“Foki ki Selusalemá,” Ngaahi Talanoa ʻo e Tohi ʻa Molomoná (2023)
“Foki ki Selusalemá,” Ngaahi Talanoa ʻo e Tohi ʻa Molomoná
Foki ki Selusalemá
Fononga ki he ʻū lauʻi peleti palasá
Naʻe fononga ʻa e fāmili ʻo Līhai mo Selaiá ʻi he feituʻu maomaonganoá. Naʻe folofola ʻa e ʻEikí kia Līhai ʻi ha misi fekauʻaki mo e ngaahi folofola naʻe hiki ʻi he ʻū lauʻi peleti palasá. Naʻe ʻi ai ha tangata ko Lēpani naʻá ne maʻu ia ʻi Selusalema. Naʻe folofola ʻa e ʻEikí naʻe fiemaʻu ke ʻave ʻe he fāmili ʻo Līhaí ʻa e ʻū lauʻi peleti palasá ʻi heʻenau fonongá.
Naʻe folofola ʻa e ʻEikí kia Līhai ke fekauʻi hono ngaahi fohá ke nau foki ki Selusalema ke ʻomi ʻa e ʻū lauʻi peleti palasá. Naʻe hanu ʻa e ngaahi tokoua ʻo Nīfaí. Naʻa nau talaange kia Līhai ko ha meʻa faingataʻa ia ke fai. Naʻe ʻikai ke nau fie ʻalu.
Ko ha meʻa faingataʻa ʻaupito ia ke fai, ka naʻe loto ʻa Nīfai ke talangofua. Naʻá ne ʻiloʻi ʻe tokoniʻi ia mo hono ngaahi tokouá ʻe he ʻEikí. Naʻe talaange ʻe Nīfai kia Līhai te ne foki ki Selusalema ʻo ʻomi ʻa e ʻū lauʻi peleti palasá.
Naʻe foki ʻa Leimana, Lēmiuela, Samu mo Nīfai ki Selusalema. ʻI heʻenau aʻu ki aí, naʻa nau fili ke ʻalu ʻa Leimana ki he fale ʻo Lēpaní ʻo kole ʻa e ʻū lauʻi peleti palasá.
ʻI he kole ʻe Leimana ʻa e ʻū lauʻi peleti palasá, naʻe ui ia ʻe Lēpani ko ha kaihaʻa. Naʻe pehē ʻe Lēpani te ne tamateʻi ʻa Leimana.
Naʻe hola ʻa Leimana ʻo talaange ki hono ngaahi tokouá ʻa e meʻa naʻe hokó.
Naʻe loto-mamahi ʻa e kau tautehina ʻe toko faá. Naʻe loto ʻa Leimana, Lēmiuela, mo Samu ke nau foki ki heʻenau ongomātuʻá ʻi he feituʻu maomaonganoá, ka naʻe ʻi ai ha fakakaukau ʻa Nīfai. Naʻá ne pehē te nau lava ʻo fai ha fakafetongi koloa mo Lēpani ke maʻu mai ʻa e ʻū lauʻi peleti palasá. Naʻa nau foki ki honau ʻapí ʻi he koló ʻo ʻomi kotoa ʻenau koulá mo e silivá ke fakafetongi ʻaki.
ʻI heʻenau fakaʻaliʻali ʻa e koulá mo e silivá kia Lēpaní, naʻá ne fiemaʻu kotoa ia. Ka naʻe ʻikai pē ke ne ʻoange ʻa e ʻū lauʻi peleti palasá kiate kinautolu. Ka naʻá ne talaange ki heʻene kau tamaioʻeikí ke nau tamateʻi ʻa e kau tautehiná kae lava ke ne maʻu ʻenau koulá mo e silivá.
Naʻe lele ʻa e kau tautehina ʻe toko faá ke nau hao moʻui kae liʻaki ʻenau koulá mo e silivá. Naʻe ʻikai lava ʻe he kau tamaioʻeiki ʻa Lēpaní ʻo maʻu kinautolu. Naʻe toitoi ʻa e kau tautehiná ʻi ha ʻana.
Hili ʻa e ngaahi meʻa faingataʻa ko ʻení, naʻe ʻita ʻa Leimana mo Lēmiuela kia Nīfai. Naʻá na taaʻi ʻa Nīfai mo Samu ʻaki ha vaʻakau.
Naʻe fakafokifā pē kuo hā mai ha ʻāngelo ʻo fehuʻi ange pe ko e hā e ʻuhinga ʻokú na taaʻi ai ʻa Nīfaí. Naʻe pehē ʻe he ʻāngeló kuo fili ʻa Nīfai ke ne tataki kinautolu. Naʻe talaange leva ʻe he ʻāngeló ke nau foki ki Selusalema. ʻE teuteu ʻe he ʻEikí ha founga ke nau maʻu ai ʻa e ʻū lauʻi peleti palasá.