“Mōsaia mo Sēnifi,” Ngaahi Talanoa ʻo e Tohi ʻa Molomoná (2023)
Mōsaia mo Sēnifi
Maluʻi ʻe he ʻEikí
Naʻe lahi ʻa e ngaahi tau ʻa e kau Nīfaí mo e kau Leimaná. ʻI ha ʻaho ʻe taha, naʻe folofola ʻa e ʻEikí ki ha tangata Nīfai ko Mōsaia ke mavahe mei he fonua ko Nīfaí mo ha taha pē ʻe muimui ki he ʻEikí.
Naʻe talangofua ha kau Nīfai tokolahi ki he ʻEikí pea nau mavahe mo Mōsaia. Naʻe tataki kinautolu ʻe he ʻEikí ki ha fonua naʻe nofo ai ha kakai. Naʻe ui ʻa kinautolu ko e kakai ʻo Seilahemalá.
Naʻe haʻu foki mo e kakai ʻo Seilahemalá mei Selusalema ʻi he kuonga muʻá. Naʻa nau fiefia ʻi hono ʻomi ʻe he ʻEikí ʻa e kau Nīfaí mo e ʻū lauʻi peleti palasá. Naʻe kau fakataha ʻa e kakai ʻo Mōsaiá mo e kakai ʻo Seilahemalá. Naʻe fili ʻe he kakaí kotoa ʻa Mōsaia ke hoko ko honau tuʻi. Naʻá ne akoʻi kinautolu fekauʻaki mo e ʻEikí.
Naʻe nofo ʻa e kau Nīfaí ʻi Seilahemala ʻi ha kiʻi vahaʻantaimi pea naʻe toe foki ha kulupu tokolahi ki he fonua ko Nīfaí. Naʻe taki kinautolu ʻe ha tangata Nīfai ko Sēnifi.
Kuo nofo ʻeni ʻa e kau Leimaná ʻi he fonua ko Nīfaí, ko ia naʻe kole ange ʻe Sēnifi ki honau tuʻí pe ʻe lava ke nau nofo ai mo hono kakaí. Naʻe loto ʻa e tuʻí ki ai.
Naʻe kākaaʻi ʻe he tuʻí ʻa Sēnifi mo hono kakaí. Naʻá ne tuku ke nau nofo ʻi he fonua ko Nīfaí koeʻuhí ke ne lava ʻo ʻave ha konga ʻo ʻenau meʻakaí mo e fanga monumanú ʻamui ange. Naʻe nofo melino ai ʻa e kakai ʻo Sēnifí ʻi ha ngaahi taʻu lahi. Naʻa nau tō ha meʻakai lahi pea lahi mo ʻenau fanga monumanú. Naʻe ʻohofi leva ʻe he kau Leimaná kinautolu mo feinga ke ʻave ʻenau meʻakaí mo e fanga monumanú.
Naʻe akoʻi ʻe Sēnifi hono kakaí ke falala ki he ʻEikí. ʻI he haʻu ʻa e kau Leimaná ke tauʻi kinautolú, naʻe lotu ʻa Sēnifi mo hono kakaí ki he ʻEikí. Naʻe foaki ange ʻe he ʻEikí ha mālohi mo tokoni ke maluʻi kinautolu. Naʻa nau lava ʻo tuli ʻa e kau Leimaná. Naʻe tāpuakiʻi ʻe he ʻEikí ʻa Sēnifi mo hono kakaí koeʻuhí ko ʻenau tuí.