“ʻAlamā ko e Siʻi,” Ngaahi Talanoa ʻo e Tohi ʻa Molomoná (2023)
“ʻAlamā ko e Siʻi,” Ngaahi Talanoa ʻo e Tohi ʻa Molomoná
ʻAlamā ko e Siʻi
Ko ha fuʻu liliu lahi
Naʻe foaki ʻe he Tuʻi ko Mōsaiá kia ʻAlamā ʻa e mālohi ke tataki ʻa e Siasí ʻi Seilahemala. Naʻe akoʻi ʻe ʻAlamā ʻa e kakaí ke fakatomala mo tui ki he ʻEikí.
Naʻe ʻi ai ha foha ʻo ʻAlamā naʻe ui foki ko ʻAlamā. Naʻe ʻikai ke tui ʻa ʻAlamā ko e Siʻi ki he meʻa naʻe akoʻi ʻe heʻene tamaí.
Naʻe ʻi ai foki mo ha ngaahi foha ʻo Mōsaia naʻe ʻikai ke nau tui ki he ʻEikí. Naʻa nau kaungāmeʻa mo ʻAlamā ko e Siʻi. Naʻa nau loto kotoa ke mavahe ʻa e kakaí mei he Siasí. Naʻe tataki ʻe ʻAlamā mo e ngaahi foha ʻo Mōsaiá ha kakai tokolahi ke fai ha ngaahi meʻa naʻe fepaki mo e ngaahi fekau ʻa e ʻOtuá.
ʻI ha ʻaho ʻe taha, naʻe fekauʻi mai ʻe he ʻEikí ha ʻāngelo ke taʻofi kinautolu. Naʻe talaange ʻe he ʻāngeló ke tuku ʻenau feinga ke fakaʻauha ʻa e Siasí. Naʻe ilifia ʻaupito ʻa ʻAlamā mo e ngaahi foha ʻo Mōsaiá ʻo nau tō ai ki he kelekelé.
Mōsaia 27:11–18; ʻAlamā 36:6–9
Naʻe ʻikai lava ʻa ʻAlamā ʻo lea pe ngaue ʻi ha ʻaho ʻe tolu mo ha pō ʻe tolu. Naʻá ne ongoʻi loto-mamahi ʻaupito koeʻuhí ko e ngaahi meʻa hala kotoa pē kuó ne faí. Naʻá ne hohaʻa foki koeʻuhí he naʻá ne taki ha kakai tokolahi ke nau tafoki mei he ʻEikí.
Naʻe loto-mamahi lahi ʻa ʻAlamā koeʻuhí ko ʻene ngaahi angahalá. Naʻá ne manatuʻi leva ʻa e talanoa ʻene tamaí fekauʻaki mo Sīsū Kalaisi, ko e ʻAlo ʻo e ʻOtuá.
Naʻe lotu ʻa ʻAlamā kia Sīsū ke fakamolemoleʻi ia. Hili ʻene lotú, naʻe ʻikai ke ne lava ʻo manatuʻi ʻene mamahí. Naʻá ne ʻiloʻi kuo fakamolemoleʻi ia ʻe he ʻEikí. Naʻe ʻikai ke ne toe ongoʻi loto-mamahi ʻi heʻene ngaahi angahalá. Ka naʻe ongoʻi fiefia ʻaupito ʻa ʻAlamā.
Mōsaia 27:24, 28–29; ʻAlamā 36:18–22
Naʻe toe maʻu ʻe ʻAlamā hono mālohí. Naʻá ne fakakaukau mo e ngaahi foha ʻo Mōsaiá ke nau fakatomala pea feinga ke fakaleleiʻi ʻa e mamahi kotoa naʻa nau fakatupú. Naʻa nau tauhi ki he ʻEikí mei he taimi ko iá ʻo fai atu ʻaki ʻenau tokoniʻi ʻa e niʻihi kehé ke fakatomala. Naʻa nau fononga ʻi he fonua naʻe puleʻi ʻe Mōsaiá pea akoʻi ʻa e kakaí fekauʻaki mo Sīsū.
Mōsaia 27:20–24, 32–37; ʻAlamā 36:23–26
Naʻe loto ʻa ʻAlamā mo e ngaahi foha ʻo Mōsaiá ke nau vahevahe ʻa e fiefia naʻe ʻomi ʻe he ngaahi akonaki ʻa Sīsuú ki heʻenau moʻuí. Naʻa nau ngāue mālohi ke tokoni ki he ʻEikí mo e kakaí. Naʻe fili ʻa e ngaahi foha ʻo Mōsaiá ke nau mavahe ʻo akoʻi ʻa e kau Leimaná fekauʻaki mo Sīsū. Naʻe fili ʻa ʻAlamā ke nofo pē ʻo akoʻi ʻa e kau Nīfaí.