ʻAlamā 23–27

Kau ʻAnitai-Nīfai-Līhaí

Kakai naʻa nau fili ke ʻofa ʻi honau ngaahi filí

ʻOku akoʻi ʻe ʻĀmoni ha kakai ʻi ha lalo ʻakau

Naʻe ʻilo ha kau Leimana tokolahi kau ki he ʻOtuá meia ʻĀmoni mo hono ngaahi tokouá. Naʻe tui mālohi ʻa e kau Leimaná ni ki he ʻEikí mo muimui ki he ngaahi fekau ʻa e ʻOtuá. Naʻa nau fiemaʻu ha hingoa foʻou, ko ia naʻa nau ui kinautolu ko e kau ʻAnitai-Nīfai-Līhai kae ʻikai ko e kau Leimana.

ʻAlamā 23:3–7, 16–17

Ngaahi fāmili ʻoku nau fanongo ki he akonaki ʻa ʻĀmoní

Naʻe liliu ʻa e kau ʻAnitai-Nīfai-Līhaí koeʻuhí ko ʻenau tui ki he ʻOtuá. Naʻa nau fakatomala mei he ngaahi meʻa kovi naʻa nau faʻa faí. Naʻa nau ʻiloʻi naʻe ʻofa ʻa e ʻOtuá ʻiate kinautolu pea mo fakamolemoleʻi kinautolu.

‘Alamā 24:8–14

ʻOku laku ʻe he kau ʻAnitai-Nīfai-Līhaí ʻa e ngaahi meʻataú ki ha fuʻu luo

Naʻe ʻita ʻa e kau Leimaná pea nau teuteu ke ʻohofi ʻa e kau ʻAnitai-Nīfai-Līhaí. Naʻe ʻikai ke nau tau, ka naʻe fai ʻe he kau ʻAnitai-Nīfai-Līhaí ha palōmesi ki he ʻOtuá. Naʻa nau pehē he ʻikai ke nau teitei toe fakamamahiʻi ʻa e kakaí. Naʻa nau tanu ʻenau ngaahi meʻataú ke fakahaaʻi ʻeni. Naʻa nau fili ke ʻofa ki honau ngaahi filí kae ʻikai fakamamahiʻi pe tamateʻi kinautolu.

ʻAlamā 24:1–19; 26:31–34

Ko ha taha Leimana ʻoku ʻita ʻokú ne puke ha meʻatau

Naʻe ʻohofi ʻe he kau Leimana naʻe ʻikai tui ki he ʻOtuá ʻa e kau ʻAnitai-Nīfai-Līhaí.

ʻAlamā 24:20

Ko ha ongo ʻAnitai-Nīfai-Līhai ʻokú na tūʻulutui ʻo lotu

Naʻe tui ʻa e kau ʻAnitai-Nīfai-Līhaí kapau ʻe tāmateʻi kinautolu, te nau nofo mo e ʻOtuá. Naʻa nau tauhi ʻenau palōmesi ki he ʻOtuá pea ʻikai ke nau tau mo e kau Leimaná.

ʻAlamā 24:16, 21

Tuku e ʻoho ʻa e kau Leimaná

Naʻe lotu ʻa e kau ʻAnitai-Nīfai-Līhaí kae ʻikai ke nau tau. ʻI he taimi naʻe mamata ai ʻa e kau Leimaná ki he meʻa ko ʻení, ko hanau tokolahi naʻe tuku ʻenau ʻohofí. Naʻa nau ongoʻi halaia ʻi hono tāmateʻi ʻo e kakaí. Naʻe toe fili foki mo e kau Leimana ko iá ke ʻoua naʻa nau toe fakamamahiʻi ʻa e kakaí. Naʻa nau kau fakataha mo e kau ʻAnitai-Nīfai-Līhaí.

ʻAlamā 24:21–27; 25:13–16

Fononga ʻa ʻĀmoni mo e kau ʻAnitai-Nīfai-Līhaí

ʻI he fakalau ʻa e taimí, naʻe tokolahi ange ʻa e kakai naʻe ʻohofí. Naʻe loto-mamahi ʻa ʻĀmoni mo hono ngaahi tokouá ʻi he faingataʻaʻia ʻa e kau ʻAnitai-Nīfai-Līhaí. Naʻa nau kole ki he tuʻí ke ʻave hono kakaí ke nau nofo mo e kau Nīfaí. Naʻe pehē ʻe he tuʻí ʻe lava ke nau ō kapau ʻoku finangalo ʻa e ʻEikí ke nau fai ia. Naʻe lotu ʻa ‘Āmoni. Naʻe folofola ʻa e ʻEikí ʻoku totonu ke nau ō pea te Ne maluʻi kinautolu.

ʻAlamā 27:2–15

Ko e talitali ʻe he kau Nīfaí ʻa e kau ʻAnitai-Nīfai-Līhaí

Naʻe foaki ʻe he kau Nīfaí ki he kau ʻAnitai-Nīfai-Līhaí ha fonua ke nau nofo ai pea mo maluʻi kinautolu. ʻI he tafaʻaki ʻe tahá, naʻe foaki ʻe he kau ʻAnitai-Nīfai-Līhaí ha meʻakai ki he kau Nīfaí. Naʻe maʻu ʻe he kau ʻAnitai-Nīfai-Līhaí ha tui lahi mo ha ʻofa ki he ʻOtuá. Naʻa nau faitotonu ki he tokotaha kotoa pea mo tauhi ʻenau palōmesi he ʻikai ke nau toe taú. Naʻa nau faivelenga ʻi he kotoa ʻo ʻenau moʻuí.

ʻAlamā 27:20–30