“Kitione, ʻAlamā, mo Nēhoa,” Ngaahi Talanoa ʻo e Tohi ʻa Molomoná (2023)
“Kitione, ʻAlamā, mo Nēhoa,” Ngaahi Talanoa ʻo e Tohi ʻa Molomoná
Kitione, ʻAlamā mo Nēhoa
Maluʻi ʻa e moʻoní ʻaki ʻa e folofola ʻa e ʻOtuá
Naʻe fili ʻe he kau Nīfaí ʻa ʻAlamā ko e Siʻi ke hoko ko honau tuʻi fakamaau lahí. Naʻe hoko foki ʻa ʻAlamā ko e taulaʻeiki lahi ʻo e Siasí.
Naʻe kamata akoʻi ʻe ha tangata ko Nēhoa ha meʻa naʻá ne ui ko e folofola ʻa e ʻOtuá. Ka naʻá ne akoʻi ki he kakaí naʻe ʻikai fiemaʻu ke nau talangofua ki he ʻOtuá pe fakatomala.
Naʻe saiʻia mo tui ha kakai tokolahi ki he meʻa naʻe lea ʻaki ʻe Nēhoá. Naʻá ne loto ke foaki ange ʻe he kakaí ha paʻanga mo fakahīkihikiʻi ia. Naʻá ne fakakaukau naʻá ne lelei ange ʻi he kakai kehé. Naʻá ne fokotuʻu hano siasi pē ʻoʻona, pea naʻe fanongo ha kakai tokolahi kiate ia.
ʻI ha ʻaho ʻe taha, naʻe fetaulaki ai ʻa Nēhoa mo ha tangataʻeiki toulekeleka ko Kitione. Naʻe hoko ʻa Kitione ko ha faiako ʻi he Siasi ʻo e ʻOtuá pea naʻá ne fai ha ngaahi ngāue lelei lahi. Naʻe loto ʻa Nēhoa ke mavahe ʻa e kakaí mei he Siasí, ko ia naʻá ne fakakikihi ai mo Kitione. Naʻe fakaʻaongaʻi ʻe Kitione ʻa e folofola ʻa e ʻOtuá ke fakahaaʻi naʻe ʻikai akoʻi ʻe Nēhoa ʻa e moʻoní. Naʻe ʻita ʻa Nēhoa! Naʻá ne tamateʻi ʻa Kitione ʻaki ʻene heletaá.
Naʻe ʻave ʻe he kakaí ʻa Nēhoa kia ʻAlamā ke fakamāuʻi. Naʻe feinga ʻa Nēhoa ke taukapoʻi ʻa e meʻa kuó ne faí. Naʻe ʻikai ke ne loto ke tauteaʻi ia.
Naʻe pehē ʻe ʻAlamā naʻe hala ʻa e ngaahi akonaki ʻa Nēhoá pea te ne lava ʻo fakamamahiʻi ʻa e kakaí. Naʻe muimui ʻa ʻAlamā ki he laó. Koeʻuhí ko e tamateʻi ʻe Nēhoa ʻa Kitioné, naʻe tamateʻi ai ʻa Nēhoa.
Kimuʻa pea mate ʻa Nēhoá, naʻá ne talaange ki he kakaí naʻá ne loi. Kuo teʻeki ai ke ne akoʻi ʻa e folofola ʻa e ʻOtuá. Neongo naʻe tala ʻe Nēhoa naʻe hala ʻene meʻa naʻe faí, ka naʻe muimui ha kakai tokolahi ki heʻene sīpingá. Naʻa nau loi ki he kakaí ke maʻu ha fakamālō mo ha paʻanga. Ka naʻe fakafanongo ʻa e kakai kehé kia ʻAlamā. Naʻa nau tokangaʻi ʻa e masivá pea tauhi ʻa e ngaahi fekau ʻa e ʻOtuá.