“Ko e Tuʻi ʻo e Kau Leimaná Kotoa,” Ngaahi Talanoa ʻo e Tohi ʻa Molomoná (2023)
“Ko e Tuʻi ʻo e Kau Leimaná Kotoa,” Ngaahi Talanoa ʻo e Tohi ʻa Molomoná
Ko e Tuʻi ʻo e Kau Leimaná Kotoa
Fie ako fekauʻaki mo e ʻEikí
Naʻe ʻi ai ha tuʻi ʻo e kau Leimaná naʻá ne puleʻi ʻenau ngaahi tuʻi kotoa pē. Ko e tamai ia ʻa e Tuʻi ko Lamōnaí. Naʻá ne fakakaukau ko honau filí ʻa e kau Nīfaí. ʻI ha ʻaho ʻe taha, naʻá ne mamato ai kia Lamōnai mo ʻĀmoni. Naʻe fehuʻi ʻe he tuʻí kia Lamōnai pe ko e hā ʻa e ʻuhinga naʻe ʻalu holo ai mo ha tangata Nīfaí. Naʻe talaange ʻe Lamōnai ki he tuʻí ko ʻena ʻalú ke fakatauʻatāinaʻi ʻa e ngaahi tokoua ʻo ʻĀmoní mei he fale fakapōpulá.
Mōsaia 10:11–17; ʻAlamā 20:1–12
Naʻe houhau ʻa e tuʻí. Naʻá ne fakakaukau ʻoku loi ʻa e kau Nīfaí ke feinga ke kaihaʻa mei he kau Leimaná. Naʻá ne talaange kia Lamōnai ke ne tamateʻi ʻa ʻĀmoni pea haʻu mo ia.
Naʻe ʻikai ke tamateʻi ʻe Lamōnai ʻa ʻĀmoni. Naʻá ne talaange ki he tuʻí ko ʻĀmoni mo hono ngaahi tokouá ko ha kau palōfita kinautolu ʻa e ʻOtuá. Naʻá ne talaange te ne tokoniʻi ʻa e ngaahi tokoua ʻo ʻĀmoní.
Naʻe toʻo hake ʻe he tuʻí ʻene heletaá ke fakalaveaʻi ʻa Lamōnai, ka naʻe taʻofi ia ʻe ʻĀmoni. Naʻe ʻohofi leva ʻe he tuʻí ʻa ʻĀmoni. Naʻe maluʻi pē ʻe ʻĀmoni ia. Naʻá ne fakalaveaʻi ʻa e toʻukupu ʻo e tuʻí ke ʻoua naʻa lava ʻa e tuʻí ʻo tau. Naʻe ilifia ʻa e tuʻí koeʻuhí ko e ivi mālohi ʻa ʻĀmoní. Naʻá ne palōmesi te ne foaki kia ʻĀmoni ha vaheua ʻe taha ʻo hono puleʻangá kapau ʻe tuku ʻe ʻĀmoni ke ne moʻui.
Naʻe ʻikai ke fiemaʻu ʻe ʻĀmoni ʻa e puleʻangá. Ka, naʻá ne kole ki he tuʻí ke fakatauʻatāinaʻi hono ngaahi tokouá mei he fale fakapōpulá. Naʻá ne kole foki ki he tuʻí ke tuku ʻene houhau kia Lamōnaí. Naʻe pehē ʻe ʻĀmoni ʻoku totonu ke tuku ʻe he tuʻí ke pule ʻa Lamōnai ʻi he founga naʻá ne pehē ʻoku lelei tahá.
Naʻe ofo ʻa e tuʻí ʻi he ʻofa lahi ʻa ʻĀmoni kia Lamōnaí. Naʻá ne loto-lelei ke fai ʻa e meʻa kotoa pē naʻe kole ange ʻe ʻĀmoní.
Naʻe fie ʻilo lahi ange ʻa e tuʻí ki he meʻa naʻe fakahā ange ʻe ʻĀmoni mo Lamōnai fekauʻaki mo e ʻOtuá. Naʻá ne kole kia ʻĀmoni mo hono ngaahi tokouá ke nau omi ʻo akoʻi ia.
