“Kolianitoni,” Ngaahi Talanoa ʻo e Tohi ʻa Molomoná (2023)
Kolianitoni
Ko e toe tafoki ki he ʻEikí
Ko Kolianitoní ko e taha ia ʻo e ngaahi foha ʻo ʻAlamaá. Naʻá ne ʻalu mo ʻene tamaí, ko hono tokoua ko Sipiloní, mo ha niʻihi kehe ke akoʻi ʻa e ongoongolelei ʻo Sīsū Kalaisí ki ha falukunga kakai naʻe ui ko e kau Sōlamí.
Lolotonga ʻa e feohi ʻa Kolianitoni mo e kakaí, naʻe ʻahiʻahiʻi ia ke faiangahala. Naʻe ʻikai ke ne talangofua ki he ʻEikí, ka naʻá ne fili ke fai ʻa e ngaahi meʻa naʻe fepaki mo e ngaahi fekau ʻa e ʻOtuá. Koeʻuhí ko e meʻa naʻá ne faí, naʻe ʻikai tui ha niʻihi ʻo e kau Sōlamí ki he meʻa naʻe akoʻi ʻe ʻAlamā mo hono ngaahi fohá.
Naʻe fakaafeʻi ʻe ʻAlamā ʻa Kolianitoni ke fakatomala pea tafoki ki he ʻEikí ke maʻu ha fakamolemole. Naʻe hohaʻa ʻa Kolianitoni ki he ngaahi konga ʻo e palani ʻa e ʻEikí. Naʻe tokoni ʻa ʻAlamā ke mahino ki hono fohá ʻa e palani ʻa e ʻEikí ki he fiefiá, ko e Fakalelei ʻa Kalaisí, toetuʻú, pea mo e moʻui hili ʻa e maté. Naʻe fakamanatu ange ʻe ʻAlamā ʻoku ʻi ai ha ngāue ʻa e ʻEikí ke ne fai.
Naʻe fakafanongo ʻa Kolianitoni ki heʻene tamaí. Naʻá ne tui kia Sīsū pea fakatomala mei heʻene ngaahi angahalá. Naʻá ne ʻiloʻi naʻe fakamaau totonu pea ʻofa mo angalelei foki ʻa e ʻEikí. Naʻe toe akonaki ʻa Kolianitoni mo ʻene tamaí mo hono tokouá. Naʻa nau akoʻi ha kakai tokolahi fekauʻaki mo e fiefia mo e nonga ʻo e fakatomalá pea mo hono moʻui ʻaki ʻa e ongoongolelei ʻo Sīsū Kalaisí.