“Ko e ʻAkau ʻo e Moʻuí,” Ngaahi Talanoa ʻo e Tohi ʻa Molomoná (2023)
“Ko e ʻAkau ʻo e Moʻuí,” Ngaahi Talanoa ʻo e Tohi ʻa Molomoná
Ko e ʻAkau ʻo e Moʻuí
Ko e misi ʻa Līhai naʻe ueʻi fakalaumālié
ʻI ha pō ʻe taha, naʻe maʻu ai ʻe Līhai ha misi mei he ʻEikí. Naʻá ne talanoa ʻene misí ki hono fāmilí.
Naʻe mamata ʻa Līhai ʻi heʻene misí ki ha tangata naʻe pulupulu hinehina. Naʻe talaange ʻe he tangatá kia Līhai ke muimui ange ʻiate ia.
Naʻe mamata ʻa Līhai ʻokú ne ʻi ha feituʻu fakapoʻuli naʻe ʻikai ha taha ai. Naʻá ne lue lalo ʻi ha ngaahi houa lahi. Ka naʻe ʻikai mole atu ʻa e fakapoʻulí. Naʻe faifai pea lotu ʻa Līhai ke maʻu ha tokoni.
ʻI he ʻosi ʻa e lotu ʻa Līhaí, naʻá ne mamata ki ha fuʻu lotoʻataʻatā lahi. Naʻe ʻi he lotoʻataʻatā ko iá ha fuʻu ʻakau ʻoku fua hinehina. Naʻe fakakaukau ʻa Līhai ʻe hanga ʻe he fuaʻiʻakaú ʻo fakafiefiaʻi ia, ko ia naʻá ne kai ai. Naʻe fonu hono lotó ʻi he fiefia.
Naʻe ifo ange ʻa e fuá ʻi ha toe fuaʻiʻakau kehe. Naʻe melie mo ifo. Naʻe loto ʻa Līhai ke vahevahe ia mo hono fāmilí. Naʻá ne ʻiloʻi te nau fiefia foki ai. Naʻe mamata ʻa Līhai kia Selaia, Samu, mo Nīfai ʻoku nau tuʻu ʻi he veʻe vaitafé. Naʻe hangē ʻoku nau heé. Naʻe ui leʻo lahi atu ʻa Līhai kiate kinautolu. Naʻá ne kole ange ke nau omi ʻo kai ʻi he fuá.
Naʻe haʻu ʻa Selaia, Samu, mo Nīfai ki he fuʻu ʻakaú ʻo kai ʻa e fuá. Naʻe fakasio ʻe Līhai ʻa Leimana mo Lēmiuela. Naʻá ne loto ke na fiefia foki mo kinaua ʻi he fuá. Ka naʻe ʻikai ke na haʻu ke kai ʻi he fuá.
Naʻe mamata leva ʻa Līhai ki ha hala naʻe ʻi ai ha vaʻa ukamea naʻe fakatau ki he fuʻu ʻakaú. Naʻá ne mamata ki ha kakai tokolahi ʻoku nau lue mai ʻi he halá. Fakafokifā pē kuo hoko mai ha fakapoʻuli matolu. Naʻe faingataʻa ke sio ʻi he fakapoʻulí. Ko e founga pē ke aʻu ai ki he fuʻu ʻakaú ko e piki ki he vaʻa ukameá.
Naʻe mavahe ha kakai ʻe niʻihi mei he halá ʻo hē. Naʻe piki ha niʻihi ki he vaʻa ukameá pea nau laka atu ki muʻa.
ʻI heʻenau aʻu ki he fuʻu ʻakaú, naʻa nau kai ʻa e fuá.
Naʻe sio hake ʻa Līhai ʻo ne mamata ki ha fuʻu fale lahi naʻe fonu ʻi ha kakai tokolahi. Naʻa nau fakakata ʻaki ʻa e kakai naʻa nau kai ʻa e fuá. Naʻe ongoʻi taʻefiemālie ha niʻihi ne nau kai ʻi he fuá ʻi he taimi naʻe kataʻi ai kinautolu ʻe he niʻihi kehé, ko ia ai naʻa nau mavahe mei he fuʻu ʻakaú. Naʻa nau mavahe atu ʻo hē.
Naʻe mamata ʻa Līhai ʻi heʻene misí ki ha kakai tokolahi ange naʻa nau piki maʻu ki he vaʻa ukameá. Naʻa nau laka atu ki muʻa kae ʻoua kuo nau aʻu ki he fuʻu ʻakaú. Naʻa nau tūʻulutui leva ʻi he fuʻu ʻakaú ʻo kai ʻa e fuá. Naʻe ʻikai ke nau fanongo ki he kakai ʻi he falé. Naʻa nau fili ke nofo pē ʻi he fuʻu ʻakaú.
ʻI he ʻā hake ʻa Līhaí, naʻá ne hohaʻa kia Leimana mo Lēmiuela. Naʻe ʻikai ke na kai ʻi he fuá ʻi heʻene misí. Naʻe ʻofa ʻa Līhai ʻia Leimana mo Lēmiuela. Naʻá ne ʻamanaki te na nofo ofi ki he ʻEikí. Naʻá ne fakaafeʻi kinaua ke tauhi ʻa e ngaahi fekau ʻa e ʻOtuá.