“Tuʻi ko Penisimaní,” Ngaahi Talanoa ʻo e Tohi ʻa Molomoná (2023)
Tuʻi ko Penisimaní
Tokoni ki he kakaí mo e ʻOtuá
Naʻe hoko ʻa e Tuʻi ko Penisimaní ko ha palōfita ʻa e ʻOtuá naʻá ne puleʻi ʻa e fonua ko Seilahemalá. Naʻá ne ngāue mālohi ke tokoni ki hono kakaí mo akoʻi kinautolu fekauʻaki mo e ʻOtuá. ʻI he tokoni ʻa e kau palōfita kehe ʻa e ʻOtuá, naʻe ngaohi ai ʻe Penisimani ʻa Seilahemala ke hoko ko ha feituʻu nonga mo malu ke nofo ai.
Ngaahi Lea ʻa Molomona 1:17–18; Mōsaia 1:1–7
Naʻe fakaʻau ʻo motuʻa ʻa Penisimani. Naʻá ne kole ki hono foha ko Mōsaiá ke fakatahatahaʻi mai ʻa e kakaí. Naʻe loto ʻa Penisimani ke talaange kiate kinautolu ʻe hoko ʻa Mōsaia ko honau tuʻi foʻoú.
Naʻe omi ʻa e kakaí mei he tapa kotoa pē ʻo e fonuá. Naʻa nau fokotuʻu honau ngaahi fale fehikitakí ʻo ofi ki he temipalé ke nau fanongo kia Penisimani.
Naʻe lea ʻa Penisimani mei ha taua koeʻuhí ke lava ha kakai tokolahi ʻo fanongo kiate ia. Naʻe pehē ʻe Penisimani naʻe tokoniʻi ia ʻe he ʻOtuá ke ne tataki kinautolu. ʻI heʻene hoko ko e tuʻí, naʻá ne akoʻi kinautolu ke talangofua ki he ngaahi fekau ʻa e ʻOtuá. Naʻe ʻikai ke ne toʻo ʻenau paʻangá pe ʻai ke nau ngāue maʻana. Ka naʻá ne ngāue ke tokoni ki hono kakaí mo e ʻOtuá.
Naʻe fakahā ʻe Penisimani ki he kakaí ko e taimi ʻoku nau fetokoniʻaki aí, ʻoku nau tauhi ai foki ki he ʻOtuá. Naʻá ne talaange leva ko e meʻa kotoa pē naʻa nau maʻú naʻe mei he ʻOtuá ia. Ko hono olá, naʻe finangalo ʻa e ʻOtuá ke nau talangofua ki Heʻene ngaahi fekaú. ʻI heʻenau talangofuá, naʻe foaki ange ʻe he ʻOtuá ha ngaahi tāpuaki lahi.
Naʻe fakahā ange ʻa Penisimani he ʻikai te ne toe hoko ko honau tuʻi pe faiako. ʻE hoko hono foha ko Mōsaiá ko honau tuʻi foʻou.
Naʻe talaange leva ʻe Penisimani ki hono kakaí naʻe ʻaʻahi ange ha ʻāngelo kiate ia. Naʻe pehē ʻe he ʻāngeló ʻe hāʻele mai ki māmani ʻa e ʻAlo ʻo e ʻOtuá, ʻa Sīsū Kalaisi. Te Ne fakahoko ha ngaahi mana mo fakamoʻui ʻa e kakaí. Te Ne mamahi pea te Ne pekia ke fakahaofi ʻa e kakai kotoa pē. Naʻe akoʻi ʻe Penisimani ʻe fakamolemoleʻi ʻe Sīsū ʻa kinautolu kotoa pē ʻoku tui kiate Ia pea fakatomalá.
Naʻe tui ʻa e kakaí ki he meʻa naʻe akoʻi ange ʻe Penisimani fekauʻaki mo Sīsuú. Naʻa nau ʻiloʻi naʻe fiemaʻu ke nau fakatomala. Naʻe lotu kotoa ʻa e kakaí ʻo kole ki he ʻOtuá ke fakamolemoleʻi kinautolu. Hili ʻenau lotú, naʻe nofoʻia kinautolu ʻe he Laumālie ʻo e ʻOtuá. Naʻa nau ongoʻi fiefia mo ʻiloʻi naʻe fakamolemoleʻi kinautolu ʻe he ʻOtuá koeʻuhí ko ʻenau tui kia Sīsuú.
Naʻe ongoʻi ʻe he kakaí ʻoku kehe mo foʻou honau lotó koeʻuhí ko ʻenau tui kia Sīsuú. Naʻa nau loto ʻeni ke failelei ʻi he taimi kotoa pē. Naʻa nau palōmesi ke muimui ki he ngaahi fekau ʻa e ʻOtuá ʻi he toenga ʻo ʻenau moʻuí. Koeʻuhí ko ʻenau tui kia Sīsū mo fai ʻa e palōmesi ko ʻení, naʻe ui ai kinautolu ko e kakai ʻo Sīsuú.