ʻAlamā 43–44

ʻEikitau ko Molonaí mo Seilahemena

Ko ha tau mo ha palōmesi ke nofo melino

Ko Seilahemená ko e taki ia ʻo e kau tau Leimaná. Naʻá ne loto ke puleʻi ʻa e kakai Nīfaí mo ʻai ke nau ngāue fakatamaioʻeiki ki hono kakaí. Naʻe taki ʻe Seilahemena ʻene kau taú ke ʻohofi ʻa e kau Nīfaí.

ʻAlamā 43:3–8

Naʻe fiemaʻu ʻe he kau Nīfaí ke maluʻi honau ngaahi ʻapí, fāmilí, mo e tui fakalotú. Naʻa nau ʻilo he ʻikai ke nau lava ʻo hū ki he ʻEikí kapau ʻe puleʻi kinautolu ʻe he kau Leimaná. Naʻe fili ʻa e kau Nīfaí ke tauʻi honau ngaahi filí.

ʻAlamā 43:9–109, 14–15

Ko ha tangata naʻe ui ko Molonai naʻe hoko ko e ʻeikitau ʻo e kau tau Nīfaí. Naʻe fakapapauʻi ʻe Molonai kuo mateuteu ʻene kau taú ke tau.

ʻAlamā 43:16–17

Naʻe ʻomai ʻe he kau sōtia ʻa Molonaí ha ngaahi meʻatau, pea ʻoange ʻe Molonai kiate kinautolu ha ngaahi teunga tau mālohi mo e pā ke maluʻi kinautolu.

ʻAlamā 43:18–19

Naʻe ʻave ʻe Molonai ʻene kau taú ke tauʻi ʻa e kau Leimaná. Ka ʻi he mamata ʻa e kau Leimaná naʻe tui ʻe he kau Nīfaí ha teunga tau mo e paá, naʻa nau ilifia ke tau. Naʻe tui ʻe he kau Leimaná ha vala manifi pē pea ʻikai ha teunga tau ke maluʻi kinautolu.

‘Alamā 43:19–21

Naʻe mavahe ʻa e kau Leimaná. Naʻa nau feinga ke hola ki ha fonua kehe ʻo e kau Nīfaí. Naʻa nau fakakaukau he ʻikai ʻilo ʻe Molonai ʻa e feituʻu naʻa nau ō ki aí.

ʻAlamā 43:22

Ka ʻi he mavahe pē ʻa e kau Leimaná, naʻe fekau atu ʻe Molonai ha kau mataki ke muimuiʻi kinautolu.

ʻAlamā 43:23

Pea ʻave leva ʻe Molonai ha pōpoaki ki he palōfita ko ʻAlamaá. Naʻá ne fiemaʻu ʻa ʻAlamā ke ne fehuʻi ki he ʻEikí pe ko e hā naʻe palani ʻe he kau Leimaná ke faí. Naʻe fakahā ʻe he ʻEikí kia ʻAlamā ʻoku palani ʻa e kau Leimaná ke ʻohofi ha fonua vaivai naʻe ui ko Manatai. Naʻe fanongo ʻa Molonai kia ʻAlamā. Naʻá ne taki ʻene kau taú ke tauʻi ʻa e kau Leimaná.

ʻAlamā 43:23–33

Naʻe tau ʻa e kau taú. Naʻe fuʻu mālohi mo ʻita ʻaupito ʻa e kau Leimaná. Naʻe fakaʻau ke ilifia ʻa e kau Nīfaí ʻi he kau Leimaná pea ʻamanaki ke nau hola. Ka naʻe fakamanatu ange ʻe Molonai ʻa honau ngaahi fāmilí mo e tuí, ko ia naʻa nau kei tau pē.

ʻAlamā 43:34–37, 43–48

Naʻe lotu ʻa e kau Nīfaí ki he ʻEikí ki ha tokoni. Naʻe tali ʻe he ʻEikí ʻenau ngaahi lotú pea ʻoange kiate kinautolu ha mālohi lahi. Kuo ilifia ʻeni ʻa e kau Leimaná. Naʻe maʻu kinautolu pea ʻikai ke nau lava ʻo hola. ʻI he taimi naʻe mamata ai ʻa Molonai kuo ilifia ʻa e kau Leimaná, naʻá ne talaange ki heʻene kau sōtiá ke taʻofi ʻa e taú. Naʻe ʻikai loto ʻa Molonai ke tāmateʻi ʻa e kau Leimaná.

ʻAlamā 43:49–53; 44:1–2

Naʻe talaange ʻe Molonai kia Seilahemena ʻe lava ke ō tauʻatāina ʻa e kau Leimaná kapau te nau palōmesi ke ʻoua naʻa nau toe tauʻi ʻa e kau Nīfaí. Naʻe ʻita ʻa Seilahemena mo feinga ke kei tau pē, ka naʻe ʻikai ke ne lavaʻi ʻa e kau sōtia ʻa Molonaí. Naʻe palōmesi ange leva ʻa Seilahemena mo ʻene kau taú ke nau nofo melino, pea tukuange ʻe Molonai ke nau ō.

ʻAlamā 44:1–20