“Fekauʻaki mo e Tohi ʻa Molomoná,” Ngaahi Talanoa ʻo e Tohi ʻa Molomoná (2023)
Fekauʻaki mo e Tohi ‘a Molomoná
ko Sīsū Kalaisi mo Hono kakai ʻi he Ongo ʻAmeliká
Ko e Tohi ʻa Molomoná ko e folofola. ʻOkú ne akoʻi kitautolu fekauʻaki mo e ʻEiki ko Sīsū Kalaisí pea mo ʻEne ʻaʻahi ki he ongo ʻAmeliká ʻi he kuonga muʻá. Te tau lava ʻo ako mei he Tohi ʻa Molomoná, fekauʻaki mo e ongoongolelei ʻo Sīsuú. ʻOkú ne akoʻi mai ʻa e founga ke tau maʻu ai ʻa e melinó ʻi he taimí ni pea mo e founga te tau lava ai ʻo toe nofo mo e ʻOtuá mo Sīsū ʻi ha ʻaho.
Peesi talamuʻaki ‘o e Tohi ʻa Molomoná; talateu ki he Tohi ‘a Molomoná; 3 Nīfai 11
Naʻe hiki ʻa e Tohi ʻa Molomoná ʻe he kau palōfita ʻa e ʻOtuá. Naʻa nau tohi ʻi ha ʻū laʻipeesi ukamea naʻe ui ko e ʻū lauʻi peletí ʻOku tokoni ʻenau ngaahi talanoá mo e fakamoʻoní ke tau tui kia Sīsū. Naʻa nau tohi fekauʻaki mo ha ngaahi kulupu tokolahi ʻo ha kakai naʻa nau nofo ʻi he ongo ʻAmeliká ʻi he kuonga muʻá.
Peesi talamuʻaki ‘o e Tohi ʻa Molomoná; talateu ki he Tohi ‘a Molomoná
Naʻe omi ha falukunga kakai mei Selusalema ki he ongo ʻAmeliká ʻi ha meimei taʻu ʻe 600 kimuʻa pea ʻaloʻi ʻa Sīsuú. Naʻa nau hoko ko ha puleʻanga ʻe ua naʻe ui ko e kau Leimaná mo e kau Nīfaí.
Talateu ki he Tohi ʻa Molomoná; 1 Nīfai 1:4
Kimuʻa atú, naʻe haʻu ha falukunga kakai ʻe taha mei he Taua ʻo Pēpelí ki he Ongo ʻAmeliká. Naʻe ui kinautolu ko e kakai Sēletí.
Talateu ki he Tohi ʻa Molomoná; ʻEta 1:33–43
Naʻe akoʻi ʻe he kau palōfita ʻa e ʻOtuá ʻa e kakaí. ʻI he taimi naʻe fanongo ai ʻa e kakaí ʻo tauhi ʻa e ngaahi fekau ʻa e ʻOtuá, naʻá Ne tokoniʻi kinautolu. Naʻe akonaki ʻa e kau palōfitá fekauʻaki mo Sīsū mo pehē ʻe ʻaloʻi Ia ʻi Selusalema. Naʻe ʻilo ʻe he kau Nīfaí mo e kau Leimaná ʻe ʻaʻahi mai ʻa Sīsū kiate kinautolu hili ʻEne pekiá.
2 Nīfai 1:20; 25:12–14; 26:1, 3, 9; Mōsaia 3:5–11; ʻAlamā 7:9–13; Hilamani 3
Naʻe hāʻele mai ʻa Sīsū ʻo hangē ko e lea ʻa e kau palōfitá. Hili ʻa e pekia ʻa Sīsū pea toetuʻú, naʻá Ne ʻaʻahi ki he kakaí. Naʻá Ne tuku ke ala ʻa e tokotaha takitaha ki he ngaahi matakafo ʻi Hono toʻukupú mo e toʻukupu kelekelé. Ne nau ʻilo ko Sīsū ʻa e ʻAlo ʻo e ʻOtuá. Naʻá Ne akoʻi ʻEne ongoongoleleí, pea naʻe tohi ia ʻe he kakaí. Naʻa nau talanoa ʻo kau ki he ʻaʻahi mai ʻa Sīsuú ʻi ha ngaahi taʻu lahi.
3 Nīfai 11:7–15, 31–41; 16:4; 4 Nīfai 1:1–6, 13–22
Ko Molomoná ko ha palōfita naʻe moʻui ʻi ha ngaahi taʻu ʻe laungeau hili ʻa e ʻaʻahi mai ʻa Sīsuú. Lolotonga ʻa e moʻui ʻa Molomoná, naʻe ʻikai toe muimui ʻa e kakaí ki he ʻEikí. Naʻe maʻu ʻe Molomona ʻa e ngaahi tohi ʻa e kau palōfita naʻe moʻui ki muʻa ʻiate iá. Naʻá ne fakahū ʻa e konga lahi ʻo ʻenau ngaahi tohí ki ha seti lauʻi peleti pē ʻe taha. Naʻe hoko ʻa e ʻū lauʻi peleti ko ‘ení ko e Tohi ʻa Molomoná.
Talateu ki he Tohi ʻa Molomoná; Ngaahi Lea ʻa Molomona 1:2–9; Molomona 1:2–4, 13–17
Kimuʻa pea mate ʻa Molomoná, naʻá ne tuku ʻa e ʻū lauʻi peletí ki hono foha ko Molonaí. Lolotonga ʻa e moʻui ʻa Molonaí, naʻe fai ʻe he kakaí ha ngaahi meʻa kovi ʻaupito. Naʻa nau loto ke tamateʻi ha taha pē naʻe tui kia Sīsū. Naʻe fie tokoni ʻa Molonai ki he kakai ʻi he kahaʻú, ko ia naʻá ne tohi ha meʻa lahi ange ʻi he ʻū lauʻi peletí pea tanu ia ke malu.
Talateu ki he Tohi ʻa Molomoná; Ngaahi Lea ʻa Molomona 1:1–2; Molomona 8:1–4, 14–16; Molonai 1
Hili ha ngaahi taʻu lahi mei ai, ʻi he 1823, naʻe hā ʻa Molonai ko ha ʻāngelo ki he Palōfita ko Siosefa Sāmitá. Naʻe fakahā ʻe Molonai kia Siosefa ʻa e feituʻu ke maʻu ai ʻa e ʻū lauʻi peletí. Naʻe liliu ʻe Siosefa ʻa e meʻa naʻe hiki ʻi he ʻū lauʻi peletí, ʻi he tokoni ʻa e ʻOtuá.
Talateu ki he Tohi ʻa Molomoná; Siosefa Sāmita—Hisitōlia 1
ʻOku fekauʻi mai ʻe he ʻOtuá ʻa e Laumālie Māʻoniʻoní ke tokoniʻi koe ke ke ʻiloʻi ʻa e taimi ʻoku moʻoni ai ha meʻa. ʻI hoʻo lau ʻa e Tohi ʻa Molomoná, te ke lava ʻo lotu mo fehuʻi ki he ʻOtuá pe ʻoku moʻoni ia. ʻI he founga tatau pē, te ke lava ai ʻo ʻiloʻi ko Sīsū ho Fakamoʻuí pea ʻokú Ne ʻofa ʻiate koe.