“ʻĀmoni,” Ngaahi Talanoa ʻo e Tohi ʻa Molomoná (2023)
ʻĀmoni
Ko ha tamaioʻeiki loto-fakatōkilalo
Naʻe fiemaʻu ʻe ʻĀmoni mo hono ngaahi tokouá ke akoʻi ʻa e kau Leimaná fekauʻaki mo e ʻEikí. Naʻa nau ō ki he fonua naʻe nofo ai ʻa e kau Leimaná. ʻI heʻenau fonongá, naʻa nau ʻaukai mo lotu ke kole tokoni ki he ʻEikí. Na‘e fakafiemālieʻi kinautolu ‘e he ʻEikí. Naʻá Ne folofola ange ke nau faʻa kātaki mo hoko ko ha faʻifaʻitakiʻanga lelei. Naʻa nau takitaha ō ki ha ngaahi feituʻu kehekehe ke faiako ai.
Naʻe ʻalu ʻa ʻĀmoni ki ha feituʻu naʻe ui ko ʻIsimeli. Naʻe haʻi ia ʻe he kakai ʻi aí pea ʻave ia ki he Tuʻi ko Lamōnaí. Naʻe talaange ʻe ʻĀmoni kia Lamōnai naʻe fie nofo mo e kau Leimaná. Naʻe saiʻia ʻa Lamōnai ʻia ʻĀmoni peá ne fakatauʻatāinaʻi ia. Naʻá ne fiemaʻu ke mali ʻa ʻĀmoni mo ha taha ʻo hono ngaahi ʻofefiné, ka naʻe fili ʻa ʻĀmoni ia ke hoko ko e tamaioʻeiki ʻa Lamōnai.
Naʻe talaange ʻe Lamōnai kia ʻĀmoni ke ne tokangaʻi ʻene fanga monumanú. ʻI ha ʻaho ʻe taha, naʻe ʻave ʻe ʻĀmoni mo ha niʻihi kehe ʻo e kau tamaioʻeikí ʻa e fanga monumanú ke nau inu. Lolotonga e inu ʻa e fanga monumanú, naʻe haʻu ha kau kaihaʻa ʻo fakailifiaʻi kinautolu ke nau hola. Naʻe manavahē ʻa e kau tamaioʻeiki kehé he ʻe tauteaʻi kinautolu ʻi he mole ʻa e fanga monumanu ʻa Lamōnaí.
Naʻe ʻiloʻi ʻe ʻĀmoni ko ha faingamālie ʻeni ke fakahaaʻi ai e mālohi ʻo e ʻEikí. Naʻá ne talaange ki he kau tamaioʻeiki kehé ke ʻoua te nau hohaʻa pea tokoni ange ke nau kumi ʻa e fanga monumanu naʻe molé.
Naʻe toe foki mai ʻa e kau kaihaʻá ke toe fakailifiaʻi ʻa e fanga monumanú. Ka ʻi he taimi ko ʻení, naʻe talaange ʻe ʻĀmoni ki he kau tamaioʻeiki kehé ke nau nofo ʻo tauhi ʻa e fanga monumanú ke ʻoua te nau hola.
Naʻe ʻalu ʻa ʻĀmoni ke taʻofi ʻa e kau kaihaʻá mei hono fakailifiaʻi ʻo e fanga sipí. Naʻe ʻikai ke ilifia ʻa e kau kaihaʻá ʻia ʻĀmoni. Naʻa nau fakakaukau ʻoku nau mālohi ange ʻiate ia. Ka naʻe ʻikai ke nau ʻilo naʻe tokoniʻi ʻe he ʻEikí ʻa ʻĀmoni.
Naʻe lisingi ʻe ʻĀmoni ha ngaahi maka ki he kau kaihaʻá ʻaki ʻene makataá. Naʻe mate hanau niʻihi. Naʻe ʻita heni ʻa e kau kaihaʻa kehé, pea nau loto ke fakapoongi ʻa ʻĀmoni. Naʻa nau ʻohovale koeʻuhí he naʻe ʻikai ke lava ʻo tau ʻia ʻĀmoni ʻenau ngaahi foʻi maká. Naʻe ʻikai ke nau ʻamanaki ʻe fuʻu mālohi pehē.
Naʻe feinga ʻa e kau kaihaʻá ke taaʻi ʻa ʻĀmoni ʻaki ʻenau ngaahi pōvaí. Ka ko e taimi kotoa pē naʻa nau feinga aí, naʻe tuʻusi ʻe ʻĀmoni honau ngaahi nimá ʻaki ʻene heletaá ke ʻoua te nau lava ʻo tau. ʻIkai fuoloa, kuo nau ilifia ke hoko atu ʻenau taú pea nau hola.
Naʻe fakamatala ʻe he kau tamaioʻeikí kia Lamōnai ʻa e founga naʻe fakahaofi ai ʻa e fanga monumanú. Naʻe ofo ʻa Lamōnai. Naʻe fakakaukau ia ko ʻĀmoní ko e Fuʻu Laumālie Lahi, ʻokú ne maʻu ha mālohi lahi mo ʻilo ʻa e meʻa kotoa pē.
Naʻe fie talanoa ʻa Lamōnai kia ʻĀmoni, ka naʻe hohaʻa mo ia foki.
Naʻe ʻalu ʻa ʻĀmoni ke fakataufolofola kia Lamōnai, ka naʻe ʻikai ke ʻilo ʻe Lamōnai pe ko e hā te ne lea ʻakí. Naʻe tokoniʻi ʻe he ʻEikí ʻa ʻĀmoni ke ne ʻiloʻi e ngaahi fakakaukau ʻa Lamōnaí. Naʻe pehē ʻe ʻĀmoni naʻe ʻikai ko e Laumālie Lahí ia. Naʻá ne talaange kia Lamōnai ko e Laumālie Lahí ko e ʻOtuá ia. Naʻá ne fie ʻilo lahi ange ki he ʻOtuá.
Naʻe pehē ʻe ʻĀmoni naʻe fakatupu ʻe he ʻOtuá ʻa māmani mo e taha kotoa ʻi aí. Naʻe talaange leva ʻe ʻĀmoni kia Lamōnai ʻoku ʻi ai ha palani ʻo e fakamoʻui ʻa e ʻOtuá. ʻE hāʻele mai ʻa Sīsū Kalaisi, ko ha konga ʻo e palani ko iá. Naʻe tui ʻa Lamōnai ki he meʻa naʻe lea ʻaki ʻe ʻĀmoní. Naʻe lotu leva ʻa Lamōnai ʻo kole ki he ʻOtuá ke ʻaloʻofa kiate ia mo hono kakaí.