“Kakai Fefine ʻi he Feituʻu Maomaonganoá,” Ngaahi Talanoa ʻo e Tohi ʻa Molomoná (2023)
Kakai Fafine ʻi he Maomaonganoá
ʻAʻeva mo e ʻEikí
Naʻe fononga ʻa e ngaahi ʻofefine ʻo ʻIsimelí mo honau fāmilí ʻi he feituʻu maomaonganoá. Naʻe faingataʻa ʻa e fonongá. Hili ha ngaahi taimi, naʻa nau mali mo e ngaahi foha ʻo Līhai mo Selaiá.
ʻI ha ʻaho ʻe taha, naʻe mālōlō ai ʻa ʻIsimeli. Naʻe loto-mamahi ʻaupito hono ngaahi ʻofefiné. Naʻa nau ʻofa ki heʻenau tamaí. Naʻe hohaʻa ʻa e ngaahi ʻofefiné naʻa nau mate mo honau ngaahi fāmilí ʻi he feituʻu maomaonganoá. Naʻa nau ʻita kia Līhai mo Nīfai, pea naʻa nau fie foki ki ʻapi ki Selusalema.
Naʻe ongo mai ʻa e leʻo ʻo e ʻEikí ki he ngaahi ʻofefine ʻo ʻIsimelí mo honau ngaahi fāmilí. Naʻa nau fakatomala, pea naʻe tāpuakiʻi kinautolu ʻe he ʻEikí.
Naʻe fāʻeleʻi ʻe he kau fafiné ha fānau ʻi he feituʻu maomaonganoá. Naʻe fanauʻi foki ʻe Selaia mo ha ongo foha ʻe toko ua ko Sēkope mo Siosefa.
Naʻe tokoniʻi ʻe he ʻEikí ʻa e kakai fefiné ʻi heʻenau fonongá. Naʻá Ne tāpuakiʻi kinautolu ʻaki ha huʻakau mahu maʻa ʻenau fānau valevalé. Naʻá Ne tokoniʻi ʻa e kakai fefiné ke nau mālohi ange ʻi heʻenau fonongá.
Naʻe folofola ʻe he ʻEikí naʻá Ne tataki ʻa e ngaahi ʻofefiné mo honau ngaahi fāmilí ki ha fonua ʻo e talaʻofá. Naʻe talaʻofa ʻe he ʻEikí ki he ngaahi fāmilí te nau maʻu ʻa e meʻa kotoa pē naʻa nau fiemaʻú ʻi heʻenau fonongá. Naʻá Ne ngaohi ʻa e [kakanoʻi manu] naʻa nau maʻú ke lelei ki he kaí, peá Ne tataki kinautolu.
Hili ha taʻu ʻe valu ʻo ʻenau ʻi he feituʻu maomaonganoá, naʻe aʻu ʻa e ngaahi fāmilí ki he tahí. Naʻe fiefia ʻa e kakai fefiné mo honau ngaahi fāmilí. Naʻe fakaʻofoʻofa ʻa e fonua ʻi he veʻe tahí. Naʻa nau ui ia ko Mahu koeʻuhí he naʻe lahi ai ʻa e fuaʻiʻakau mo e hone ke kaí. Kuo teuteuʻi kotoa ia ʻe he ʻEikí maʻanautolu.