono ngaahi tokouá ʻi he kuonga muʻá. Naʻe ʻiloʻi ʻe Līhai naʻe mahuʻinga ʻaupito ʻa e ʻū lauʻi peleti palasá. Naʻá ne ʻiloʻi naʻe finangalo ʻa e ʻEikí ke maʻu ʻe hono fāmilí ʻa e ngaahi fekaú.

1 Nīfai 5:10–22