ʻAlamā 53; 56–57

Ko ha Kau Tau Kei Talavou

Ngaahi foha naʻe falala ki he ʻOtuá

ko ha kau sōtia kei talavou ʻoku nau toʻo ha pā, tao, mo e heletā

Naʻe tau ʻa e kau Nīfaí mo e kau Leimaná pea naʻa nau fiemaʻu ha tokoni. Naʻe fie tokoni ʻa e kau ʻAnitai-Nīfai-Līhaí. Ka naʻa nau fai ha palōmesi ki he ʻEikí ke ʻoua naʻa nau tau. Naʻe teʻeki fakahoko ʻe ha toko uaafe ʻo ʻenau ngaahi foha kei talavoú ʻa e palōmesi ko iá. Ka, naʻe palōmesi ʻa e ngaahi fohá ke tau ke maluʻi honau ngaahi fāmilí. Naʻe ui ʻa e ngaahi foha ko ʻení ko e kau tau loto-toʻá.

ʻAlamā 53:8, 13–18, 22; 56:1–8

Hilamani ‘okú ne taki ha kau sōtia kei talavou ki ha kolo

Naʻe fili ʻe he kau tau loto-toʻá ‘a e palōfita ko Hilamaní ke ne taki kinautolu. Ko ha kiʻi kulupu tokosiʻi pē kinautolu ʻi hono fakafehoanaki ki he kau tau Leimana tokolahí. Ka naʻe ʻiloʻi ʻe Hilamani naʻe faitotonu, toʻa, mo faivelenga ʻa e kau tau loto-toʻá. ʻI he taki kinautolu ʻe Hilamaní, naʻa nau ō ke tokoni ki he kau Nīfaí.

ʻAlamā 53:19–22; 56:9–10, 17, 19

ko e langa ʻe he kau tau kei talavoú ha kolotau mo e kau sōtia Nīfaí, kae ʻomai ʻe he ngaahi mātuʻá ha meʻakai

Naʻe helaʻia ʻa e kau sōtia Nīfaí. Ka ʻi he haʻu ʻa e kau tau loto-toʻa kei talavou ko ʻení, naʻe fiefia ʻa e kau Nīfaí. Naʻe ʻoange ʻe he konga kau kei talavoú ha ʻamanaki lelei mo ha ivi kiate kinautolu. Naʻá nau teuteu ke tauʻi fakataha ʻa e kau Leimaná. Naʻe tokoni foki e ngaahi mātuʻa ʻa e kau sōtia loto-toʻá ʻaki haʻanau ʻomai ha meʻakai mo ha ngaahi naunau kiate kinautolu.

ʻAlamā 56:16–17, 19–20, 22, 27

ʻOku fakataha ʻa e kau taki ʻo e kau Nīfaí mo e kau sōtia kei talavoú ʻi ha falefehikitaki

Kuo ikunaʻi ʻe he kau Leimaná ha ngaahi kolo lahi mo tuku ai ʻenau kau taú. Naʻe fiemaʻu ʻe he kau taki ʻo e kau Nīfaí ke ʻai ʻa e kau Leimaná ke nau mavahe mei ha taha ʻo e ngaahi koló. Naʻa nau faʻu ha palani mo kole tokoni ki he kau sōtia loto-toʻá.

ʻAlamā 56:18–30

ʻOku lele ʻa e kau tau Leimaná mo ha ngaahi meʻatau ki he kau sōtia kei talavoú

Naʻe ʻai ʻe he kau sōtia loto-toʻá ke pehē ʻoku nau ʻave ha meʻakai ki he kau Nīfai ʻoku nofo ʻi he kolo ofi maí. ʻI he vakai ʻa e kau Leimaná ki he kiʻi kulupú, naʻa nau tuku honau koló ka nau tulimui ki he kau tau loto-toʻá. Naʻe fakakaukau ʻa e kau Leimaná ʻe faingofua pē ke puke pōpula kinautolu.

ʻAlamā 56:30–36

ʻoku laka ʻa e kau sōtia kei talavoú ʻi ha laine lōloa, ʻoku muimui atu ha kau tau Leimana, pea muimui atu ha kau tau Nīfai ʻi he kau tau Leimaná.

Naʻe hola ʻa e kau tau loto-toʻá mei he kau Leimaná. Naʻe kamata leva ke tuli ʻe ha kau tau Nīfai ʻa e kau Leimaná. Naʻe fiemaʻu ʻe he kau Leimaná ke nau maʻu ʻa e kau tau loto-toʻá kimuʻa pea toki aʻu mai ʻa e kau Nīfaí kiate kinautolú. Naʻe fakatokangaʻi ʻe he kau Nīfaí ʻoku faingataʻaʻia ʻa e kau tau loto-toʻá pea nau laka vave ange ke tokoniʻi kinautolu.

