Books and Lessons
Pene 1: To tatou Metua i te Ao ra

Pene 1

To Tatou Metua i te Ao ra

Hōho’a
Hubble image of the galaxy

Te Vai nei te hoê Atua

  • Eaha te tahi mau mea o te faaite papû nei ia outou e, te vai nei te hoê Atua ?

Teie ta Alama, te hoê peropheta no te Buka a Moromona i papa‘i, « Ua faaite mai te mau mea atoa e, te vai ra te Atua; oia iho â ïa, te fenua, e te mau mea i te ao nei, e to’na taninitoraa; e na te mau feti‘a i ta ratou taninitoraa, na to ratou e‘a i haapa‘ohia ra i faaite mai e, te vai ra Tei Hamani i te mau mea atoa ra » (Alama 30:44). E nehenehe ta tatou e hi‘o i ni‘a i te ra‘i i te pô e ia ite i te auraa o te parau a Alama. Te vai nei e rave rahi milioni feti‘a e te mau paraneta, tei roto ratou paatoa i te hoê fanahoraa afaro maitai. Aita ratou i tae i reira ma te opua-ore-hia. E ti‘a ia tatou ia hi‘o i te ohipa a te Atua i te ao ra e i te fenua nei. Te mau raau rii e rave rahi, te mau huru animala e rave rahi, te mau mou‘a, te mau anava‘i, te mau ata e horo‘a mai nei ia tatou nei i te ua e te hiona – te faaite nei teie mau mea atoa ia tatou e, te vai ra te Atua.

Ua haapii mai te mau peropheta ia tatou e, te Atua te Faatere Rahi o te ra‘i nui atea. Te vai nei te Atua i ni‘a i te ra‘i ra (a hi‘o PH&PF 20:17). Na roto i Ta’na Tamaiti, o Iesu Mesia, ua hamani oia i te ra‘i e te fenua e te mau mea atoa i reira ra (a hi‘o 3 Nephi 9:15; Mose 2:1). Ua poiete oia i te marama, te mau feti‘a, e te mahana. Na’na i faanahonaho i teie ao e ua horo‘a i te hoho‘a, te taninitoraa, e te ora. Ua faaî oia i te reva e te pape i te mau mea ora atoa ra. Ua tuu oia i te mau huru animala ora atoa i ni‘a i te mau aivi e te mau afaa. Ua horo‘a mai oia ia tatou nei i te ao e te ru‘i, te pu‘e tau mahanahana e te pu‘e tau to‘eto‘e, te pu‘e tau ueueraa e te pu‘e tau ootiraa. Ua hamani oia i te taata i To’na ra hoho‘a ia riro ei faatere i ni‘a i te tahi atu mau mea Ta’na i hamani ra (a hi‘o Genese 1:26–27).

Te Atua te taata Teitei Hope ta tatou e ti‘aturi nei e ta tatou ho‘i e haamori nei. Ua riro Oia te « Metua Rahi no te ao nei » e « te hi‘o nei Oia i te taato‘araa o te utuafare taata mai te hoê metua tane here e te aroha » (Te mau haapiiraa a te mau Peresideni o te Ekalesia: Iosepha Semita [2007], 39).

Te natura o te Atua

  • Eaha te tahi o te mau huru o te Atua ?

Ua hamanihia tatou i To’na ra hoho‘a (a hi‘o Moses 2:26; 6:9), no reira tatou i ite ai e, e tino to te Atua mai to tatou te huru. Tei roto To’na varua mure ore i te hoê tino i‘o e te ivi (a hi‘o PH&PF 130:22). Area râ, te tino o te Atua, e tino maitai hope ïa e tei faahanahanahia, i te hanahana i ô atu i te mau faaiteraa atoa.

E mea maitai hope te Atua. E Atua parau ti‘a Oia, e to’na mau ateributi o te here ïa, te aroha, te parau mau, te mana, te faaroo, te ite, e te haavaraa. E puai hope To’na. Ua ite Oia i te mau mea atoa. Ua î Oia i te maitai.

No ô mai i te Atua ra te mau mea maitai atoa. Te mau mea atoa Ta’na e rave nei no te tautururaa ïa i Ta’na mau tamarii ia riro mai Ia’na te huru. Ua parau Oia e, « Inaha, o teie ho‘i ta‘u ohipa e to‘u hanahana ho‘i, ia faatupu i te tahuti ore e te ora mure ore o te taata nei » (Mose 1:39).

  • No te aha e mea faufaa no tatou ia ite i te natura o te Atua ?

Te Iteraa i te Atua

  • Nahea tatou e ite ai i te Atua ?

E mea faufaa roa ia roaa te ite i te Atua i parau ai te Faaora e, « Teie ho‘i te ora mure ore, ia ite ratou ia oe i te Atua mau ra, e ia Iesu Mesia i ta oe i tono mai ra » (Ioane 17:3).

Teie te faaueraa matamua e tei hau i te rahi, « Hinaaro oe i to Atua ia Iehova ma to aau atoa » (Mataio 22:37).

Rahi noa’tu to tatou ite i te Atua, rahi noa’toa’tu to tatou here Ia’na e to tatou haapa‘o i Ta’na mau faaueraa (a hi‘o 1 Ioane 2:3–5). Na roto i te haapa‘oraa i Ta’na mau faaueraa e ti‘a ia tatou ia riro mai Ia’na ra te huru.

E nehenehe ta tatou e ite i te Atua mai te mea e:

  1. E ti‘aturi tatou e, te vai nei Oia e te here nei Oia ia tatou (a hi‘o Mosia 4:9).

  2. E tuatapapa tatou i te mau papa‘iraa mo‘a (a hi‘o 2 Timoteo 3:14–17).

  3. E pure tatou Ia’na (a hi‘o Iakobo 1:5).

  4. E haapa‘o tatou i Ta’na mau faaueraa atoa i te maitai roa te ti‘a ia tatou ia haapa‘o (a hi‘o Ioane 14:21–23).

Mai te mea e, e rave tatou i teie mau mea, e roaa ia tatou te ite i te Atua, e i reira ho‘i e roaa ai te ora mure ore ia tatou.

  • A feruri maite i te mea e ti‘a ia outou ia rave no te haafatata roa’tu i te Atua ra.

Te tahi atu mau papa‘iraa mo‘a

Nene’i