Books and Lessons
Pene 24: Te Mahana Sabati

Pene 24

Te Mahana Sabati

Hōho’a
A congregation gathered in a chapel for sacrament meeting. They are singing a hymn.

Te Auraa o te Mahana Sabati

  • Eaha te mahana Sabati ?

« E haamana‘o i te mahana sabati, ia haamo‘ahia ïa » (Exodo 20:8; a hi‘o PH&PF 68:29).

No roto mai te parau ra Sabati i te parau hebera ra faafaaea. Hou te Ti‘a-faahou-raa o Iesu Mesia, ua riro te mahana Sabati ei faahanahanaraa i te mahana faafaaearaa o te Atua a hope ai Ta’na ohipa hamaniraa. E tapa‘o ïa no te fafauraa i rotopu i te Atua e To’na mau taata. Te tai‘o nei tatou i roto i te buka a Genese e, ua hamani te Atua i te mau ra‘i e i te fenua i roto i na pu‘e tau e ono ra, Ta’na i parau e, e mahana: « Faaoti ihora ho‘i te Atua i ta’na ohipa i te mahana hitu ra, i ta’na i rave, e faaea ihora oia i te mahana hitu i ta’na atoa ra mau ohipa i hamanihia e a’na ra. Ua haamaitai ihora te Atua i te mahana hitu, e haamo‘a’tura i te reira » (Genese 2:2–3). I teie tau, te faahanahana atoa nei te Sabati i te Ti‘a-faahou-raa o Iesu Mesia.

Te Sabati o te hitu ïa o te mau mahana atoa. E mahana mo‘a ïa i faataahia e te Atua ia faaea tatou i ta tatou mau ohipa atoa e ia haamori Ia’na.

Te tumu o te Mahana Sabati

  • Nahea outou ia faataa i te tumu o te mahana Sabati i te hoê taata aore i ite eaha te Sabati ?

Ua haapii mai Iesu e ua faataahia te mahana Sabati no to tatou maitai (a hi‘o Mareko 2:27). Te tumu o te Sabati o te horo‘araa ïa ia tatou i te hoê mahana o te hepetoma i reira tatou e faatoro ai i to tatou mau feruriraa e ta tatou mau ohipa i ni‘a i te Atua. E ere ïa i te hoê mahana faafaaea-noa-raa i te ohipa. E mahana mo‘a râ o te haapa‘ohia i roto i te haamoriraa e te faaturaraa. Ia faafaaea tatou i ta tatou mau ohipa o te mau mahana atoa, e vata ïa to tatou feruriraa no te feruri hohonu i te mau mea o te varua. E faaapî tatou i ta tatou mau fafauraa i mua i te Fatu e e faaamu i to tatou varua i te mau mea o te Varua.

  • A feruri eaha te mau mea ta outou e rave no te haamana‘o noa i te tumu o te Sabati a faaineine ai outou i te reira mahana i te mau hepetoma atoa.

Te Aamu o te Sabati

Na te Atua i haamo‘a i te hitu o te mahana ei Sabati i te omuaraa o te fenua nei (a hi‘o Genese 2:2–3). Mai tahito mai ra, ua haapa‘o-maite-hia te peu o te hoê mahana hitu mo‘a i rotopu i te mau taata rau o te fenua nei. Ua faaapî te Atua i te hoê ture no ni‘a i te reira mahana i to Iseraela, i te na-ô-raa e, « E haamana‘o i te mahana Sabati, ia haamo‘ahia ïa » (Exodo 20:8). Te haapa‘oraa i te mahana Sabati e tapa‘o faaite atoa ïa e, te Ati Iseraela, e nunaa fafau ïa No’na (a hi‘o Exodo 31:12–13, 16; Isaïa 56:1–8; Ieremia 17:19–27).

