3 Nīfai 18; 20.

ʻOku Tufotufa ʻe Sīsū ʻa e Sākalamēnití

Manatu maʻu ai pē kiate Ia

Hili hono fakamoʻui ʻe Sīsū ʻa e mahakí mo tāpuakiʻi ʻa e fānau īkí, naʻá Ne fuofua fakahoko ʻa e sākalamēnití ki he kakai kotoa pē naʻe fakataha mai ke fanongo kiate Iá. Naʻá Ne kole ki Heʻene kau ākongá ke ʻomi ha mā mo ha uaine.

3 Nīfai 17; 18:1–2

Naʻá Ne pakipaki e maá pea tāpuakiʻi ia. Naʻá Ne ʻoange ia ki he kau ākongá ke nau kai. Naʻá Ne kole ki he kau ākongá ke foaki ʻa e maá ki he kakai kotoa pē.

3 Nīfai 18:3–4, 6

Naʻe folofola ʻa Sīsū ʻoku totonu ke kai ʻa e maá ʻe he tokotaha kotoa pē ʻoku tui kiate Ia pea papitaisó. ʻI heʻenau fai iá, ʻoku totonu ke nau manatuʻi Hono sinó. Naʻá Ne fakamanatu ki he kakaí ʻa e taimi naʻa nau ongoʻi ai ʻa e matakafo ʻo e faʻó ʻi Hono ongo nimá mo e vaʻé pea mo e kafo ʻi Hono vakavaká.

3 Nīfai 11:14–15; 18:3–7

Naʻe ʻoange leva ʻe Sīsū ki he kau ākongá ʻa e uainé ke nau inu. Naʻá Ne kole ki he kau ākongá ke foaki ʻa e uainé ki he kakai kotoa pē.

3 Nīfai 18:8–9

Naʻe folofola ʻa Sīsū ʻoku totonu ke inu ʻe he tokotaha kotoa pē kuo fakatomala pea papitaisó ʻa e uainé. Naʻá Ne kole ki he tokotaha kotoa pē naʻe inu e uainé ke nau manatuʻi Hono taʻataʻá. Naʻá Ne fakamanatu kiate kinautolu naʻá Ne foaki Hono taʻataʻá ʻi he taimi naʻá Ne mamahi mo pekia ai maʻanautolú.

3 Nīfai 18:11

Naʻe folofola ʻa Sīsū ko e kai ʻa e maá mo inu ʻa e uainé ko ha fekau ia. ʻI hono kai ʻo e maá mo inu ʻa e uainé, naʻe fakahā ai ʻe he kakaí ki he Tamai Hēvaní ʻoku nau fie tauhi ʻEne ngaahi fekaú mo manatuʻi ʻa Sīsū. Naʻe folofola ʻa Sīsū ʻe tāpuekina kinautolu ʻaki ʻa e Laumālie Māʻoniʻoní kapau te nau fai ʻa e ngaahi meʻá ni.

3 Nīfai 18:7, 10–14

Hili hono kai ʻe he kakaí ʻa e maá mo inu ʻa e uainé, naʻe fakafonu kinautolu ʻaki ʻa e Laumālie Māʻoniʻoní. Naʻe fakahīkihikiʻi leva ʻe he kakaí ʻa Sīsū.

3 Nīfai 18:4–5, 9; 20:9