Naʻe ʻalu ʻa ʻĀmoni mo Lamōnai ki he fonua ko Mitonaí. Naʻe tuku pōpula ʻa e ngaahi tokoua ʻo ʻĀmoní ai. Naʻe haʻi ʻaki kinautolu ha ngaahi maea pea naʻe ʻikai ʻoange kiate kinautolu ha meʻakai pe vai. Naʻe fakalotoʻi ʻe Lamōnai ʻa e pule ʻo Mitonaí ke tukuange ʻa e ngaahi tokoua ʻo ʻĀmoní ke nau tauʻatāina.
ʻI hono tukuange pē ke nau tauʻatāiná, naʻe ʻalu ʻa e ngaahi tokoua ʻo ʻĀmoní ki he tamai ʻa Lamōnaí. Naʻa nau punou ki he tuʻí ʻo kole ke nau hoko ko ʻene kau tamaioʻeiki. Naʻe talaange ʻe he tuʻí ʻikai. Ka naʻá ne loto ke nau akoʻi ia fekauʻaki mo e ongoongoleleí. Ko e hingoa ʻo ha taha ʻo e ongo tautehiná ko ʻĒlone. Naʻá ne lau ʻa e folofolá ki he tuʻí pea akoʻi ia fekauʻaki mo e ʻOtuá mo Sīsū Kalaisi.
Naʻe tui ʻa e tuʻí kia ʻĒlone. Naʻá ne pehē te ne tukuange hono puleʻangá kotoa koeʻuhí ke ne ʻiloʻi ʻa e ʻOtuá. Naʻá ne ʻeke kia ʻĒlone pe ko e hā e meʻa ʻe fiemaʻu ke ne faí. Naʻe talaange ʻe ʻĒlone ki he tuʻí ke fakatomala mo lotu ki he ʻOtuá ʻi he tui. Naʻe fakatomala ʻa e tuʻí mei heʻene ngaahi angahalá kotoa peá ne lotu.
Naʻe tō ʻa e tuʻí ki he falikí. Naʻe lele ʻa e kau tamaioʻeiki ʻa e tuʻí ke tala ki he kuiní.
Naʻe hū mai ʻa e kuiní ʻo ne vakai ki he tuʻí ʻi he kelekelé. Naʻá ne fakakaukau kuo tamateʻi ʻe ʻĒlone mo hono ngaahi tokouá ʻa e tuʻí. Naʻe tuputāmaki ʻa e kuiní.
Naʻe talaange ʻe he kuiní ki he kau tamaioʻeikí ke tamateʻi ʻa ʻĒlone mo hono ngaahi tokouá. Ka naʻe ilifia ʻa e kau tamaioʻeikí. Naʻa nau pehē naʻe fuʻu mālohi ʻa ʻĒlone mo hono ngaahi tokouá. Kuo manavahē ʻeni ʻa e kuiní. Naʻá ne fekau ʻa e kau tamaioʻeikí ke nau fakahā ki he kakai ʻi he koló ʻa e meʻa kuo hokó. Naʻá ne fakaʻamu ʻe tamateʻi ʻe he kakaí ʻa ʻĒlone mo hono ngaahi tokouá.
Naʻe ʻiloʻi ʻe ʻĒlone ʻe ʻita ʻa e kakaí. Naʻá ne ʻiloʻi foki naʻe ʻikai pekia ʻa e tuʻí. Naʻá ne tokoniʻi ʻa e tuʻí ke tuʻu hake ki ʻolunga. Naʻe toe maʻu ʻe he tuʻí hono mālohí peá ne tuʻu. Naʻe ofo ʻa e kuiní mo e kau tamaioʻeikí.
Naʻe akoʻi ʻe he tuʻí ʻa e kuiní mo e kau tamaioʻeikí fekauʻaki mo Sīsū. Naʻa nau tui kotoa kia Sīsū. Naʻe fakaʻamu ʻa e tuʻí ke ako kotoa hono kakaí ʻo kau kia Sīsū. Naʻá ne fokotuʻu ha lao ke lava ke akoʻi ʻe ʻĒlone mo hono ngaahi tokouá ʻa e ongoongoleleí ʻi ha feituʻu pē ʻi hono puleʻangá. Naʻa nau akoʻi ʻa e kakaí pea ui ha kau taulaʻeiki mo ha kau akonaki ʻi he fonuá.