“ʻApinetai mo e Tuʻi ko Noá,” Ngaahi Talanoa ʻo e Tohi ʻa Molomoná (2023)
ʻApinetai mo e Tuʻi ko Noá
Ko ha Pōpoaki mei ha Palōfita
Naʻe puleʻi ʻe he Tuʻi ko Noá ʻa e kau Nīfai naʻe nofo ʻi he fonua ko Nīfaí. Naʻe ʻai ʻe Noa hono kakaí ke nau ʻoange ha paʻanga lahi kiate ia peá ne fakaʻaongaʻi ia ʻi ha ngaahi meʻa lelei maʻana. Naʻá ne ui ha kau taulaʻeiki naʻe hīkisia ke tokoni ki heʻene pulé. Naʻe ʻikai ke tauhi ʻe Noa ʻa e ngaahi fekau ʻa e ʻOtuá. Ka, naʻá ne fai ha ngaahi meʻa kovi lahi.
Naʻe taki foki ʻe Noa hono kakaí ke nau faiangahala mo kinautolu. Naʻe ʻikai ke nau muimui ki he ʻEikí.
Naʻe nofo ha palōfita ʻa e ʻOtuá ko ʻApinetai ʻi he fonuá. Naʻe fekauʻi mai ʻe he ʻEikí ʻa ʻApinetai ke ne tala kia Noa mo hono kakaí ke nau fakatomala.
Naʻe talaange ʻe ʻApinetai ki he kakaí ʻoku fiemaʻu ʻe he ʻEikí ke nau fakatomala. Kapau ʻe ʻikai ke nau fakatomala, ʻe tuku ʻe he ʻEikí ke haʻu honau ngaahi filí ki honau fonuá ʻo puleʻi kinautolu. ʻE ʻai ʻe honau ngaahi filí ke faingataʻa ʻaupito ʻa e moʻuí kia Noa mo hono kakaí.
Naʻe ʻita ʻa e kakaí ʻia ʻApinetai ʻi he meʻa naʻá ne lea ʻakí. Naʻa nau fie fakapoongi ia, ka naʻe maluʻi ʻe he ʻEikí ʻa ʻApinetai mo tokoniʻi ke hola ʻo hao.
Naʻe loto foki ʻa Noa ke ne tāmateʻi mo ʻApinetai. Naʻe ʻikai tui ʻa Noa ki he ʻEikí. Pea naʻe ʻikai ke fakatomala ia mo hono kakaí.
Hili ha taʻu ʻe ua mei ai, naʻe fekauʻi atu ʻe he ʻEikí ʻa ʻApinetai ke foki ʻo fakatokanga ki he kakaí. Naʻe fakahā ʻe ʻApinetai ki he kakaí ʻe puleʻi ʻe honau ngaahi filí ʻa e fonuá koeʻuhí he kuo ʻikai ke nau fakatomala. Naʻe ʻita ʻa e kakaí ʻia ʻApinetai. Naʻa nau pehē naʻe ʻikai ke nau fai ha meʻa hala pea he ʻikai ke nau fakatomala. Naʻa nau haʻi ʻa ʻApinetai pea ʻave ia kia Noa.
Naʻe maʻu ʻe Noa mo ʻene kau taulaʻeikí ha palani. Naʻe feinga ʻa e kau taulaʻeikí ke kākaaʻi ʻa ʻApinetai ʻaki ʻenau fai ange ha ngaahi fehuʻi lahi. Ka naʻe tali loto-toʻa ʻe ʻApinetai kinautolu. Naʻe ʻohovale ʻa e kau taulaʻeikí ʻi he ngaahi tali ʻa ʻApinetaí. Naʻe ʻikai ke nau lava ʻo kākaaʻi ia. Naʻe talaange ʻe ʻApinetai ki he kau taulaʻeikí naʻa nau tokanga lahi ange ki he paʻangá kae ʻikai fai ʻa e meʻa ʻoku totonú.
Naʻe talaange ʻe Noa ki heʻene kau taulaʻeikí ke fakapoongi ʻa ʻApinetai. Ka naʻe fakatokanga ange ʻa ʻApinetai ke ʻoua te nau ala kiate ia. Naʻe ulo hono fofongá ʻi he mālohi ʻo e ʻOtuá. Naʻe pehē ʻe ʻApinetai naʻe ʻikai akoʻi ʻe he kau taulaʻeikí ʻa e ngaahi fono ʻa e ʻOtuá. Naʻe akoʻi kinautolu ʻe ʻApinetai ʻe ʻaloʻi mai ʻa Sīsū Kalaisi, pekia maʻatautolu, pea toetuʻu. Naʻá ne pehē ʻe fakamolemoleʻi kinautolu ʻe Sīsū kapau te nau fakatomala.
Naʻe fakaʻosi ʻe ʻApinetai ʻa e pōpoaki naʻe fekauʻi ia ʻe he ʻEikí ke ne faí. Naʻe kei ʻita pē ʻa Noa. Naʻá ne talaange ki heʻene kau taulaʻeikí ke ʻave ʻa ʻApinetai pea fakapoongi.
Naʻe tui ha taulaʻeiki ʻe taha ko ʻAlamā, kia ʻApinetai. Naʻe feinga ʻa ʻAlamā ke fakahaofi ʻa ʻApinetai. Ka ko ʻeni kuo toe ʻita mo Noa ʻia ʻAlamā mo fakamālohiʻi ia ke ʻalu.
Naʻe talaange ʻe he kau taulaʻeikí kia ʻApinetai ko e meʻa naʻá ne akoʻí naʻe ʻikai moʻoni. Ka naʻe pehē ʻe ʻApinetai kuó ne akoʻi ʻa e moʻoní. Naʻe toe ʻita ʻa Noa mo ʻene kau taulaʻeikí. Naʻa nau fakapoongi ʻa ʻApinetai ʻaki ʻa e afi. Naʻe feinga foki mo e kau leʻo ʻa Noá ke fakapoongi ʻa ʻAlamā. Ka naʻe toitoi ʻa ʻAlamā mo ne hiki ʻa e ngaahi lea kotoa ʻa ʻApinetaí.