“ʻAlamā mo Hono Kakaí,” Ngaahi Talanoa ʻo e Tohi ʻa Molomoná (2023)
Ko ʻAlamā mo Hono Kakaí
Ivi mei he ʻOtuá ‘i he lolotonga ‘o e taimi faingataʻá
Naʻe nofo ʻa ʻAlamā mo hono kakaí ʻi ha fonua fakaʻofoʻofa. Naʻa nau tō ha ngaahi tengaʻi ʻakau mo langa ha ngaahi ʻapi. Ko ʻAlamaá ko ha taulaʻeiki ia ʻa e ʻOtuá. Naʻá ne akoʻi hono kakaí ke nau feʻofaʻaki. Naʻe fanongo ʻa e kakaí kia ʻAlamā mo tauhi e ngaahi fekau ʻa e ʻOtuá. Naʻe tupulaki honau ngaahi fāmilí, pea naʻa nau langa ha kolo.
ʻI ha ʻaho ʻe taha, naʻe haʻu ha kau tau ʻa e kau Leimaná. Naʻa nau hē. Naʻe palōmesi ʻa e kau Leimaná ke tukunoaʻi ʻa e kakai ʻo ʻAlamaá kapau te nau tokoni ange ke ʻilo honau hala foki ki ʻapí. Naʻe fakahinohino ange ʻe ʻAlamā ki he kau Leimaná ʻa e founga ke nau foki ai ki honau fonuá.
Naʻe ʻikai ke tauhi ʻe he kau Leimaná ʻa ʻenau palōmesí. Ka naʻa nau puleʻi ʻa e fonuá pea ʻi ai mo ha kau leʻo ke leʻohi ʻa ʻAlamā mo hono kakaí. Naʻa nau toe fokotuʻu foki ha tangata Nīfai ko ʻAmulone ko ha tuʻi ki he kakai ʻo ʻAlamaá. Ko ʻAmuloné ko e taki ia ʻo e kau taulaʻeiki kākaá. Naʻá ne tāmateʻi mo ʻene kau taulaʻeikí ha palōfita ʻa e ʻOtuá pea fai ha ngaahi meʻa lahi naʻe kovi.
Mōsaia 17:12–13; 23:31–32, 37–39; 24:9
Naʻe ʻita ʻa ʻAmulone ʻia ʻAlamā. Naʻá ne ʻai ʻa e kakai ʻo ʻAlamaá ke nau ngāue lahi ʻaupito pea naʻe angakovi kiate kinautolu. Naʻe faingataʻa ki he kakai ʻo ʻAlamaá.
Naʻa nau lotu ki he ʻOtuá ki ha tokoni. Naʻe talaange ʻe ʻAmulone ke tuku ʻenau lotú. Naʻá ne pehē ko ha taha pē ʻe lotu ʻe tāmateʻi.
Naʻe taʻofi ʻe ʻAlamā mo hono kakaí ʻenau lotu leʻo lahí. Ka, naʻa nau lotu ʻi honau lotó. Naʻe ongoʻi ʻe he ʻOtuá ʻenau ngaahi lotú. Naʻá Ne fakafiemālieʻi kinautolu mo palōmesi ʻe tokoniʻi kinautolu ke nau hola. Naʻe ʻai ʻe he ʻOtuá ke faingofua ange ʻenau ngāue lahí. Naʻe faʻa kātaki mo fiefia ʻa e kakaí ʻi heʻenau fanongo ki he ʻOtuá. Naʻa nau ʻiloʻi naʻá Ne tokoniʻi kinautolu.
Naʻe falala ʻa e kakai ʻo ʻAlamaá ki he ʻOtuá pea mo nau tui lahi kiate Ia. ʻI ha ʻaho ʻe taha, naʻe folofola ange ʻa e ʻOtuá kuo taimi ke nau mavahe. ʻI he pō ko iá, naʻe teuteu ʻa ʻAlamā mo hono kakaí. Naʻa nau tānaki kotoa ʻenau fanga monumanú mo ha meʻakai. ʻI he pongipongí, naʻe ʻai ʻe he ʻOtuá ʻa e kau Leimaná ke nau mohe maʻu. Pea naʻe hola leva ʻa ʻAlamā mo hono kakaí ʻo fononga ʻi he ʻahó kakato.
ʻI he pō ko iá, naʻe fakafetaʻi ʻa e kakai tangata, kakai fefine, mo e fānau kotoa pē ki he ʻOtuá. Naʻa nau ʻiloʻi ko e ʻOtuá pē taha naʻá Ne lava ʻo tokoniʻi kinautolú. Naʻe hoko atu ʻenau fonongá ʻi ha ngaahi ʻaho lahi, ki he fonua ko Seilahemalá. Naʻe talitali lelei kinautolu ʻe he kau Nīfaí, pea naʻe akoʻi ʻe ʻAlamā ʻa e tokotaha kotoa kau ki he tui kia Sīsū Kalaisí. Naʻe tui ha kakai tokolahi pea naʻe papitaiso.