“Teanikumi,” Ngaahi Talanoa ʻo e Tohi ʻa Molomoná (2023)
Teanikumi
Maluʻi hono kakaí
Ko Teanikumí ko ha taki ʻi he kau tau ʻa e ʻEikitau ko Molonaí. Naʻe feinga ke maluʻi ʻa e ngaahi kolo ʻo e kau Nīfaí mei he kau Leimaná.
Ko ʻAmalekaiá ko ha tangata Nīfai naʻe hoko ko e tuʻi Leimana. Naʻe loto foki ke ne puleʻi mo e kau Nīfaí. Naʻá ne ʻohofi ʻa e kau Nīfaí ʻo ikunaʻi ha ngaahi kolo lahi.
ʻAlamā 47:1, 35; 48:1–4; 51:23–28
Naʻe ō ʻa e kau tau ʻa Teanikumí ke taʻofi ʻa e kau tau ʻa ʻAmalekaiá mei hono ʻohofi ʻa e ngaahi kolo ʻo e kau Nīfaí.
Naʻe tau ʻa e kau taú ʻi he ʻahó kakato. Naʻe tau ʻa e kau tau ʻa Teanikumí ʻaki ha ivi mo ha taukei lahi ange ʻi he kau tau ʻa ʻAmalekaiá. Ka naʻe ʻikai ke ikuna ha tafaʻaki. ʻI he taimi naʻe maluʻaki ai ʻa e poʻulí, naʻe fakatou taʻofi e tau ʻa e ongo tafaʻakí ka nau lava ʻo mālōlō.
ʻAlamā 51:31—32
Ka naʻe ʻikai mālōlō ʻa Teanikumi. Naʻá ne ʻalu fakapulipuli mo ʻene kau tamaioʻeikí ki he ʻapitanga ʻo ʻAmalekaiá.
Naʻe totolo atu ʻa Teanikumi ki he fale fehikitaki ʻo ʻAmalekaiá. Naʻá ne fakapoongi ʻa ʻAmalekaia ʻoku teʻeki ke ne ʻā. Pea foki leva ʻa Teanikkumi ki hono nofoʻangá ʻo talaange ki heʻene kau taú ke nau teuteu ke tau.
ʻI he taimi naʻe ʻā hake ai ʻa e kau Leimaná, naʻa nau ʻilo ʻa ʻAmalekaia kuo mate. Naʻa nau toe sio foki kuo mateuteu ʻa Teanikumi mo ʻene kau taú ke tau mo kinautolu.
Naʻe manavahē ʻa e kau Leimaná pea nau hola. Naʻe fakatupu ʻe he palani ʻa Teanikumí ke fuʻu manavahē lahi ʻa e kau Leimaná ke toe ʻohofi ha ngaahi kolo lahi ange ʻo e kau Nīfaí. Kuo maʻu ʻeni ʻe Teanikumi ha taimi ke ngaohi ʻa e ngaahi kolo ʻo e kau Nīfaí ke malu ange. Naʻá ne ngāue mālohi ke maluʻi hono kakaí. Naʻá ne lava ʻo maluʻi ha ngaahi kolo lahi ʻo e kau Nīfaí.