Hilamani 3–6

Ko e Ongo Tautehina ko Nīfai mo Līhaí

Fanongo ki ha leʻo mei he langí

ko e akoʻi ʻe he ongo tautehina ko Nīfai mo Līhaí ʻa e kakaí, ka ʻoku ofi mai ha kau tau ʻa e kau Leimaná

Ko ha ongo tautehina ʻa Nīfai mo Līhai naʻá na fiemaʻu ʻa e taha kotoa ke nau ʻilo ki he ongoongolelei ʻo Sīsū Kalaisí. Naʻe tau ʻa e kau Nīfaí mo e kau Leimaná, ka naʻe kei akoʻi pē ʻe he ongo tautehiná ʻa e kakai mei he ongo kulupú fakatouʻosi. ʻI ha ʻaho ʻe taha, ʻi heʻena fononga ke akoʻi ʻa e kakaí, naʻe haʻu ha kau tau Leimana ʻo fakahū pōpula kinaua.

Hilamani 3:20–21, 37; 4:4–5, 14; 5:4–21

Ko e kau tau Leimaná ʻoku nau laka ki he pilīsone ʻoku ʻi ai ʻa Nīfai mo Līhaí.

ʻOsi ha ngaahi ʻaho lahi mei ai, naʻe ōmai ʻa e kau taú ki he pilīsoné ke fakapoongi ʻa Nīfai mo Līhai.

Hilamani 5:22

ʻoku maluʻi ʻe ha afi mo ha maama fuopotopoto ʻa Nīfai mo Līhai, tō ʻa e kau sōtiá ki lalo, pea ʻasi mai ha ʻao fakapoʻuli

Kimuʻa pea lava ha taha ʻo fakamamahiʻi ʻa Nīfai mo Līhaí, naʻe ʻasi takai ha afi ʻo takatakai ʻiate kinaua. Naʻe ʻikai ke na vela ʻi he afí. Ka, naʻe maluʻi kinaua ʻe he ʻOtuá. Pea ngalulululu ʻa e kelekelé. Naʻe hangē ʻe holo ʻa e ngaahi holisi ʻo e fale fakapōpulá. ʻIkai fuoloa, kuo kāpui ʻe ha ʻao fakapoʻuli ʻa e taha kotoa ʻi he fale fakapōpulá. Naʻe mātuʻaki ilifia ʻaupito ʻa e kakaí.

Hilamani 5:23–28

kakai ʻoku tuʻu ʻi ha ʻao fakapoʻulí ʻo sio ki ha huelo ʻo ha maama

Naʻe ongo mai ha leʻo mei ʻolunga ʻi he ʻao fakapoʻulí. Naʻe lōngonoa, ʻo hangē ha fanafaná, ka naʻe ongoʻi ia ʻe he kakaí ʻi honau lotó. Ko e leʻo ia ʻo e ʻOtuá. Naʻe folofola ange ʻa e ʻOtuá ke nau fakatomala.

Hilamani 5:29–30, 46–47

kau tangata mo fafine ʻoku hanga hake ʻi he mavaeua ʻa e ngaahi ʻao fakapoʻulí

Naʻe ngalulu lahi ange ʻa e kelekelé mo e fale fakapōpulá. Naʻe toe ongo mai e leʻó ʻo tala ki he kakaí ke nau fakatomala. Naʻe ʻikai ke lava ʻa e kakaí ʻo ngaue koeʻuhí ko e ʻaó pea mo ʻenau manavaheé.

Hilamani 5:31–34

ʻOku tuhu ʻa ʻAminatapi kia Nīfai mo Līhai ʻokú na ulo ngingila mo sio ki ʻolunga

Ko ha tangata ʻe taha ʻi he haʻofangá naʻe ui ko ʻAminatapi. Naʻe kau ʻi ha taimi ʻe taha ki he Siasi ʻo e ʻOtuá. Naʻá ne fakatokangaʻi ʻoku kamata ke maamangia ʻa e fofonga ʻo Nīfai mo Līhaí. Naʻá na fotu ʻo hangē ha ongo ʻāngeló. Naʻe hangē naʻá na talanoa ki ha taha ʻi he langí. Naʻe talaange ʻe ʻAminatapi ki he tokotaha kotoa ke nau sio kia Nīfai mo Līhai.

Hilamani 5:35–39

naʻe hanga hake ha kau tangata mo ha kau fafine tokolahi ʻi he ʻao fakapoʻulí mo lotu

Naʻe fehuʻi ʻe he kakaí kia ʻAminatapi ʻa e meʻa te nau lava ʻo fai ke tolona ai ʻa e ʻao fakapoʻulí. Naʻe fakamatala ʻe ʻAminatapi ʻa e meʻa naʻá ne ʻilo fekauʻaki mo e ʻOtuá mo Sīsuú. Naʻá ne tala ki he kakaí ke nau fakatomala, tui kia Sīsū, pea lotu ki he ʻOtuá. Naʻe fakafanongo ʻa e kakaí kia ʻAminatapi. Naʻa nau lotu kae ʻoua kuo tolona atu ʻa e fakapoʻulí.

Hilamani 5:40–42

kakai ʻoku lotu, lolotonga ʻoku ʻākilotoa kinautolu ʻe ha maama mo e afi

Naʻe ʻātakaiʻi ʻe he afi mei he ʻOtuá ʻa e kakaí kātoa pea naʻe ʻikai ke nau vela ai. Naʻe fakafonu ʻa e kakaí ʻaki ʻa e Laumālie Māʻoniʻoní pea naʻa nau fiefia ʻaupito. Naʻa nau lea ʻaki ha ngaahi meʻa fakaofo. Naʻe toe ongo mai ʻa e leʻó. Naʻá ne talaange ke nau maʻu ha fiemālie koeʻuhí ko ʻenau tui kia Sīsuú. Naʻe haʻu ha kau ʻāngelo ʻo ʻaʻahi mai ki he kakaí.

Hilamani 5:43–49

ʻOku mavahe ʻa Nīfai mo Līhai mei he fale fakapōpulá, kae mamata pē ʻa e kakaí

Naʻe mavahe ʻa Nīfai, Līhai, mo e kakai kotoa pē mei he fale fakapōpulá. Naʻa nau tala ki ha kakai tokolahi ʻi he funga ʻo e fonuá ʻa e meʻa naʻa nau mamata mo fanongo ki ai he ʻaho ko iá. Naʻe tui ha tokolahi ʻo e kau Leimaná pea mo fili ke muimui ʻia Sīsū. Naʻe tuku ʻenau fekeʻikeʻi ʻi he taú. Ka, naʻa nau tokoniʻi ʻa e kakaí ke nau tui kia Sīsū mo fakatomala.

Hilamani 5:50–52; 6:1–6