“ʻĀpisi,” Ngaahi Talanoa ʻo e Tohi ʻa Molomoná (2023)
ʻĀpisi
Tokoniʻi hono kakaí ke nau tui kia Sīsū
Naʻe ngāue ʻa ʻĀpisi ki ha kuini ko ha taha Leimana. Naʻe ʻosi ʻilo ʻa ʻĀpisi kia Sīsū Kalaisi mei ha mata meʻa-hā-mai ʻa ʻene tamaí. ʻI ha ngaahi taʻu lahi, naʻe tui kia Sīsū mo fie muimui kiate Ia. Ka naʻe teʻeki ai ke ne fakahā ia ki he kau Leimana kehé.
ʻI ha ʻaho ʻe taha, naʻe haʻu ha taha Nīfai ki he puleʻangá ke akoʻi ʻa e kau Leimaná kau kia Sīsū mo e ʻOtuá. Naʻe tui ʻa e kuiní mo e tuʻí ki he meʻa naʻe akoʻi ʻe ʻĀmoní. Naʻe ʻiloʻi ʻe he kuiní mo e tuʻí ʻe hāʻele mai ʻa Sīsū ki māmani pea ʻai ke lava ʻo fakamolemoleʻi ʻa e tokotaha kotoa pē ʻoku tui kiate Iá.
ʻAlamā 17:12–13; 18:33–36, 39–40; 19:9, 13
Naʻe ongoʻi ʻe he kuiní mo e tuʻí ʻa e Laumālie Māʻoniʻoní pea naʻá na fuʻu fiefia ʻo na tō ki he kelekelé. Naʻe tō foki mo ʻĀmoni mo e kau tamaioʻeikí. Ko ʻĀpisi pē naʻe kei tuʻú.
Naʻe fie talaange ʻe ʻĀpisi ki he kakaí ʻa e mana ko ʻení. Naʻá ne fakaʻamu ʻe tui ʻa e kakaí ki he mālohi ʻo e ʻOtuá ʻi heʻenau mamata ki he meʻa kuo hokó. Ko ia naʻe lele ai ʻa ʻĀpisi mei he fale ki he fale. Naʻá ne tala ki he kakaí ke nau ō ʻo mamata ki he meʻa kuo fai ʻe he ʻOtuá ki he kuiní mo e tuʻí.
Naʻe omi ha kakai tokolahi ki he fale ʻo e kuiní mo e tuʻí. Naʻa nau ʻohovale he naʻe hangē kuo mate kotoa ʻa e kuiní, tuʻí, mo ʻena kau tamaioʻeikí.
Naʻe puputuʻu ʻa e kakaí. Naʻa nau fakakikihi fekauʻaki mo e meʻa kuo hoko ki he kuiní mo e tuʻí.
ʻI he taimi naʻe foki mai ai ʻa ʻĀpisí, naʻe sio ki he fakakikihi ʻa e kakaí. Naʻe loto-mamahi he naʻe ʻikai ke nau mamata ki he mālohi ʻo e ʻOtuá. Peá ne puke leva ʻa e kuiní ʻi hono nimá, pea tuʻu hake ʻa e kuiní ʻo fakahīkihikiʻi ʻa Sīsū.
Naʻe puke ʻe he kuiní ʻa e nima ʻo hono husepānití, pea naʻá ne tuʻu hake. Naʻe fakamatala ʻe he tuʻí ki he kakaí fekauʻaki mo Sīsū. Pea tuʻu hake leva ʻa ʻĀmoni mo e kau tamaioʻeiki kehé. Naʻa nau fakahā kotoa ki he kakaí kuo liliu kinautolu ʻe Sīsū. Kuo nau fiemaʻu ʻeni ke fai pē ʻa e ngaahi meʻa ʻoku leleí. Naʻe tui ha kakai tokolahi kiate kinautolu.
Hangē ko e ʻamanaki ʻa ʻĀpisí, naʻe mamata ʻa e kakaí ki he mālohi ʻo e ʻOtuá. Naʻe tui ha kakai tokolahi kia Sīsū pea naʻe papitaiso kinautolu. Naʻa nau maʻu ʻa e Laumālie ʻo e ʻOtuá. Naʻe aʻu ʻo nau fokotuʻu ʻa e Siasí ʻi honau fonuá. Naʻa nau ʻiloʻi ʻoku tokoniʻi ʻe Sīsū ha taha pē ʻoku fakatomala mo tui kiate Ia.