ʻEta 1–4; 6

Sēleti mo Hono Fāmilí

Ko ha fononga naʻe tataki ʻe he ʻEikí

Naʻe nofo ʻa Sēleti mo hono fāmilí ʻi Pēpeli ʻi ha taʻu ʻe lauiafe kimuʻa pea ʻaloʻi ʻa Sīsū Kalaisí. Naʻa nau talangofua ki he ʻEikí. Ka ko e tokolahi taha ʻo e kakai ʻi Pēpelí naʻe ʻikai ke nau talangofua ki he ʻEikí. Naʻe kamata langa ʻe he kakai ko iá ha taua ke nau feinga ke aʻu ki hēvani. Naʻe liliu ʻe he ʻEikí ʻa e lea ʻa e kakaí koeʻuhí ke ʻoua naʻa nau feʻilongaki.

Sēnesi 11:4–9; ʻEta 1:33

Naʻe ʻi ai ha tokoua ʻo Sēleti. Naʻe falala ʻa e ʻEikí ki he tokoua ʻo Sēletí. Naʻe kole ʻe Sēleti ki hono tokouá ke lotu ki he ʻEikí ke maʻu ha tokoni. ʻI he lotu ʻa e tokoua ʻo Sēletí, naʻá ne kole ki he ʻEikí ke ʻoua te ne liliu e lea ʻa hono fāmilí mo e kaungāmeʻá. ʻI he founga ko iá,ʻe kei lava pē ke nau femahinoʻaki.

ʻEta 1:33–36

Naʻe ʻofa mo angaʻofa ʻa e ʻEikí. Naʻe ʻikai ke ne liliu ʻa e lea ʻo e fāmili mo e ngaahi kaungāmeʻa ʻo Sēletí. Ki mui angé, naʻe fakahā ʻe he ʻEikí ki he tokoua ʻo Sēletí kuó Ne teuteu ha fonua makehe maʻanautolu. Naʻe folofola ʻa e ʻEikí te Ne tataki kinautolu ki ai.

ʻEta 1:35–42

Naʻe tānaki fakataha ʻe Sēleti mo hono tokouá hona fāmilí mo e kaungāmeʻá. Naʻa nau tānaki foki ʻenau fanga monumanú mo e faʻahinga tengaʻi ʻakau kotoa pē. Pea nau mavahe leva mei honau ngaahi ʻapí ʻo fononga ʻi he feituʻu maomaonganoá. Naʻe tataki kinautolu ʻe he ʻEikí ʻaki ʻEne folofola mo kinautolu mei ha konga ʻao.

ʻEta 1:40–43; 2:1–6

Hili haʻanau fononga ʻi ha hala lōloa, naʻa nau aʻu ki tahi. Naʻa nau nofo ʻi he matāfangá ʻi ha taʻu ʻe fā. ʻI ha taimi loloa, naʻe ʻikai ke lotu ʻa e tokoua ʻo Sēletí ki he ʻEikí.

ʻEta 2:13–14

Naʻe fakahā ʻe he ʻEikí ki he tokoua ʻo Sēletí ke toe lotu. Naʻe fakatomala ʻa e tokoua ʻo Sēletí pea lotu ki he ʻEikí. Naʻe fakamolemoleʻi ʻe he ʻEikí ia.

ʻEta 2:14–15

Naʻe akoʻi ʻe he ʻEikí ʻa e tokoua ʻo Sēletí ke foʻu ha ngaahi vaka ʻoku ui ko e ngaahi vaka lafalafá. ʻE lava ke heka ʻa e ngaahi fāmilí ʻi he ngaahi vaka lafalafá ʻi he tahí ki he fonua ʻo e talaʻofá.

ʻEta 2:15–17

Naʻe foʻu ʻe he tokoua ʻo Sēletí mo hono fāmilí ʻa e ngaahi vaka lafalafá. Naʻá ne vakai naʻe ʻikai ha maama ʻi loto ʻi he ngaahi vaka lafalafá. Naʻá ne kole ki he ʻEikí pe ʻe lava ke nau folau ʻi he tahí ʻi he fakapoʻulí. Naʻe folofola ʻa e ʻEikí ki he tokoua ʻo Sēletí ke fakakaukau ki ha founga ke maʻu ai ʻe he ngaahi vaká ha maama.

ʻEta 2:16–19, 22–25

Naʻe ngaohi ʻe he tokoua ʻo Sēletí ha ngaahi foʻi maka iiki hinehina, ʻe 16. Naʻá ne kole ki he ʻEikí ke ala kiate kinautolu pea ʻai ke nau ulo. Naʻe mafao mai ʻe he ʻEikí hono toʻukupú ʻo ala ki he ngaahi foʻi maká taki taha ʻaki hono louhiʻi toʻukupú. Naʻe lava ʻa e tokoua ʻo Sēletí ʻo mamata ki he louhiʻi toʻukupu ʻo e ʻEikí. Naʻá ne ʻohovale ʻi he maʻu ʻe he ʻEikí ha sino ʻo hangē ko iá.

ʻEta 3:1–8

Naʻe folofola ʻa e ʻEikí naʻe maʻu ʻe he tokoua ʻo Sēletí ha tui lahi. Naʻe hā mai leva ʻa e ʻEikí ʻo fakahā Hono sino fakalaumālié ki he tokoua ʻo Sēletí. Naʻe folofola ʻa e ʻEikí, “Ko Sīsū Kalaisi au.” Naʻá Ne pehē naʻe fili Ia ke hoko ko e Fakamoʻuí. Naʻá Ne akoʻi ki he tokoua ʻo Sēletí ha ngaahi meʻa lahi kehe.

ʻEta 3:9–20, 25–27

Naʻe foki ʻa e tokoua ʻo Sēletí ki hono fāmilí mo e ngaahi kaungāmeʻá. Naʻá ne hiki ʻa e meʻa naʻá ne ako lolotonga ʻene ʻi he ʻEikí. Naʻá ne tuku foki ʻa e ngaahi foʻi maká ki he ngaahi vaká. Naʻa nau maʻu he taimí ni ha maama ki heʻenau fonongá.

ʻEta 4:1; 6:2–3

Naʻe heka ʻa e ngaahi fāmilí ki he ngaahi vaka lafalafá ke kolosi ʻi he tahí. Naʻa nau falala ki he ʻEikí ke ne tokangaʻi kinautolu. Naʻe lahi ha ngaahi afā mo ha ngaahi peau. ʻI he taimi ʻe niʻihi, naʻe tonumia kakato ʻe he tahí ʻa e ngaahi vaka lafalafá. Ka naʻa nau lotu, pea toe fakafoki hake kinautolu ʻe he ʻEikí ki he funga vaí. Naʻa nau hivaʻi ha ngaahi hiva fakafetaʻi lahi ki he ʻEikí.

ʻEta 6:4–10

Hili ha meimei taʻu ʻe taha, naʻa nau aʻu ki he fonua naʻe talaʻofa ange ʻe he ʻEikí kiate kinautolú. Naʻa nau tangi ʻi he fiefia mo fakamālō kiate Ia.

ʻEta 6:11–12