“Ko ha Matangi ʻi he Tahí,” Ngaahi Talanoa ʻo e Tohi ʻa Molomoná (2023)
“Ko ha Matangi ʻi he Tahí,” Ngaahi Talanoa ʻo e Tohi ʻa Molomoná
Ko ha Matangi ʻi he Tahí
Ko e maʻu ha nonga ʻi he ʻEikí
Naʻe folofola ʻa e ʻEikí kia Līhai kuo taimi ke heka ki he vaká. Naʻe faʻo ʻe he ngaahi fāmilí ha meʻakai lahi ke nau kai lolotonga ʻenau folaú. Naʻa nau heka kotoa leva ki he vaká ʻo folau atu ki he fonua ʻo e talaʻofá.
Hili ha ngaahi ʻaho lahi ʻi tahi, naʻe kamata ke anga taʻe-fakaʻapaʻapa mo angakovi ha kakai ʻe niʻihi. Naʻe ngalo ʻiate kinautolu naʻe tokoniʻi kinautolu ʻe he ʻEikí.
Naʻe hohaʻa ʻa Nīfai naʻa nau fakatupu houhau ki he ʻEikí. Kapau he ʻikai tokoni ʻa e ʻEikí, he ʻikai malu honau vaká. Naʻe kole ʻe Nīfai ki hono ngaahi tokouá ke tuku.
Naʻe ʻita ʻa Leimana mo Lēmiuela kia Nīfai. Naʻá na haʻi ia pea anga taʻeʻofa kiate ia. Naʻe ʻikai ke na talangofua ki he ʻEikí, pea naʻe ʻikai toe ngāue ʻa e Liahoná. Naʻe ʻikai fuoloa kuo tō ha matangi. Hili ha ʻaho ʻe tolu ʻo e matangí, naʻa nau ilifia kotoa pē naʻa nau melemo.
Naʻe kole ʻe he fāmili ʻo Nīfaí kia Leimana mo Lēmiuela ke na tukuange ʻa Nīfai. Ka naʻe ʻikai pē tuku ʻe Leimana mo Lēmiuela ke vete ʻe ha taha ʻa e ngaahi haʻi ʻo Nīfaí. Naʻe loto-mamahi ʻa Selaia mo Līhai pea naʻá na puke lahi ʻaupito. Naʻe ʻikai nonga ʻa e matangí.
ʻI he ʻaho hono faá, naʻe ʻiloʻi ʻe Leimana mo Lēmiuela ʻe ngoto ʻa e vaká. Naʻá na fakatomala pea tukuange ʻa Nīfai. ʻI he taimi naʻe lotu ai ʻa Nīfaí, naʻe tuʻu ʻa e matangí. Naʻe toe ngāue ʻa e Liahoná. Naʻe fakaʻaongaʻi ia ʻe Nīfai ke fakatonutonu ʻa e vaká ki he halanga totonú.
Hili ha ngaahi ʻaho lahi, naʻe aʻu ʻa e ngaahi fāmilí ki he fonua ʻo e talaʻofá.