ʻOku Foki ʻa Sīsū ki Heʻene Tamaí

Ko ʻEne tokoni ki Heʻene kau ākongá kimuʻa peá Ne mavahé

Kuo akonekina ʻe Sīsū ʻEne ongoongoleleí ki he kakaí. Kuó Ne akoʻi kinautolu ke nau ʻofa ki he ʻOtuá mo fetokoniʻaki. ʻI ha taimi nounou, ʻe foki ʻa Sīsū ki Heʻene Tamaí. Naʻá Ne kole ki he kau ākongá ke hokohoko atu ʻenau akoʻi e kakaí hili ʻEne mavahé.

3 Nīfai 11:41; 28:1

ʻOku malimali ʻa Sīsū Kalaisi mo mafao mai Hono toʻukupú

Kimuʻa peá Ne mavahé, naʻe fehuʻi ʻe Sīsū ki Heʻene kau ākongá takitaha pe ko e hā te nau loto ke Ne fai maʻanautolú. Naʻe pehē ʻe he tokolahi taha ʻo e kau ākongá naʻa nau fie nofo mo Sīsū hili ʻenau tauhi kiate Ia ʻi he māmaní. Naʻe palōmesi ange ʻe Sīsū te nau nofo mo Ia hili ʻenau maté.

3 Nīfai 28:1–3

kau ākonga ʻe toko tolu ʻoku nau fofonga hohaʻa

Naʻe loto-mamahi ha toko tolu ʻo e kau ākongá koeʻuhí naʻa nau fuʻu faingataʻaʻia ke fakahā kia Sīsū ʻa e meʻa naʻa nau fiemaʻú. Ka naʻe ʻafioʻi ʻe Sīsū ʻa e meʻa naʻa nau fiemaʻu meiate Iá. Naʻa nau fie moʻui ʻo aʻu ki he Hāʻele ʻAnga Ua Mai ʻa e Fakamoʻuí koeʻuhí ke nau lava ʻo tokoniʻi ha kakai tokolahi ange ke nau haʻu kia Sīsū.

3 Nīfai 28:4–7, 9

ʻOku folofola ʻa Sīsū Kalaisi ki he kau ākonga ʻe toko tolú

Naʻe talaʻofa ange ʻe Sīsū kiate kinautolu he ʻikai ke nau mate. Te nau nofo ʻi māmani mo tokoniʻi ʻa e kakaí ke nau haʻu kiate Ia kae ʻoua ke aʻu ki Heʻene Hāʻele ʻAnga Ua Maí.

3 Nīfai 28:7–11

ʻOku haʻele hake ʻa Sīsū Kalaisi ki he ʻataá pea ʻoku ʻākilotoa ia ʻe he māmá

Naʻe ala ʻa Sīsū ki he ākonga takitaha ʻaki Hono louhiʻi toʻukupú tukukehe pē ʻa e toko tolu naʻe fie nofó. Pea mavahe leva ʻa Sīsū ʻo foki ki he Tamai Hēvaní.

3 Nīfai 28:1, 12

ʻoku malimali mo kiʻi maamangia siʻi ʻa e kau ākonga ʻe toko tolú

Hili ʻení, naʻe fakaava ʻa e ngaahi langí pea ʻohake ʻa e kau ākonga ʻe toko tolú ki he langí. Naʻa nau mamata mo fanongo ki ha ngaahi meʻa fakaofo lahi pea naʻe fekau ke ʻoua naʻa nau lea fekauʻaki mo e ngaahi meʻá. Naʻe liliu foki mo honau sinó koeʻuhí ke ʻoua naʻa nau mate pe ongoʻi ha mamahi.

3 Nīfai 28:13–15, 36–40

ʻOku papitaiso ʻe he kau ākongá ʻa e kakaí

Naʻe foki mai ʻa e kau ākongá ʻo hoko atu hono akoʻi e kakaí fekauʻaki mo Sīsuú. Naʻe fie muimui ʻa e kakaí ʻia Sīsū pea papitaiso ki Hono Siasí. Naʻe ʻi honau lotó ʻa e ʻofa ʻa e ʻOtuá, pea naʻa nau fevahevaheʻaki ʻa e meʻa kotoa pē ne nau maʻú. Naʻa nau loto-fiefia, pea naʻe tokoniʻi kinautolu ʻe he ʻOtuá. Naʻe nofo melino ʻa e tokotaha kotoa pē ʻi ha meimei taʻu ʻe 200.

3 Nīfai 28:16–18, 23; 4 Nīfai 1:1–23