“Ko ʻAlamā ʻi he Ngaahi Vai ʻo Molomoná,” Ngaahi Talanoa ʻo e Tohi ʻa Molomoná (2023)
Ko ʻAlamā ʻi he Ngaahi Vai ʻo Molomoná
Ko e hoko ko e kakai ʻo e ʻOtuá
Naʻe hoko ʻa ʻAlamā ko ha taulaʻeiki ki ha tuʻi naʻe ui ko Noa. Naʻe feinga ʻa ʻAlamā ke fakahaofi ʻa ʻApinetai, ko ha palōfita ʻa e ʻOtuá, ke ʻoua ʻe fakapoongi ʻe Noa. Ka naʻe ʻita ʻa Noa ʻia ʻAlamā mo ne fie fakapoongi mo ʻAlamā foki. Naʻe hola ʻa ʻAlamā meia Noa ke malu. ʻI he lolotonga ʻo e ʻahó, naʻe toitoi ʻa ʻAlamā ʻo ofi ki ha feituʻu naʻe ui ko e Ngaahi Vai ʻo Molomoná.
Naʻe tui ʻa ʻAlamā ki he meʻa naʻe akoʻi ʻe ʻApinetai fekauʻaki mo Sīsū Kalaisí. Naʻá ne kole ki he ʻOtuá ke fakamolemoleʻi ia mei heʻene ngaahi angahalá mo e fehalākí.
Naʻe fakataha fakapulipuli ʻa ʻAlamā mo ha kakai peá ne akoʻi kinautolu fekauʻaki mo Sīsū. Naʻá Ne akoʻi ʻa e tokotaha kotoa pē ʻe fie fanongó.
Naʻe tui ha kakai tokolahi kia ʻAlamā. Naʻa nau ō ki he Ngaahi Vai ʻo Molomoná ke fanongo ki he akonaki ʻa ʻAlamaá.
Naʻe fiemaʻu ʻe he kakai tuí ke ui kinautolu ko e kakai ʻo e ʻOtuá, ke tokoniʻi e niʻihi kehe ʻoku faingataʻaʻiá, mo fakamatala ki he kakaí kau ki he ʻOtuá. Ko ia naʻe fakaafeʻi leva kinautolu ʻe ʻAlamā ke nau papitaiso. ʻI honau papitaisó, te nau fai ai ha fuakava, pe palōmesi, mo e ʻOtuá ke tauhi kiate Ia mo tauhi ʻEne ngaahi fekaú. ʻI he tafaʻaki ʻe tahá, ʻe tāpuakiʻi kinautolu ʻe he ʻOtuá ʻaki Hono Laumālié.
Naʻe fiefia ʻaupito ʻa e kakaí. Naʻa nau pasipasi mo pehē ʻoku nau fie papitaiso. Naʻe papitaiso ‘e ‘Alamā kinautolu takitaha ʻi he Ngaahi Vai ʻo Molomoná. Naʻe fakafonu kotoa kinautolu ʻaki e Laumālie ʻo e ʻOtuá mo nau ongoʻi e ʻofa ʻa e ʻOtuá kiate kinautolú. Naʻa nau hoko ko e kau mēmipa ʻo e Siasi ʻo Kalaisí.
Naʻe ʻilo ʻe Noa naʻe mavahe ha niʻihi ʻo hono kakaí mei hono fonuá. Naʻá Ne fekauʻi ha kau tamaioʻeiki ke siofi kinautolu. Naʻe sio ʻa e kau tamaioʻeikí ʻoku ʻalu ʻa e kakaí ki he fonua ʻo Molomoná ke fanongo ki he ngaahi akonaki ʻa ʻAlamaá. Naʻe fuʻu ʻita ʻaupito ʻa Noa. Naʻá ne fekauʻi atu ʻene kau taú ke tāmateʻi ʻa ʻAlamā mo e kakai naʻe akoʻi ʻe ʻAlamaá.
Naʻe fakatokanga ʻa e ʻOtuá kia ʻAlamā fekauʻaki mo e kau taú. ʻI he tokoni ʻa e ʻOtuá, naʻe mavahe lelei pē ʻa ʻAlamā mo hono kakaí mei he fonuá. Naʻe ʻikai ke lava ʻe he kau taú ʻo maʻu kinautolu. Naʻa nau fononga lalo ʻi ha ʻaho ʻe valu ʻi he maomaonganoá pea nau aʻu ki ha fonua fakaʻofoʻofa. Naʻa nau langa ha ngaahi ʻapi foʻou ai. Naʻe akoʻi ʻe ʻAlamā ʻa e kakaí, pea naʻa nau tauhi ʻenau palōmesi ki he ʻOtuá.