ʻAlamā 56:36–41

ko ha sōtia kei talavou ʻokú ne kumi ʻa e ngaahi kau tau kehé pea ʻoku manavasiʻi

Hili ha ngaahi taimi, naʻe ʻikai toe lava ʻa e kau tau loto-toʻá ʻo sio ki he kau Leimaná. Naʻe kamata ke nau fifili pe naʻe aʻu ʻa e kau Nīfaí ki he kau Leimaná ʻo nau tau.

ʻAlamā 56:42–43

Hilamani ʻokú ne hiki ki ʻolunga ʻene heletaá

Naʻe hohaʻa ʻa Hilamani. Naʻá ne fakakaukau mahalo ʻoku feinga ʻa e kau Leimaná ke tauheleʻi kinautolu. Naʻá ne ʻeke ki heʻene kau sōtia kei talavoú pe te nau fie ō ʻo tau mo e kau Leimaná.

ʻAlamā 56:43–44

ʻoku hiki ʻe he kau tau kei talavoú ʻenau ngaahi heletaá

Naʻe manatuʻi ʻe he kau tau loto-toʻá ʻa e meʻa naʻe akoʻi ange ʻe heʻenau ngaahi faʻeé. Naʻe akoʻi kinautolu ʻe heʻenau ngaahi faʻeé ke nau falala ki he ʻOtuá pea ʻoua ʻe veiveiua, koeʻuhí he te Ne maluʻi kinautolu. Naʻe tui ʻa e ngaahi fohá ni ki he ʻOtuá mo fie tauhi ʻenau palōmesi ke maluʻi honau ngaahi fāmilí. Naʻa nau talaange kia Hilamani kuo nau mateuteu ke ō ʻo tau.

ʻAlamā 56:46–48

Ko Hilamani ʻoku laka mo e kau tau kei talavoú

Naʻe ofo ʻa Hilamani ʻi heʻenau loto-toʻá. Naʻá ne taki fakafoki kinautolu ke tauʻi ʻa e kau Leimaná.

ʻAlamā 56:45, 49

Ko Hilamani mo e kau tau kei talavoú ʻoku nau tuʻu ʻi he tafamoʻungá mo ʻenau ngaahi meʻataú

Naʻe mamata ʻa e kau tau loto-toʻá ki he tau ʻa e kau Leimaná mo e kau Nīfaí. Naʻe helaʻia ʻa e kau Nīfaí. Naʻa nau mei foʻi mo e aʻu atu ʻa e kau sōtia kei talavoú.

ʻAlamā 56:49–52

Mataʻi ifilia ʻa e kau sōtia Leimaná

Naʻe tau ʻa e kau sōtia loto-toʻá ʻaki ʻa e ivi ʻo e ʻOtuá. Naʻe ilifia ʻa e kau Leimaná ʻiate kinautolu pea taʻofi leva ʻenau taú. Naʻe tokoni ʻa e kau sōtia loto-toʻá ke ikuna ʻa e taú!

ʻAlamā 56:52–54, 56

Hilamani ʻoku fakamafao atu hono nimá ki he kau sōtia kei talavoú

Naʻe mate ha kau Nīfai mo ha kau Leimana tokolahi ʻi he taú. Naʻe manavasiʻi ʻa Hilamani na kuo mate ha niʻihi ʻo ʻene kau sōtia kei talavoú. Ka ʻi he hili ʻa e taú, naʻe lau ʻe Hilamani ʻa e tokotaha kotoa. Naʻá ne fiefia ʻaupito ke sio kuo ʻikai ke mate ha taha ʻo e kau sōtia loto-toʻá. Kuo maluʻi kinautolu ʻe he ʻOtuá.

ʻAlamā 56:55–56

ʻoku kafo ʻa e kau sōtia kei talavoú ka ʻoku nau tuʻu fakataha kātoa

Naʻe kau ha ngaahi foha tokolahi ange ki he kau tau loto-toʻá. Naʻe hokohoko atu ʻenau tokoni ki he tau ʻa e kau Nīfaí. ʻI he ngaahi tau kehe ko ʻení, naʻe kafo kotoa ʻa e kau tau loto-toʻá, ka naʻe ʻikai hanau taha ʻe mate. Naʻa nau manatuʻi ʻa e meʻa naʻe akoʻi ange ʻe heʻenau ngaahi faʻeé. Naʻa nau falala ki he ʻOtuá, pea naʻá Ne maluʻi kinautolu.

ʻAlamā 57:6, 19–27; 58:39–40