1 Nīfai 16

Ko e Liahoná mo e Kaufana Kuo Motú

Fekumi ki he tokoni ʻa e ʻEikí

ngaahi fāmili ʻoku tangutu takatakai ʻi ha tafuʻanga afi

Naʻe fononga ʻa e ngaahi fāmili ʻo Līhai mo ʻIsimelí ʻi he feituʻu maomaonganoá ʻi ha ngaahi taʻu lahi. Naʻe tataki kinautolu ʻe he ʻEikí ʻi he ngaahi feituʻu lelei ange ʻo e fonuá. Naʻe pau ke nau tuli manu mo tānaki ha meʻakai ʻi heʻenau fonongá. Ko ha fononga faingataʻa ia.

1 Nīfai 16:14; 17:1, 4

vakai ʻa Līhai ki he hopo ʻa e laʻaá

Naʻe talaʻofa ʻe he ʻEikí ke tataki ʻa e ngaahi fāmilí ki ha fonua lelei kapau te nau tauhi ʻa e ngaahi fekaú. Naʻe ʻikai ke nau ʻilo ʻa e founga ke maʻu ai ʻa e fonuá, ka te Ne tataki kinautolu.

1 Nīfai 2:20; 10:13; 17:13–14

pukepuke ʻe Līhai ʻa e Liahoná

ʻI ha pongipongi ʻe taha, naʻe ʻohovale ʻa Līhai ke maʻu ha foʻi pulu palasa ʻi tuʻa ʻi hono tēnití. Naʻe ui ʻa e foʻi pulú ko e Liahoná. ʻI loto ʻi he Liahoná, naʻe ʻi ai ha foʻi tao naʻe tuhu ki he feituʻu naʻe fiemaʻu ke fononga ai ʻa e kulupú. Naʻa nau maʻui he taimi ʻe niʻihi ha ngaahi pōpoaki mei he ʻEikí naʻe tohi ʻi he Liahoná. Ko e founga ʻeni naʻe tataki ai kinautolu ʻe he ʻEikí.

1 Nīfai 16:10, 16, 26–29; ʻAlamā 37:38

Nīfai mo ha kaufana kuo motu pea lāunga ʻa Leimana mo Lēmiuela

Lolotonga ʻa e tuli manu ʻa Nīfai ʻi ha ʻaho ʻe taha, naʻe motu ʻene kaufana ukameá. He ʻikai lava ke maʻu ha meʻakai ʻa e ngaahi fāmilí ka ʻikai ia. Naʻe ʻita ʻa e ngaahi tokoua ʻo Nīfaí kiate ia pea mo e ʻEikí.

1 Nīfai 16:18–21

pukepuke ʻe Nīfai ʻa e kaufana kuo motú pea ʻoku ʻita ʻa Līhai

Naʻa nau fuʻu helaʻia mo fiekaia kotoa. Naʻe loto-mamahi hanau niʻihi pea nau lāunga. Naʻa nau ilifia naʻa nau mate fiekaia. Naʻe lāunga mo Līhai ki he ʻEikí.

1 Nīfai 16:19–22, 35

pukepuke ʻe Nīfai ha hāmala mo ha tutuʻu

Naʻe ngaohi ʻe Nīfai ha kaufana foʻou mo ha ngahau ʻaki ha ʻakau. Naʻá ne tui ʻe tokoniʻi ia ʻe he ʻEikí ke ne ʻilo ha meʻakai.

1 Nīfai 16:23

sio ʻa Nīfai mo Līhai ki he Liahoná

Naʻe fehuʻi ʻe Nīfai kia Līhai pe ko e fē ʻa e feituʻu ʻe ʻalu ʻo tuli manu aí. Naʻe loto-mamahi ʻa Līhai ʻi heʻene lāungá. Naʻá ne fakatomala ʻo kole tokoni ki he ʻEikí. Naʻe folofola ʻa e ʻEikí kia Līhai ke vakai ki he Liahoná. Naʻe hiki ai ha pōpoaki. Naʻe ʻilo ʻe he ngaahi fāmilí naʻe toki ngāue pē ʻa e Liahoná ʻi he taimi naʻa nau tui ai ki he ʻEikí mo talangofua ki he ngaahi fekaú.

1 Nīfai 16:23–29

mamata ʻa e fāmili ʻo Līhaí ki hono fata mai ʻe Nīfai ha monumanu naʻá ne tamateʻi

Naʻe liliu ʻe he ʻEikí he taimi ʻe niʻihi ʻa e pōpoaki ʻi he Liahoná ke tokoniʻi kinautolu lolotonga ʻenau ngaahi fefonongaʻakí. Naʻe tokoniʻi ʻe he Liahoná ʻa Nīfai ke ne ʻiloʻi ʻa e feituʻu ke tuli manu aí. Naʻá ne foki mai mo ha meʻakai ke nau kai, pea naʻa nau fiefia kotoa. Naʻa nau fakatomala pea fakamālō ki he ʻEikí.

1 Nīfai 16:28–32