“Ngaahi Fakaʻilonga ʻo e ʻAloʻi ʻo Sīsuú,” Ngaahi Talanoa ʻo e Tohi ʻa Molomoná (2023)
Ngaahi Fakaʻilonga ʻo e ʻAloʻi ʻo Sīsuú
Tui ki he ngaahi akonaki ʻa ha palōfita
Kuo meimei taʻu ʻe nima talu mei hono akoʻi ʻe he palōfita ko Samuelá ʻa e ngaahi fakaʻilonga ʻo e ʻaloʻi ʻo Sīsū Kalaisí. Naʻe tui mo fakasio ʻe ha kakai tokolahi ʻa e ngaahi fakaʻilongá. Naʻe pehē ʻe ha kakai ʻe niʻihi naʻe hala ʻa Samuela pea kuo ʻosi ʻa e taimi ki he ngaahi fakaʻilongá. Naʻa nau fakakata ʻaki ʻa e kakai tuí mo pehē he ʻikai hāʻele mai ʻa Sīsū.
Hilamani 14:2–7; 3 Nīfai 1:4–6
Naʻe hohaʻa ʻa e kakai tuí, ka naʻa nau tui. Naʻa nau kei fakasio pē ʻa e ngaahi fakaʻilongá. Ko ha fakaʻilonga ʻe taha ko ha pō he ʻikai fakapoʻuli. ʻE maamangia pē ʻo hangē ko e ʻahó neongo kuo tō ʻa e laʻaá. ʻE hoko ʻa e pō he ʻikai fakapoʻulí ko ha fakaʻilonga ʻe ʻaloʻi ʻa Sīsū ʻi he ʻaho hono hokó ʻi ha fonua ʻe taha.
Hilamani 14:2–4; 3 Nīfai 1:7–8
Naʻe faʻu ʻe he kakai naʻe ʻikai tuí ha palani. Naʻa nau fili ha ʻaho pea nau pehē kapau he ʻikai hoko ʻa e fakaʻilongá ʻi he ʻaho ko iá, ʻe fakapoongi ʻa e kakai tuí.
Naʻe ʻi ai ha tangata naʻe ui ko Nīfai naʻe palōfita he taimi ko ʻení. Naʻe loto-mamahi ʻaupito ʻi he loto ʻa ha kakai ʻe niʻihi ke fakapoongi ʻa e kakai tuí.
Naʻe punou ʻa Nīfai ki he kelekelé ʻo hūfia ki he ʻOtuá ʻa e kakai tui naʻe ʻamanaki ke mate koeʻuhí ko ʻenau tuí. Naʻá ne lotu he ʻahó kakato.
Ko e tali ki heʻene lotú, naʻe ongoʻi ʻe Nīfai e leʻo ʻo Sīsuú. Naʻe pehē ʻe Sīsū ʻe hoko ʻa e fakaʻilongá ʻi he pō ko iá pea ʻe toki ʻaloʻi Ia ʻi he ʻaho hono hokó.
Ko e pō ko iá naʻe ʻikai ha fakapoʻuli neongo naʻe ʻosi tō ʻa e laʻaá. Naʻe fuʻu ʻohovale ʻa e kakai naʻe ʻikai ke nau tui ki he ngaahi lea ʻa Samuelá ʻo nau tō ki he kelekelé. Naʻa nau manavahē he naʻe ʻikai ke nau tui. Naʻe ʻikai fakapoongi ʻa e kakai naʻe tuí.
ʻI he ʻaho hono hokó, naʻe toe hopo hake ʻa e laʻaá kae kei maama pē ʻa e langí. Naʻe ʻiloʻi kotoa ʻe he kakaí ko e ʻaho ʻeni ʻe ʻaloʻi ai ʻa Sīsuú.
Naʻe mamata ʻa e kakaí ki ha fakaʻilonga ʻe taha. Ne ʻasi ha fetuʻu foʻou ʻi he langí. Naʻe hoko ʻa e ngaahi fakaʻilonga kotoa naʻe lea ki ai ʻa Samuelá. Naʻe tokolahi ange fau ʻa e kakai naʻa nau tui kia Sīsū pea naʻe papitaisó.