Mōsaia 19–22

Tuʻi ko Noá mo e Tuʻi ko Limihaí

Ko e hola mei he kau Leimaná

Ko Kitione ʻokú ne toʻo ha heletā pea tuʻu ʻo ofi ki ha fale māʻolunga, pea ʻoku ʻi he fale māʻolungá ʻa Noa ʻo tuhu ki he kau tau Leimaná

Naʻe puleʻi ʻe he Tuʻi ko Noá ha kulupu ʻo e kau Nīfaí. Naʻá ne fai ha ngaahi meʻa kovi lahi, pea naʻe ʻita ha kakai ʻe niʻihi ʻiate ia. Naʻe ʻi ai ha tangata ko Kitione naʻá ne tauʻi ʻa Noa ʻaki ha heletā. Naʻe hola ʻa Noa ʻo kaka ʻi ha fale māʻolunga. Naʻe sio mei he fale māʻolungá ʻoku haʻu ha kau tau ʻa e kau Leimaná Naʻe fakangalingali pē ʻe Noa naʻe ilifia, telia hono kakaí, ko ia naʻe tuku ia ʻe Kitione ke ne moʻui.

Mōsaia 11:1–2; 19:2–8

ʻOku hola ʻa Noa, pea ilifia ʻa e kakai ʻo Noá

Naʻe hola ʻa Noa mo hono kakaí. Ka naʻe tuli kinautolu ʻe he kau Leimaná ʻo kamata ke ʻohofi kinautolu. Naʻe talaange ʻe Noa ki he kau tangatá ke liʻaki honau ngaahi fāmilí ka nau ō mo ia.

Mōsaia 19:9–11

Ko e fehangahangai ʻa Limihai, Kitione, mo e kau Nīfai kehé mo e kau tau Leimaná

Naʻe mavahe ha kau tangata ʻe niʻihi mo Noa. Ka naʻe fili ha kau tangata tokolahi ke nofo mo honau ngaahi fāmilí. Naʻe fili foki mo Limihai ko e foha ʻo Noá ke nofo.

Mōsaia 19:12, 16–17

kakai fefine ʻoku tuʻu ʻi muʻa ʻia Limihai pea mo e kau Nīfai kehé

Naʻe tuʻu ha ngaahi ʻofefine tokolahi ʻi muʻa ʻi he kau taú ʻo kole ki he kau Leimaná ke ʻoua ʻe fakamamahiʻi honau ngaahi fāmilí. Naʻe fanongo ʻa e kau Leimaná ki he ngaahi ʻofefiné pea tuku ke moʻui ʻa e kau Nīfaí. Ka naʻe puke pōpula ʻe he kau Leimaná ʻa e kau Nīfaí.

Mōsaia 19:13–15

ʻOku feʻitangaki ʻa Noa mo ʻene kau tangatá

Naʻe fie foki ‘a e kau tangata naʻe holá ki honau ngaahi fāmilí. Naʻe feinga ʻa Noa ke taʻofi kinautolu, ko ia naʻe fakapoongi ia ʻe he kau tangatá. Pea nau foki leva ki honau ngaahi fāmilí.

Mōsaia 19:18–22

kau tangata Nīfai ʻoku nau fakafeʻiloaki ki honau ngaahi fāmilí mo Kitione

Naʻe fiefia ʻaupito ʻa e kau tangatá ʻi he malu honau ngaahi fāmilí. Naʻa nau talaange kia Kitione ʻa e meʻa naʻe hoko kia Noá.

Mōsaia 19:22–24

Limihai ʻokú ne foaki ki he kau Leimaná ha meʻakai mo ha fanga monumanu

Naʻe fili ʻe he kakaí ʻa Limihai ke hoko ko honau tuʻi foʻou. Naʻe palōmesi ʻa Limihai ki he tuʻi Leimaná te nau totongi ʻa e vaeua ʻo e meʻa kotoa pē naʻa nau maʻú ki he kau Leimaná. Naʻe palōmesi ange leva ʻa e tuʻi Leimaná he ʻikai ke ne fakamamahiʻi ʻa e kakai ʻo Limihaí.

Mōsaia 19:25–27

Mata mamahi ʻa Limihai mo hono uaifí, pea mamahi mo ha tokolahi ʻo e kau Nīfaí

Naʻa nau nofo melino ʻi ha ngaahi taʻu. Pea kamata leva ke anga kovi ʻaupito ʻa e kau Leimaná ki he kakai ʻo Limihaí. Naʻe fiemaʻu ʻe he kakaí ke nau toe tauʻatāina. Naʻa nau feinga ke tauʻi ʻa e kau Leimaná, ka naʻa nau foʻi. Naʻe lotu ʻa e kakaí ki he ʻOtuá ke maʻu ha tokoni.

Mōsaia 19:29; 21:1–15

Limihai mo ʻĀmoni ʻokú na talanoa

ʻI ha ʻaho ʻe taha, naʻe ʻaʻahi ai ha tangata Nīfai ko ʻĀmoni kia Limihai mo hono kakaí. Naʻe haʻu ʻa ʻĀmoni mei ha fonua naʻe ui ko Seilahemala. Naʻe fiefia ʻa Limihai ke mamata kia ʻĀmoni.

Mōsaia 21:22–24

ʻOku talanoa ʻa Kitione, Limihai, ʻĀmoni, mo ha kau Nīfai kehe

ʻE lava ke taki fakafoki ʻe ʻĀmoni ʻa e kakai ʻo Limihaí ki Seilahemala, ka ʻe fiemaʻu ke nau ʻuluaki hola mei he kau Leimaná. Naʻe ʻi ai ha palani ʻa Kitione.

Mōsaia 21:36; 22:1–9, 11

Mohe ʻa e kau leʻo Leimaná, pea mavahe ʻa e kau Nīfaí ia mei he koló

ʻI he poʻulí, naʻe ʻoange ʻe Kitione ki he kau leʻo Leimaná ha uaine lahi ange ke nau tō ʻo mohe. Lolotonga e mohe ʻa e kau leʻó, naʻe hola ʻa Limihai mo e kotoa hono kakaí mei he koló.

Mōsaia 22:7, 10–12

Talitali lelei ʻe he Tuʻi ko Mōsaiá mo hono kakaí ʻa Limihai mo hono kakaí

Naʻa nau ō ki Seilahemala ʻo fakataha mo e kau Nīfai ʻi aí. Naʻe ako lahi ange ʻa Limihai mo hono kakaí fekauʻaki mo e ʻOtuá. Naʻa nau fai ha fuakava, pe palōmesi makehe, ke tauhi ki he ʻOtuá mo talangofua ki Heʻene ngaahi fekaú. Naʻe papitaiso kinautolu pea nau kau ki he Siasi ʻo e ʻOtuá. Naʻa nau manatuʻi naʻe tokoniʻi kinautolu ʻe he ʻOtuá ke nau hao mei he kau Leimaná.

Mōsaia 21:32–35; 22:13–14; 25:16–18