Area râ, ua haamau te tahi mau feia faatere Ati Iuda e rave rahi mau ture faufaa ore no ni‘a i te Sabati. Ua faaoti ratou e, eaha te atearaa e ti‘a i te taata ia haere, eaha te huru taponaraa ta ratou e taamu, e te vai atu ra. Ia faaino a‘era te tahi mau ti‘a faatere Ati Iuda ia Iesu Mesia no To’na faaoraraa i te taata ma‘i i te Sabati, ua faahaamana‘o atu ra Iesu ia ratou e, ua haapa‘ohia te Sabati ei maitai no te taata.

Ua haapa‘o atoa te ati Nephi i te mahana Sabati ia au i te mau faaueraa a te Atua (a hi‘o Iaroma 1:5).

I teie tau apî ua tuu faahou mai te Fatu i Ta’na faaueraa e haamana‘o i te Sabati ia haamo‘ahia ïa (a hi‘o PH&PF 68:29).

Te Mahana o te Fatu

  • Eaha te Sabati i taui ai mai te mahana hitu taui atu i te mahana matamua ?

Ua faatura noa Iesu Mesia e Ta’na mau pĭpĭ i te mahana hitu ei Sabati e tae roa’tu i To’na ra Ti‘a-faahou-raa. I muri a‘e i to’na Ti‘a-faahou-raa, ua haamo‘ahia te Sabati ei mahana no te Fatu ei haamana‘oraa i To’na Ti‘a-faahou-raa i taua mahana ra (a hi‘o Ohipa 20:7; 1 Korinetia 16:2). Mai taua taime mai ra, ua haapa‘o Ta’na mau pĭpĭ i te mahana matamua o te hepetoma ei Sabati na ratou. I roto i taua na huru toopiti ra, e ono mahana ohipa e hoê mahana faaearaa e te haamoriraa.

Ua horo‘a mai te Fatu ia tatou i te hoê faaueraa i teie anotau ia faatura atoa tatou i te Sabati, te mahana no te Fatu, ei Sabati na tatou (see PH&PF 59:12).

  • Nahea te haamana‘oraa i te Ti‘a-faahou-raa e ti‘a ai ia faauru i ta tatou haamoriraa i te Sabati ?

Haamo‘a i te Mahana Sabati

  • Eaha te auraa no te parau ra, haamo‘a i te mahana Sabati ?

Te ani mai nei te Fatu ia tatou, a tahi, ia haamo‘a i te mahana Sabati. I roto i te heheuraa tei horo‘ahia ia Iosepha Semita ra i te matahiti 1831, ua faaue te Fatu i te Feia Mo‘a ia haere i te fare pureraa e ia pŭpŭ i ta ratou mau oro‘a, ia faaea i ta ratou mau ohipa e ia aufau i ta ratou mau tusia i tei Teitei Roa ra (a hi‘o PH&PF 59:9–12).

A piti, te ani mai nei Oia ia tatou ia faaea i te ohipa o te mau mahana atoa. Te auraa ra, eiaha tatou e rave i te ohipa o te opani ia tatou ia faatumu hope roa i to tatou mana‘o i ni‘a i te mau mea o te varua. Ua parau te Fatu i to Iseraela e, « Eiaha roa oe e rave i te ohipa i te reira mahana, o oe, e to tamaiti atoa, e to tamahine, e to tavini tane, e to tavini vahine e to mau puaa atoa ra » (Exodo 20:10). Ua parau mai to tatou mau peropheta ia tatou eiaha e hoo, e a‘ua‘u, e ravaai, e rave i te mau ohipa tuaro, e aore ra, e tomo i roto i te mau ohipa mai te reira te huru i taua mahana ra.

Tera râ, ua faaara mai te Peresideni Spencer W. Kimball e, mai te mea e parahi ohipa ore noa tatou i te Sabati, aita ïa tatou e haamo‘a ra i te reira mahana. E titauhia te mau mana‘o e te mau ohipa maitai i te Sabati. (A hi‘o Te mau Haapiiraa a te mau Peresideni o te Ekalesia: Spencer W. Kimball [2006], 170).

