“Palōfita ko ʻEtá,” Ngaahi Talanoa ʻo e Tohi ʻa Molomoná (2023)
Palōfita ko ʻEtá
Ko e fakatokanga ʻa e ʻEikí ki ha puleʻanga
Naʻe ʻomai ʻe he ʻEikí ʻa e tokoua ʻo Sēletí mo hono fāmilí ki he fonua ʻo e talaʻofá. Naʻa nau loto-fakatōkilalo mo tauhi e ngaahi fekau ʻa e ʻOtuá. Naʻe tupu tokolahi honau kakaí ʻi ha ngaahi taʻu lahi, pea nau fiemaʻu ha tuʻi ke taki kinautolu. Naʻe fakatokanga ange ʻa e tokoua ʻo Sēletí kiate kinautolu ʻe lava ke taki kinautolu ʻe he maʻu ha tuʻí ki ha palopalema, ka naʻá ne tuku pē ke nau fili ha tuʻi.
Naʻe nofo ʻa e kau Sēletí ʻi he fonua ʻo e talaʻofá ʻi ha taʻu ʻe laungeau. Naʻe taki kinautolu he taimi ʻe niʻihi ʻe honau ngaahi tuʻí ke nau fai lelei, ka ʻi he ngaahi taimi ʻe niʻihi, naʻe ʻikai ke nau fai ia. ʻE ala fakatokanga e kau palōfita ʻa e ʻOtuá ki he kakaí ke nau fakatomala. ʻI he taimi naʻa nau fanongo ai mo tauhi e ngaahi fekau ʻa e ʻOtuá, naʻá Ne tāpuakiʻi kinautolu. Ko e palōfita Sēleti fakamuimuitahá ko ʻEta.
ʻEta 7:23–27; 9:26–30; 10:16–17, 28; 11:1–8, 12–13, 20–22; 12:2
Naʻe ʻikai ke talangofua ʻa e kakaí ki he ʻOtuá. Ka naʻe ʻia ʻEta ʻa e Laumālie ʻo e ʻEikí. Naʻá Ne akoʻi kinautolu mei he pongipongí ʻo aʻu ki he poʻulí. Naʻá ne pehē ke nau tui ki he ʻOtuá pea fakatomala, pe ʻe fakaʻauha kinautolu. Kapau naʻa nau maʻu ʻa e tuí, te nau lava ʻo ʻamanaki ke toe nofo fakataha mo e ʻOtuá mo maʻu ha ivi ke fai ha ngaahi meʻa lelei. Naʻe ʻikai ke tui ʻa e kakaí.
Naʻe mamata ʻa ʻEta ki he meʻa naʻe fai ʻe he kakaí. Naʻe toitoi ʻi ha ʻana he lolotonga e ʻahó mo hiki ʻa e meʻa naʻá ne mamata ki aí. Naʻe ʻikai ke fakatomala ʻa e kakaí pea kamata ke nau fetauʻaki.
Naʻe vakai ʻa ʻEta ki he tuʻi ʻo e kau Sēletí, Kolianitomuli, naʻe pau ke ne tauʻi ha kakai tokolahi naʻe fie hoko ko e tuʻí. Naʻe fakaʻaongaʻi ʻe Kolianitomuli ʻene kau taú ke maluʻi ia.
ʻI ha ʻaho ʻe taha, naʻe folofola ai ʻa e ʻEikí kia ʻEta ke fakatokanga kia Kolianitomuli mo hono kakaí ke nau fakatomala. Kapau te nau fai ia, ʻe tokoniʻi ʻe he ʻEikí ʻa e kakaí mo tuku ke kei maʻu pē ʻe Kolianitomuli hono puleʻangá. Ka ʻikai, ʻe fefakaʻauhaʻaki ʻa e kakaí. ʻE moʻui fuoloa ʻa Kolianitomuli ke ne ʻilo ko e ngaahi folofola ʻa e ʻEikí naʻe moʻoni. Pea te ne toki mate mo ia.
Naʻe ʻikai ke fakatomala ʻa Kolianitomuli mo hono kakaí. Naʻe feinga ʻa e kakaí ke fakapoongi ʻa ʻEta, ka naʻe hola ʻa ʻEta ki hono ʻaná. Naʻe tauʻi ʻe ha tangata ko Sise ʻa Kolianitomuli. Naʻe fili ʻa e kakaí pe te nau kau ki he kau tau ʻa Sisé pe kau tau ʻa Kolianitomulí. Naʻe fepaki tā-tuʻolahi ʻa e ongo konga kaú. Naʻe mate ha kakai tokolahi.
Naʻe manatuʻi ʻe Kolianitomuli ʻa e meʻa naʻe lea ʻaki ʻe ʻEtá. Naʻe loto-mamahi ʻi he tokolahi fau hono kakai kuo maté. Naʻá ne manatuʻi naʻe fakatokanga ʻa e kau palōfitá kotoa ʻe hoko ʻa e meʻá ni. Naʻe kamata ke ne fakatomala pea ʻave ha tohi kia Sise. Naʻá ne pehē te ne tukuange ʻa e puleʻangá kapau ʻe lava ʻo fakamoʻui hono kakaí. Ka naʻe loto ʻa Sise ke nau tau.
Naʻe ʻita e kakai ʻo Kolianitomulí pea nau loto ke tau. Naʻe ʻita foki mo e kakai ʻo Sisé mo loto ke tau. Naʻe ʻikai ha taha ia ʻe fie fakatomala. Naʻe mamata ʻa ʻEta naʻe ō ʻa e tokotaha kotoa pē ke tau. Naʻe mate ha tokolahi ange ʻo e kakaí.
Naʻe loto ʻa Kolianitomuli ke taʻofi ʻa e taú. Naʻá ne kole kia Sise ke ne ʻave ʻa e puleʻangá kae ʻoua ʻe fakamamahiʻi hono kakaí. Ka naʻe ʻita ʻa e tokotaha kotoa. Naʻe ʻikai ke nau maʻu e Laumālie ʻo e ʻEikí. Naʻe mamata ʻa ʻEta naʻe kei tau pē ʻa e tokotaha kotoa kae ʻoua ko Kolianitomuli pē ʻa e tokotaha Sēleti naʻe kei moʻui. Pea pongia leva ʻa Kolianitomuli.
Naʻe mamata ʻa ʻEta naʻe hoko ʻa e meʻa kotoa pē naʻe folofola ʻaki ʻe he ʻEikí. Naʻe fakaʻosi ʻe ʻEta hono hiki ʻo e meʻa naʻe hokó. Pea naʻá ne fakapapauʻi ʻe lava ʻa e kakaí ʻo ʻilo ʻene ngaahi tohí ka hili haʻane mate. Naʻe falala ʻa ʻEta ki he ʻOtuá mo ʻamanaki ke ne nofo mo Ia ʻi ha ʻaho.