“Teanikumi mo Molonai,” Ngaahi Talanoa ʻo e Tohi ʻa Molomoná (2023)
Teanikumi mo Molonai
Fakahaaʻi ha loto-toʻa lahi
Hili ʻa e pekia ʻa ʻAmalekaiá, naʻe fetongi ia ʻe hono tokoua ko ʻAmoloné ko e tuʻi Leimaná. Naʻe kei tauʻi pē ʻe ʻAmolone ʻa e kau Nīfaí. Naʻe lauitaʻu ʻa e taú. Naʻe kamata ke ikuna ʻa e kau Nīfaí, pea hola kotoa ai ʻa e kau tau Leimaná ki ha kolo ʻe taha. Naʻe laka atu ʻa Molonai, Teanikumi, mo ha ʻeikitau Nīfai ʻe taha ki he kau Leimaná mo ʻenau ngaahi kau taú.
ʻAlamā 52:3–4; 54:16–24; 62:12–35
Naʻe ʻita ʻa Teanikumi ʻi he fakatupu ʻe ʻAmalekaia mo ʻAmolone ʻa e fuʻu tau lahi mo lōloa ko ʻení. Koeʻuhí ko e taú, naʻe mate ai ha kakai tokolahi pea siʻisiʻi ʻaupito ʻa e meʻakaí. Naʻe loto ʻa Teanikumi ke fakangata ʻa e taú. Naʻe hū poʻuli ki he koló ke kumi ʻa ʻAmolone.
Naʻe kaka atu ʻa Teanikumi ʻi he ʻā ʻo e koló. Naʻe ʻalu mei he potu ki he potu ʻi he koló kae ʻoua kuó ne maʻu ʻa e feituʻu naʻe mohe ai ʻa ʻAmoloné.
Naʻe tolongi ʻe Teanikumi ʻa ʻAmolone ʻaki ha tao. Naʻe tuʻu ia ʻo ofi ki he mafú. Ka naʻe fafangu ʻe ʻAmolone ʻene kau tamaioʻeikí kimuʻa peá ne maté.
Naʻe tuli ʻe he kau tamaioʻeiki ʻa ʻAmoloné ʻa Teanikumi ʻo fakapoongi. Naʻe fuʻu loto-mamahi lahi ʻa e kau taki Nīfai kehé ʻi he pekia ʻa Teanikumí. Naʻá ne tau loto-toʻa koeʻuhí ko e tauʻatāina ʻa hono kakaí.
Neongo kuo pekia ʻa Teanikumi, ka naʻá ne tokoni ki he kau Nīfaí ke nau ikuna ʻa e taú. Kuó ne ʻai ʻa e kau Leimaná ke mole honau takí. ʻI he pongipongi hono hokó, naʻe tauʻi ai ʻe Molonai ʻa e kau Leimaná pea ikuna. Naʻe mavahe ʻa e kau Leimaná mei he fonua ʻo e kau Nīfaí, pea ʻosi leva ʻa e taú.
Ne fāifai pea melino. Naʻe ngāue mālohi ʻa Molonai ke maluʻi ʻa e fonua ʻo e kau Nīfaí mei he kau Leimaná. Pea toki foki leva ʻa Molonai ki ʻapi ke nofo ʻi he melino. Naʻe akoʻi ʻe he kau palōfitá ʻa e ongoongoleleí mo tataki ʻa e Siasi ʻo e ʻOtuá. Naʻe falala ʻa e kakaí ki he ʻEikí, pea naʻá Ne tāpuakiʻi kinautolu.