Eaha te mau mea e ti‘a ia tatou ia rave i te Sabati ? Ua parau mai te peropheta Isaïa ia tape‘a tatou i te raveraa i to tatou iho hinaaro e « ia parau … i te Sabati e mahana hinaarohia, e te oro‘a mo‘a a Iehova ia faaturahia » (Isaïa 58:13).

E feruri tatou i te mau mea maitai e ti‘a ia tatou ia rave i te Sabati. Ei hi‘oraa, e haamo‘a tatou i te mahana Sabati na roto i te haereraa i te mau pureraa a te Ekalesia; te tai‘oraa i te mau papa‘iraa mo‘a e te mau parau a to tatou mau feia faatere o te Ekalesia; te hahaereraa i tei pohehia i te ma‘i, tei ruhiruhia, e tei herehia e tatou; te faarooraa i te mau pehe e faateitei i te aau; te raveraa i te mau ohipa a te Ekalesia; te faaineineraa i te mau parau o te aamu utuafare e to tatou iho aamu; te faati‘araa i te mau aamu e faaitoito i te faaroo e te faaiteraa i to tatou iteraa papû i te mau melo o te utuafare e te faaiteraa i te mau iteraa ia ratou; te papa‘iraa i te rata i te mau misionare e i tei herehia e tatou; te haapaeraa i te maa no te hoê opuaraa; e te horo‘araa i te taime no te mau tamarii e no vetahi ê i roto i te utuafare.

No te faaoti e, eaha te tahi atu mau ohipa e ti‘a ia tatou ia rave i te Sabati, e ui tatou ia tatou iho e: e faateitei anei e e faauru anei te reira ia‘u ? Te faaite ra anei te reira i te faatura i te Fatu ? Te arata‘i ra anei te reira i to‘u mau mana‘o i ni‘a Ia’na ?

Te vai ra te taime e titauhia ia tatou ia rave i te ohipa i te Sabati. E haapae tatou i te reira huru mai te mea e, e nehenehe, tera râ, mai te peu e, e titau-mau-hia, e tape‘a maite tatou i te varua haamori o te Sabati i roto i to tatou aau.

  • A feruri i te hoê mea o te ti‘a ia outou ia rave no te haamaitai i ta outou tautooraa no te haamo‘a i te mahana Sabati. Mai te mea e, e metua e aore râ, e metua ruau, a feruri i te hoê mea e ti‘a ia outou ia rave no te tauturu i ta outou mau tamarii e aore râ, te mau mootua ia ite i te auraa o te Sabati.

Te mau Haamaitairaa o te Haapa‘oraa i te Sabati

  • Eaha te tahi mau haamaitairaa e roaa ia tatou ia haamo‘a tatou i te mahana Sabati ?

Ia faatura tatou i te mahana Sabati, e roaa ia tatou te mau haamaitairaa rahi i te pae varua e i te pae tino. Ua parau mai te Fatu e, mai te mea e, e haamo‘a tatou i te mahana Sabati na roto i te mana‘o haamaitai e ma te aau oaoa ho‘i, e î tatou i te oaoa. Ua fafau mai oia e:

« No outou ïa te îraa o te fenua nei, … ei maa e aore râ, ei aahu, e aore râ, no te mau fare, e aore râ, no te mau fare vairaa maa no te mau puaa, e aore râ, no te ô faaapuraa maa rii, e aore râ, no te mau Ô, e aore râ, no te mau Ô vine;

« Oia ïa, te mau mea atoa o tei tupu mai i roto i te fenua, i roto i te tau mau ra, ua hamanihia no te maitai e te raveraa a te taata nei, no te haamauruuru i te mata e no te fautupu i te oaoa i roto i te aau;

« Oia ïa no te maa e no te aahu, no te tamata e no te hau‘a ho‘i, ia haapuai i te tino e ia faaitoito i te Varua » (PH&PF 59:16–19).

Te Tahi atu mau Papa‘iraa Mo‘a

Nene’i