“ʻAlamā, ʻAmuleki, mo Sisolome,” Ngaahi Talanoa ʻo e Tohi ʻa Molomoná (2023)
ʻAlamā, ʻAmuleki, mo Sisolome
Ko e fili ke tui mo talangofua ki he ʻOtuá
Naʻe sio ʻa ʻAlamā ko ha tokolahi ʻo e kāingalotu ʻo e Siasí naʻe ʻikai ke nau talangofua ki he ngaahi fekau ʻa e ʻOtuá. Ko ia naʻe ʻalu leva ʻa ʻAlamā mei he kolo ki he kolo ʻo akoʻi e folofola ʻa e ʻOtuá. Naʻe fakatomala ha kakai tokolahi. Pea aʻu mai ʻa ʻAlamā ki ha kolo naʻe ui ko ʻAmonaihā. Naʻe ʻikai fanongo ʻa e kakai ʻi aí kiate ia. Naʻa nau ʻanuhia ia mo tuli mei he koló.
Naʻe ongoʻi loto-mamahi ʻa ʻAlamā ʻi heʻene mavahe mei he koló. Naʻe hohaʻa ki he kakaí. Pea haʻu ha ʻāngelo kiate ia. Naʻe pehē ʻe he ʻāngeló ʻe lava ke fiefia ʻa ʻAlamā koeʻuhí he kuo talangofua ki he ʻOtuá. Naʻe talaange ʻe he ʻāngeló kia ʻAlamā ke foki ki he koló ʻo fakatokanga ki he kakaí. Kapau he ʻikai ke nau fakatomala, ʻe fakaʻauha kinautolu. Naʻe foki fakavavevave leva ʻa ʻAlamā.
ʻI he taimi naʻe haʻu ai ʻa ʻAlamā ki he koló, naʻe fuʻu fiekaia ʻaupito. Kuó ne ʻaukai ʻi ha ngaahi ʻaho lahi. Naʻe kole ʻa ʻAlamā ha meʻakai ki ha tangata ko ʻAmuleki.
Naʻe fakamatala ʻe ʻAmuleki kia ʻAlamā kau ki ha meʻa-hā-mai naʻá ne mamata ki ai. ʻI he meʻa-hā-maí, naʻe fakahā ai ʻe ha ʻāngelo kia ʻAmuleki ko ʻAlamaá ko ha palōfita ia ʻa e ʻOtuá. Naʻe fie tokoni ʻa ʻAmuleki kia ʻAlamā.
Naʻe ʻave ʻe ʻAmuleki ʻa ʻAlamā ki ʻapi ʻo ʻoange ha meʻakai ke ne kai. Naʻe nofo ʻa ʻAlamā ʻi he ʻapi ʻo ʻAmulekí ʻi ha ngaahi ʻaho lahi. Naʻe tāpuakiʻi ʻe he ʻOtuá ʻa ʻAmuleki mo hono fāmilí. Kimui aí, naʻe folofola ʻa e ʻOtuá kia ʻAlamā mo ʻAmuleki ke na tala ki he kakai ʻi he koló ke nau fakatomala. Naʻe talangofua ʻa ʻAlamā mo ‘Amuleki. Naʻe foaki ange ʻe he ʻOtuá Hono mālohí ke tokoni ʻi heʻena faiakó.
Ko e taha ʻo e kakai naʻe fanongo ki heʻena faiakó ko Sisolome. Naʻe fuʻu poto ʻaupito mo ne loto ke kākaaʻi ʻa ʻAlamā mo ʻAmuleki. Naʻe talaange ʻe Sisolome kia ʻAmuleki te ne ʻoange ha paʻanga lahi maʻana kapau te ne tala ʻoku ʻikai moʻoni ʻa e ʻOtuá. Naʻá ne loto ke loi ʻa ʻAmuleki koeʻuhí ke ʻoua naʻa tui ʻa e kakaí ki he meʻa naʻe akoʻi ʻe ʻAmuleki mo ʻAlamaá.
ʻAlamā 10:29–32; 11:21–25; 12:4–6
Ka naʻe ʻikai fie loi ʻa ʻAmuleki fekauʻaki mo e ʻOtuá. Naʻá ne pehē ʻoku moʻoni ʻa e ʻOtuá. Naʻe ʻilo ʻe ʻAmuleki mo ʻAlamā ʻa e ngaahi fakakaukau ʻa Sisolomé. Naʻe ofo ʻa Sisolome peá ne fai ange ha ngaahi fehuʻi lahi. Naʻá na akoʻi ʻa Sisolome ʻoku ʻi ai ha palani ʻa e ʻOtuá ki he kakai kotoa. Naʻe tui ʻa Sisolome ki he meʻa naʻe akoʻi ʻe ʻAlamā mo ʻAmuleki fekauʻaki mo e ʻOtuá mo Sīsū Kalaisí.
ʻAlamā 11:23–46; 12:1–18, 24–34; 14:6–7; 15:6–7
Naʻe loto-fakatomala ʻaupito ʻa Sisolome ʻi he ngaahi ngāue kovi naʻá ne faí. Naʻe fakaʻau ʻo puke. Naʻe ʻaʻahi ʻa ʻAlamā mo ʻAmuleki kiate ia. Naʻe pehē ʻe ʻAlamā ʻe lava ke fakamoʻui ʻa Sisolome koeʻuhí ko e tui ʻa Sisolome kia Sīsuú. Naʻe kole ʻe ʻAlamā ki he ʻOtuá ke fakamoʻui ia. Naʻe puna ʻa Sisolome ʻo tuʻu ki ʻolunga. Kuo fakamoʻui ia! Naʻe papitaiso ia pea naʻá ne akoʻi ʻa e kakaí ʻi he toenga ʻo ʻene moʻuí.