Ko e Tāpuakiʻi ʻe Sīsū ʻa e Fānaú

Ko Hono fakahaaʻi ʻEne ʻofa kiate kinautolú

ʻOku tuʻu ʻa Sīsū Kalaisi ʻi he ngaahi sitepu ʻo e temipalé pea folofola ki ha falukunga kakai

Naʻe akoʻi ʻe Sīsū Kalaisi ki he kakaí ha ngaahi meʻa lahi. Naʻá Ne vakai naʻa nau fiemaʻu ha taimi ke fakakaukau ai ki he meʻa kuo nau akó. Naʻá Ne kole ange ke nau foki ki ʻapi ʻo lotu ki he Tamai Hēvaní ke mahino kiate kinautolu ʻa e meʻa naʻá Ne akoʻi ange kiate kinautolú. Pea naʻe talaʻofa leva ʻa Sīsū te Ne toe ʻaʻahi kiate kinautolu ʻi he ʻaho hono hokó.

3 Nīfai 17:1–4

ʻOku malimali ʻa Sīsū Kalaisi mo hiki hake Hono toʻukupú

Naʻe tangi ʻa e kakaí koeʻuhí naʻa nau fakaʻamua ʻa Sīsū ke nofo fuoloa ange. Naʻe ʻofa ʻa Sīsū ʻi he kakaí. Naʻá Ne ʻafioʻi naʻe mālohi ʻaupito ʻenau tuí. Naʻá Ne kole ange ke nau ʻomi kiate Ia ha taha pē ʻoku puke pe lavea. Naʻá Ne loto ke fakamoʻui kinautolu takitaha.

3 Nīfai 17:5–8

ʻOku tokoniʻi ʻe Sīsū Kalaisi ha kiʻi tamasiʻi ʻoku puke, pea ʻoku ofi mai mo malimali ʻa e fānau kehé

Naʻe haʻu ʻa e kakaí kiate Ia mo e kau mēmipa honau fāmilí mo e ngaahi kaungāmeʻa naʻe puké. Naʻe fakamoʻui kotoa kinautolu ʻe Sīsū. Naʻa nau fiefia ʻaupito. Naʻa nau tūʻulutui ʻo ʻuma ki Hono toʻukupu kelekelé.

3 Nīfai 17:9–10

ʻOku folofola ʻa Sīsū Kalaisi ki ha kiʻi tamasiʻi, pea ʻoku haʻohaʻo takai ʻa e kakaí ʻia Sīsū mo ʻenau fānaú

Pea naʻe fekau ʻe Sīsū ke ʻomi ʻenau fānaú kiate Ia. Naʻe ʻomi ʻe he kakaí ʻenau fānaú pea tuku kinautolu ʻi he kelekelé ʻo takatakai ʻia Sīsū.

3 Nīfai 17:11–12

ʻOku tūʻulutui ʻa Sīsū Kalaisi ʻo lotu, pea tūʻulutui ʻa e fānaú mo e kakai lalahí ʻo takatakai ʻiate Ia mo lotu

Hili e ʻi ai kotoa ʻa e fānaú mo Iá, naʻe kole ʻe Sīsū ki he kakaí ke nau tūʻulutui ʻi he kelekelé. Naʻá Ne tūʻulutui foki mo Ia. Naʻá Ne lotu leva ki he Tamai Hēvaní. Naʻá Ne folofola ʻaki ha ngaahi meʻa fakaofo pehē ʻo ʻikai lava ke hiki ʻEne folofolá. Naʻe fonu e kakaí ʻi he fiefiá.

3 Nīfai 17:13–18

ʻOku malimali ʻa Sīsū Kalaisi, pea tō hifo ha loʻimata mei Hono fofongá

Naʻe fakahā ʻe Sīsū ki he kakaí naʻe tāpuekina kinautolu koeʻuhí ko ʻenau tui kiate Iá. Naʻe ongoʻi ʻe Sīsū ha fiefia lahi pea kamata ke Ne tangi.

3 Nīfai 17:19–21

ʻOku fāʻofua ʻa Sīsū Kalaisi ki ha kiʻi fānau, pea ʻoku ofi mai mo malimali ʻa e fānau kehé

Pea naʻe tāpuakiʻi tahataha leva ʻe Sīsū ʻa e fānaú. Naʻá Ne lotu ki he Tamai Hēvaní maʻanautolu takitaha. Naʻá Ne kole leva ki he kakaí ke nau sio ki heʻenau fānaú.

3 Nīfai 7:21–23

ʻOku folofola ʻa Sīsū Kalaisi ki he fānaú, pea ʻalu hifo ʻa e kau ʻāngeló mei he langí ʻo haʻohaʻo takai ʻi he fānaú

Naʻe haʻu ha kau ʻāngelo mei he langí ʻo takatakaiʻi ʻa e fānaú. ʻI hono tāpuakiʻi ʻe he kau ʻāngeló ʻa e fānaú, naʻe takatakaiʻi kinautolu ʻe ha maama fakalangi. ʻI ha ʻaho ʻe taha, naʻe feʻiloaki ai ʻa Sīsū mo toe tāpuakiʻi ʻa e fānaú. Naʻá Ne tāpuakiʻi foki ʻa e fānaú ke nau lava ʻo lea. Naʻa mo e fanga kiʻi pēpeé naʻa nau lea. Naʻe akoʻi ʻe he fānaú ki heʻenau mātuʻá ha ngaahi meʻa fakaofo.

3 Nīfai 17:23–25; 26:14, 16