1 Nīfai 1–2

Mavahe ʻa Līhai mo Selaia mei Selusalemá

Ko e fakatokanga ʻa e ʻEikí ki ha fāmili

Naʻe nofo ʻa Līhai mo Selaia ʻi Selusalema mo ʻena fānaú. Naʻe mamata ʻa Līhai ki ha mata meʻa-hā-mai mei he ʻEikí. Naʻá ne mamata ʻe hāʻele mai ha Fakamoʻui ki he māmaní ʻi ha ʻaho. Naʻe fakahā ange foki ʻe he ʻEikí kiate ia ʻe fakaʻauha ʻa Selusalema.

1 Nīfai 1:4–18

Naʻe tala ʻe Līhai ki he kakaí ʻa ʻene mata meʻa-hā-maí. Naʻá ne talaange ʻe hāʻele mai ʻa Sīsū Kalaisi ke fakahaofi ʻa e māmaní ʻi ha ʻaho.

1 Nīfai 1:18–19

Naʻe fakahā foki ʻe Līhai ki he kakaí ʻe fakaʻauha ʻa Selusalema. Naʻá ne fakaafeʻi kinautolu ke fakatomala.

1 Nīfai 1:14, 18–19

Naʻe ʻita ʻa e kakaí. Naʻe toe folofola ʻa e ʻEikí kia Līhai ʻi ha misi. Naʻe ʻilo ʻe Līhai he ʻikai ke ne malu mo hono fāmilí ʻi Selusalema. Naʻe pau ke nau mavahe.

1 Nīfai 1:19–20; 2:1–2

Naʻe talangofua ʻa Līhai mo Selaia ki he ʻEikí. Naʻá na mavahe mei he koló mo hona fāmilí. Naʻe ʻi ai ha ngaahi foha ʻe toko fā ʻa Līhai mo Selaia ko Leimana, Lēmiuela, Samu mo Nīfai. Naʻe pau ke nau liʻaki honau ʻapí mo ʻenau ngaahi meʻa leleí.

1 Nīfai 2:3–5

Naʻe fononga ʻa e fāmilí ʻi he toafá ʻo ofi ki he Tahi Kulokulá. Naʻe fakamālō ʻa Līhai ki he ʻEikí ʻi hono tāpuakiʻi hono fāmilí. Naʻá ne akoʻi hono fāmilí ke nau muimui ki he ʻEikí mo tauhi ʻEne ngaahi fekaú.

1 Nīfai 2:5–10

Naʻe hanu ʻa Leimana mo Lēmiuela. Naʻá na ʻofa ki honau ʻapí mo e ngaahi meʻa kotoa ne nau liʻakí. Naʻe ʻikai mahino kiate kinaua ʻa e ʻuhinga naʻe folofola ai ʻe he ʻEikí ke nau mavahé. Naʻe ʻikai ke na tui ʻe lava ke fakaʻauha ha fuʻu kolo lahi hangē ko Selusalemá.

1 Nīfai 2:11–13

Naʻe fakakaukau ʻa Leimana mo Lēmiuela ko ha ngaahi fakakaukau pē ʻa Līhai ʻa ʻene ngaahi mata meʻa-hā-maí. Fēfē kapau ʻe hē ai pē honau fāmilí ʻi he toafá ʻo taʻengata?

1 Nīfai 2:11

Naʻe loto ʻa Nīfai ke ne ʻiloʻi ʻiate ia pē naʻe moʻoni ʻa e meʻa naʻe lea ʻaki ʻe Līhaí. Naʻá ne lotu ʻo fehuʻi ki he ʻEikí.

1 Nīfai 2:16

Naʻe fekauʻi mai ʻe he ʻEikí ʻa e Laumālie Māʻoniʻoní ke tokoniʻi ʻa Nīfai ke tui ki he ngaahi lea ʻa ʻene tamaí. Naʻe tui ʻa Nīfai ki he ʻEikí peá ne vahevahe ʻa e meʻa naʻá ne akó mo hono ngaahi tokouá. Naʻe fakafanongo ʻa Samu kia Nīfai peá ne tui kiate ia, ka naʻe ʻikai fanongo ʻa Leimana mo Lēmiuela.

1 Nīfai 2:16–18