“ʻĪnosi,” Ngaahi Talanoa ʻo e Tohi ʻa Molomoná (2023)
“ʻĪnosi,” Ngaahi Talanoa ʻo e Tohi ʻa Molomoná
ʻĪnosi
Ko ha lotu lahi ki he ʻEikí
Naʻe ʻoange ʻe Sēkope ʻa e ʻū lauʻi peletí ki hono foha ko ʻĪnosí. Naʻe tohi ʻa ʻĪnosi ʻi he ʻū lauʻi peletí ʻo hangē ko ia naʻe fai ʻe Sēkopé. ʻI ha ʻaho ʻe taha, naʻe ʻalu ʻa ʻĪnosi ʻo tuli manu ʻi he vaotaá. Naʻá ne manatuʻi ʻa e meʻa naʻe akoʻi ʻe heʻene tamaí fekauʻaki mo e ʻEikí. Naʻe akoʻi ʻe Sēkope kia ʻĪnosi te ne maʻu ʻa e fiefiá ʻi heʻene muimui ki he ʻEikí.
Naʻe fiemaʻu ʻe ʻĪnosi ke ne ongoʻi ʻa e fiefia naʻe lea ki ai ʻene tamaí. Naʻá ne fakakaukau ke lotu ki he ʻEikí. Naʻá ne lotu ʻi he ʻahó kakato ʻo aʻu ki he poʻulí.
Naʻe folofola ʻa e ʻEikí kia ʻĪnosi kuo fakamolemoleʻi ʻene ngaahi angahalá. Naʻe ongoʻi fiefia lahi ʻa ʻĪnosi. Naʻe tāpuekina ʻa ʻĪnosi koeʻuhí ko ʻene tui kia Sīsū Kalaisí.
Naʻe loto foki ʻa ʻĪnosi ke ongoʻi ʻe he kau Nīfaí ʻa e fiefia ko ʻení. Naʻe hokohoko atu pē ʻene lotú. Naʻá ne kole ki he ʻEikí ke ongoʻi ʻe he kau Nīfaí ʻa e fiefia tatau.
Naʻe folofola ʻa e ʻEikí kia ʻĪnosi te Ne ʻafio ʻi he kau Nīfaí kapau te nau tauhi ʻEne ngaahi fekaú. ʻI he fanongo ʻa ʻĪnosi ki he meʻá ni, naʻe fakaʻau ʻo mālohi ange ʻene tui ki he ʻEikí.
Naʻe toe lotu ʻa ʻĪnosi. Naʻá ne kole ki he ʻEikí ke tāpuakiʻi ʻa e kau Leimaná pea mo maluʻi ʻa e tohi ʻi he ʻū lauʻi peletí. Naʻá ne fakaʻamu ke lava ʻe he kau Leimaná ʻo lau ʻa e ʻū lauʻi peletí pea tui ki he ʻEikí. Naʻe talaʻofa ʻe he ʻEikí kia ʻĪnosi ʻe lau ʻe he kau Leimaná ʻa e ngaahi tohí ʻi ha ʻaho.