“Sēkope mo Seialemi,” Ngaahi Talanoa ʻo e Tohi ʻa Molomoná (2023)
Sēkope mo Seialemi
Ko e fakamoʻoni ha palōfita kia Sīsū Kalaisi
Ko Sēkopé ko ha palōfita naʻe mamata kia Sīsū Kalaisi. Naʻá ne loto ke tui ʻa e kakaí kia Sīsū. Naʻe akoʻi ʻe Sēkope ʻa e kakaí ke tauhi ʻa e ngaahi fekau ʻa e ʻOtuá. Naʻá ne ngāue mālohi ke akoʻi ʻa e kakaí fekauʻaki mo Sīsū.
2 Nīfai 11:2–3; Sēkope 1:1–8, 17–19
ʻI ha ʻaho ʻe taha, naʻe kamata akoʻi ʻe ha tangata ko hono hingoá ko Seialemi ʻa e kakaí. Ka naʻe akoʻi ʻe Seialemi naʻe ʻikai moʻoni ʻa Sīsū. Naʻe pōtoʻi lea ʻa Seialemi, pea naʻe tui ha kau Nīfai tokolahi ki he meʻa naʻá ne lea ʻakí. Koeʻuhí ko ia, naʻe ʻikai toe tui ha kakai tokolahi kia Sīsū. Naʻe loto foki ʻa Seialemi ke ʻoua ʻe tui ʻa Sēkope kia Sīsū.
Naʻe talaange ʻe Seialemi he ʻikai lava ʻe ha taha ʻo ʻiloʻi ʻa e meʻa ʻe hoko ʻi he kahaʻú. Naʻá ne pehē naʻe ʻuhinga ʻeni he ʻikai lava ʻe ha taha ʻo ʻiloʻi pe ʻoku moʻoni ʻa Sīsū, koeʻuhí he naʻe teʻeki ke hāʻele mai ʻa Sīsū ki he māmaní. Ka naʻe pehē ʻe Sēkope ʻoku akoʻi ʻe he folofolá mo e kau palōfitá ʻo kau kia Sīsū. Kuo fakahā ʻe he ʻOtuá kia Sēkope ʻe hāʻele mai ʻa Sīsū ki he māmaní.
Naʻe ʻikai pē ke tui ʻa Seialemi ia. Naʻá ne fiemaʻu ke fakahā ange ʻe Sēkope ha fakaʻilonga ʻoku moʻoni ʻa Sīsū.
Naʻe pehē ʻe Sēkope naʻe ʻiloʻi ʻe Seialemi ʻe hāʻele mai ʻa Sīsū pea naʻe ʻikai ke ne fiemaʻu ha fakaʻilonga. Ka naʻe pehē ʻe Sēkope ʻe ʻai ʻe he ʻOtuá ke pongia ʻa Seialemi ke fakahaaʻi ʻoku maʻu ʻe he ʻOtuá ʻa e mālohí pea ʻoku moʻoni ʻa Sīsū.
Fakafokifā pē kuo puke ʻa Seialemi ʻo ne tō ki he kelekelé. Hili ha ngaahi ʻaho lahi, naʻá ne ʻiloʻi te ne mate. Naʻá ne tala ki he kakaí kuo kākaaʻi ia ʻe Sētane. Naʻá ne pehē kuó ne loi ki he ʻOtuá. Naʻá ne ʻiloʻi maʻu pē ʻoku moʻoni ʻa Sīsū. Naʻe mate leva ʻa Seialemi. Naʻe lau ʻe he kakaí ʻa e folofolá pea tui kia Sīsū.