1 Nīfai 17–18

Ko ha Vaka ke Folau Ai ʻi he Tahí

Ko e teuteu ke fononga ki he fonua ʻo e talaʻofá

ngaahi fāmili ʻi he veʻe tahí

Ko Mahú ko ha fonua ia naʻe lahi ai ʻa e fuaʻiʻakaú mo e honé. Ko ha feituʻu fakaʻofoʻofa ia ke nofo ai. Naʻe nofo ʻa e fāmili ʻo Līhai mo Selaiá ʻi he veʻe tahí pea naʻa nau maʻu ʻa e meʻa kotoa pē naʻa nau fiemaʻú.

1 Nīfai 17:5–6

ko e lotu ʻa Nīfaí

Hili ha ngaahi ʻaho lahi, naʻe folofola ʻa e ʻEikí kia Nīfai ke ʻalu ki ha moʻunga ke lotu. Naʻe folofola ange ai ʻa e ʻEikí ke ne foʻu ha vaka ke folau ai mo hono fāmilí ʻi he tahí.

1 Nīfai 17:7–8

sio ʻa Nīfai ki ha ngaahi fuʻu maka

Naʻe fakahā ʻe he ʻEikí kia Nīfai ʻa e founga ke foʻu ai ʻa e vaká. Ka naʻe ʻikai ke ʻilo ʻe Nīfai ʻa e feituʻu ke maʻu ai ha ukamea ke ngaohi ʻaki ha ʻū meʻangāué. Naʻe fakahā ʻe he ʻEikí kia Nīfai ʻa e feituʻu ke kumi ai ʻa e ukameá.

1 Nīfai 17:8–10

ngāue ʻa Nīfai kae talanoa ʻa Leimana mo Lēmiuela

Kimui angé, naʻe tafu ʻe Nīfai ha afi ke ngaohi ʻaki ha ʻū meʻangāue. Naʻe siofi ʻe Leimana mo Lēmiuela hona tokoua ko Nīfaí. Naʻe ʻikai ke na fie tokoni kiate ia ke foʻu e vaká. Naʻá na pehē ko ha fakakaukau hala ia ke kolosi ʻi he tahí.

1 Nīfai 17:11, 16–18

ʻita ʻa Leimana mo Lēmiuela kia Nīfai

Naʻe ʻikai ke tui ʻa Leimana mo Lēmiuela naʻe folofola ʻa e ʻEikí kia Nīfai ke ne foʻu ha vaka. Naʻe fehuʻi ange ʻe Nīfai pe ko e hā e ʻuhinga naʻá na kei taʻetui ai ki he ʻEikí. Naʻá ne fakamanatu ange ki hono ongo tokouá kuó na mamata ki ha ʻāngelo mo ʻiloʻi ʻa e mālohi ʻo e ʻEikí. Naʻe fuʻu ʻita lahi ʻa Leimana mo Lēmiuela ʻo na loto ai ke tamateʻi ʻa Nīfai.

1 Nīfai 17:18–19, 45–48

Leimana mo Lēmiuela ʻi he kelekelé

Ka naʻe fakafonu ʻaki ʻa Nīfai ʻa e mālohi ʻo e ʻOtuá. Naʻe fakatokanga ʻe Nīfai kia Leimana mo Lēmiuela ke ʻoua te na ala kiate ia. Naʻá na ilifia pea naʻe ʻikai ke na teitei ala kia Nīfai ʻi ha ngaahi ʻaho lahi. Naʻe folofola ange leva ʻa e ʻEikí kia Nīfai ke mafao atu hono ongo nimá ki hono ongo taʻoketé. ʻI he taimi naʻe ala atu ai ʻa Nīfai kiate kinauá, naʻá na ongoʻi naʻe luluʻi kinaua ʻe he mālohi ʻo e ʻEikí.

1 Nīfai 17:48, 52–55

ngāue ʻa e tokotaha kotoa ʻi he vaká

Naʻe hū ʻa Leimana mo Lēmiuela ki he ʻEikí peá na tokoni ki hono foʻu ʻo e vaká. Naʻe tuʻo lahi ʻa e lotu ʻa Nīfai ki he ʻEikí ke maʻu ha tokoní. Naʻe fakaʻofoʻofa ʻa e vaka naʻe foʻu ʻe he fāmili ʻo Nīfaí. Hili ha ngaahi ʻaho lahi, naʻe ʻosi ʻa e vaká, pea naʻa nau vakai naʻe lelei ia. Naʻe ʻiloʻi ʻe he fāmili ʻo Nīfaí kuo tokoniʻi kinautolu ʻe he ʻEikí.

1 Nīfai 18:1–4