ʻAlamā 46–50

Ko e Fuka ʻo e Tauʻatāiná

Ko hono taukapoʻi ʻo e totonu ke tui ki he ʻOtuá

Ko ʻAmalekaiá ko ha taha Nīfai kaukaua, mo mālohi ia. Naʻe loto ia ke tuʻi. Naʻá ne palōmesi ke foaki ha mālohi ki he kakai naʻa nau tokoniʻi iá. Naʻe saiʻia ha kakai tokolahi ʻiate ia mo feinga ke ʻai ha kakai kehe ke muimui ai. Naʻe taki ʻe ʻAmalekaia ʻa e kakaí ke nau fai ha ngaahi ngāue kovi. Naʻá ne fiemaʻu mo hono kau muimuí ke fakapoongi ʻa e kakai naʻa nau akoʻi fekauʻaki mo Sīsū Kalaisí.

ʻAlamā 45:23–24; 46:1–10

Naʻe tui ʻa e ʻEikitau ko Molonaí, ʻa ia ko e taki ʻo e kau tau Nīfaí, kia Sīsū. Naʻá ne ʻiloʻi naʻe tāpuekina ʻa e kau Nīfaí koeʻuhí he naʻa nau tauhi e ngaahi fekau ʻa e ʻOtuá. Naʻá ne fuʻu ʻita ʻaupito ʻi hono taki ʻe ʻAmalekaia ʻa e kakaí mei he ʻOtuá, ʻi heʻene feinga ke hoko ko e tuʻí, mo feinga ke fakamamahiʻi ʻa e kakaí.

ʻAlamā 46:9–11, 13–15, 18

Naʻe hae ʻe Molonai hono kofú. Naʻá ne tohi ai ʻoku totonu ke manatuʻi ʻe he kakaí honau ʻOtuá, ʻenau tauʻatāiná, mo honau ngaahi fāmilí. Naʻá ne haʻi leva ia ki ha pou pea ui ia ko e fuka ʻo e tauʻatāiná. Naʻe lotua ʻe Molonai ha tāpuaki mei he ʻOtuá. Naʻá ne fakaʻaliʻali ki he kau Nīfaí ʻa e fuka ʻo e tauʻatāiná mo kole ke nau kau fakataha mo ia ʻi hono tauʻi ʻo ʻAmalekaiá.

ʻAlamā 46:12–20, 23–24, 28

Naʻe tui ʻe he kakaí honau teunga taú pea nau lele kia Molonai. Naʻa nau mateuteu ke tau maʻá e ʻOtuá mo honau ngaahi ʻapí, fāmilí, mo e tauʻatāiná. Naʻa nau fai ha fuakava, pe palōmesi makehe, mo e ʻOtuá te nau muimui maʻu pē kiate Ia. Pea nau teuteu leva ke tauʻi ʻa ʻAmalekaia.

ʻAlamā 46:21–22, 28

Naʻe tokolahi e kau tau ʻa Molonaí. Naʻe manavasiʻi ʻa ʻAmalekaia. Naʻe feinga ke hola mo hono kau muimuí. Ka naʻe manavasiʻi honau tokolahi naʻe tau ʻa ʻAmalekaiá ki ha ngaahi ʻuhinga hala. Naʻe ʻikai toe muimui ha tokolahi kiate ia. Naʻe taʻofi ʻe he kau tau ʻa Molonaí ʻa kinautolu naʻe kei muimui ʻia ʻAmalekaiá, ka naʻe hao ʻa ʻAmalekaia mo ha niʻihi tokosiʻi kehe.

ʻAlamā 46:29–33

Naʻe ʻalu ʻa ʻAmalekaia ki he fonua ʻo e kau Leimaná. Naʻá ne fiemaʻu ʻa e kau Leimaná ke tokoni ange ʻi hono tauʻi ʻo e kau Nīfaí. Pea te ne maʻu leva ha kau tau tokolahi mo mālohi ange. Naʻá ne ʻai ha tokolahi ʻo e kau Leimaná ke nau ʻita ki he kau Nīfaí. Naʻe fakahā ʻe he tuʻi ʻo e kau Leimaná ki he kau Leimaná kotoa ke nau teuteu ke tauʻi ʻa e kau Nīfaí.

ʻAlamā 47:1

Naʻe saiʻia ʻa e tuʻí ʻia ʻAmalekaia. Naʻá ne fokotuʻu ʻa ʻAmalekaia ko e taha ʻo e kau taki ki he kau tau Leimaná. Ka naʻe fiemaʻu ʻe ʻAmalekaia ia ha mālohi lahi ange.

ʻAlamā 47:1–3

Naʻe fokotuʻu ʻe ʻAmalekaia ha palani ke pule ki he kau Leimaná. Naʻá ne puleʻi kotoa e kau tau Leimaná. Naʻá ne fekau leva ʻene kau tamaioʻeikí ke nau fakapoongi ʻa e tuʻí mo loi fekauʻaki mo e taha naʻá ne fakahokó.

ʻAlamā 47:4–26

Naʻe fakangalingali ʻe ʻAmalekaia ʻoku ʻita ʻi he fakapoongi ʻo e tuʻí. Naʻe saiʻia ʻa e kau Leimaná ʻia ʻAmalekaia. Naʻe mali mo e kuiní pea hoko ko e tuʻi foʻoú. Naʻe loto foki ke ne puleʻi mo e kau Nīfaí. Naʻe lau kovi ki he kakai Nīfaí koeʻuhí ke ʻita kiate kinautolu ʻa e kau Leimaná. Naʻe ʻikai fuoloa, kuo loto ha kau Leimana tokolahi ke tau mo kinautolu.

ʻAlamā 47:25–35; 48:1–4

Neongo naʻe maʻu ʻe ʻAmalekaia ʻa e mālohí ʻaki ʻa e loí, ka naʻe teuteu ʻe Molonai ʻa e kau Nīfaí ke nau falala ki he ʻOtuá. Naʻá Ne fokotuʻu ʻa e fuka ʻo e tauʻatāiná ʻi he taua kotoa pē ʻi he fonuá ke fakamanatu kiate kinautolu ʻa ʻenau palōmesí. Naʻe teuteuʻi foki ʻe he kau tau ʻa Molonaí ʻa e ʻū kolo ʻo e kau Nīfaí ki he taú. Naʻa nau langa ha ngaahi ʻā mo keli takai ha ngaahi luo ke malu mo mālohi ʻa e ngaahi koló.

ʻAlamā 46:36; 48:7–18

ʻI he ōmai ʻa e kau Leimaná ke taú, naʻe ʻikai ke nau lava ʻo hū ki he ngaahi kolo ʻo e kau Nīfaí. Naʻe taʻofi kinautolu ʻe he ngaahi ʻā mo e ngaahi luo kuo langa ʻe he kau tau ʻa Molonaí. Naʻe mate ha kau Leimana tokolahi ʻi he taimi naʻa nau ʻohofi ai ʻa e kau Nīfaí. Naʻe fuʻu ʻita ʻaupito ʻa ʻAmalekaia. Naʻá ne palōmesi te ne tāmateʻi ʻa Molonai.

ʻAlamā 49:1–27

Naʻe fakamālō ʻa e kau Nīfaí ki he ʻOtuá ʻi hono tokoniʻi mo maluʻi kinautolú. Naʻa nau ngaohi honau ngaahi koló ke malu ange mo langa ha ngaahi kolo lahi ange. Naʻe hoko atu ʻa e tau mo e kau Leimaná, ka naʻe tokoniʻi ʻe he ʻOtuá ʻa Molonai mo ʻene kau taú ke maluʻi ʻa e kau Nīfaí. Naʻe fiefia ʻa e kakai Nīfaí. Naʻa nau talangofua ki he ʻOtuá mo tauhi faivelenga kiate Ia.

ʻAlamā 49:28–30; 50:1–24