Buka ’e ha’api’ira’a
Pene 6: Te Hi‘araa o Adamu e o Eva

Pene 6

Te Hi‘araa o Adamu e o Eva

Adam and Eve walking together after leaving the Garden of Eden. There are storm clouds in the sky, and plant growth along the path they are walking. There is a waterfall in the background.

O Adamu e o Eva na Taata Matamua o te Haere mai i te Fenua nei

  • E te faaiteraa e tauturu ia tatou ia ite e, i riro na o Adamu e o Eva ei na varua itoito ?

Ua faaineine te Atua i teie fenua ei faaearaa no Ta’na mau tamarii. Ua ma‘itihia o Adamu e o Eva ei na taata matamua e ora i ni‘a i te fenua nei (a hi‘o Mose 1:34; 4:26). Ta raua tuhaa ohipa i roto i te faanahonahoraa a to tatou Metua o te faatupuraa ïa i te tahuti i roto i te ao nei. Ua titauhia ia raua ia riro ei na metua matamua. (A hi‘o PH&PF 107:54–56).

O Adamu e o Eva te tahi o te mau tamarii teitei a to tatou Metua. I roto i te ao varua, ua piihia o Adamu o Mihaera te melahi (a hi‘o PH&PF 27:11; Iuda 1:9). Ua ma‘itihia oia e to tatou Metua i te Ao ra no te arata‘i i te feia parau ti‘a i roto i te tama‘i e o Satane (a hi‘o Apokalupo 12:7–9). Ua ma‘itihia o Adamu raua o Eva ia riro ei na metua matamua no tatou. Ua fafau te Fatu ia Adamu i te mau haamaitairaa rarahi: « Ua tuu atu ra vau ia oe ei upoo; e rahi roa te mau nunaa e tupu mai no roto mai ia oe ra, e e tamaiti arii oe i ni‘a ia ratou e amuri noa’tu » (PH&PF 107:55).

O Eva te « metua vahine no te mau taata ora atoa » (Mose 4:26). Ua faatahoê te Atua ia Adamu e ia Eva i roto i te faaipoiporaa no te mea « e ere ïa i te mea maitai ia parahi noa te taata o oia ana‘e ra » (Mose 3:18; a hi‘o atoa 1 Korinetia 11:11). E tauturu oia ia Adamu i roto i ta’na mau hopoi‘a e e farii atoa oia i ta’na mau haamaitairaa mure ore.

  • Eaha ta tatou e apo mai i roto i te hi‘oraa o Adamu raua o Eva ?

Te ô i Edene

  • Eaha te mau titauraa ia Adamu e o Eva no te ora i roto i te ô i Edene ?

A tuuhia ai Adamu e o Eva i roto i te ô i Edene, aita raua i riro atu ra ei taata tahuti. I roto i te reira huru ra, « aita i ti‘a ia raua ia fanau i te tama i reira » (2 Nephi 2:23). Aore e pohe i reira. E ora tahuti to raua no te mea tei roto to raua varua i te tino tahuti tei hamanihia i te repo o te fenua (a hi‘o Mose 6:59; Aberahama 5:7). E ora pae varua to raua i te mea e, tei mua noa â raua i te aro o te Atua. Aitâ raua i faaoti atu ra i rotopu i te maitai e te ino.

Ua faaue atu ra te Atua ia raua ia fanau i te tamarii. Na ô atu ra oia e, « ia fanau orua e ia rahi roa, e ia faaî i te fenua nei, e ia haavî i te reira, e ia mana orua… i ni‘a iho i te mau mea atoa e nee haere i ni‘a iho i te fenua nei » (Mose 2:28). Ua parau te Atua ia raua e, e amu noa raua i to te mau raau o te ô, eiaha râ i to te hoê, oia to te raau e ite ai i te maitai e te ino. No ni‘a i taua raau ra, ua parau te Atua e, « i te mahana e amu ai oe i te reira, e pohe ïa oe » (Mose 3:17).

Ua haere maira Satane ia Eva ra i roto i te ô i Edene ra, ma te ite ore i te hinaaro o te Atua, tera râ, ma te hinaaro ia haamou i te faanahonahoraa a te Atua. Ua faahema oia ia’na ia amu i te hotu o te raau no te ite i te maitai e te ino. Ua haapapû oia ia’na e, eita oia e o Adamu e pohe, e riro râ raua « mai te mau Atua, i te iteraa i te maitai e te ino » (Mose 4:11). Ua fati o Eva i mua i te faahemaraa e ua amu i te hotu. I to Adamu iteraa i te ohipa i tupu, ua faaoti oia e amu atoa. Te mau tauiraa tei tupu i ni‘a ia Adamu e o Eva no to raua amuraa i te hotu, ua parauhia ïa te Hi‘araa.

Te Taa-ê-raa o Adamu e o Eva i te Atua

  • Eaha te mau tauiraa pae tino tei tupu i ni‘a ia Adamu e ia Eva i muri a‘e i to raua ofatiraa i te ture ?

No te amuraa o Adamu e o Eva i te hotu o te raau no te ite i te maitai e te ino, ua ti‘avaru te Fatu ia raua i rapae i te ô i Edene i roto i te ao. Tupu a‘e ra te tauiraa i roto i to raua tino i muri a‘e i to raua amuraa i te hotu i rahuihia ra. E mai ta te Atua i fafau ra, ua riro maira raua ei taata tahuti. E ite raua e ta raua mau tamarii i te ma‘i, te mauiui e te pohe tino.

Na roto i to raua ofatiraa i te ture, ua farii atoa a‘e ra o Adamu e o Eva i te pohe varua. Oia ho‘i, aita e ti‘a faahou ia raua e ta raua mau tamarii ia haere apipiti e te Atua e ia paraparau Ia’na mata e mata. Ua taa ê a‘e ra o Adamu e o Eva e ta raua mau tamarii i te Atua i te tino e i te varua.

E mau Haamaitairaa Rahi tei Noaa na roto i te Ofatiraa Ture

  • E mea nahea te hi‘araa i te horo‘a mai ia tatou i te mau rave‘a ia riro tatou mai to tatou Metua i te Ao ra ?

Te ti‘aturi nei te tahi mau taata e, ua rave o Adamu raua o Eva i te hara rahi i to raua amuraa i te hotu o te raau no te ite i te maitai e te ino. Area râ, na te mau papa‘iraa mo‘a o te mau mahana hopea nei e tauturu ia tatou ia ite e, e taahiraa faufaa to raua Hi‘araa i roto i te faanahonahoraa o te oraraa e e haamaitairaa rahi no tatou paatoa. Na roto i te reira Hi‘araa, ua farii tatou i te haamaitairaa o te tino tahuti, te ti‘araa ia ma‘iti i rotopu i te maitai e te ino, e te ti‘araa ia farii i te ora mure. Aita roa teie mau haamaitairaa e roaa ia tatou ahiri Adamu e o Eva i parahi noa i roto i te ô.

I muri a‘e i te Hi‘araa, na ô ihora o Eva e, « ahiri aita taua i hi‘a, aore ïa e noaa i to taua huaai, (tamarii), e aore atoa taua e ite i te maitai e i te ino, e te oaoa o to taua faaora-raa-hia ra, e te ora mure ore o ta te Atua e horo‘a ia ratou atoa o te haapa‘o » (Mose 5:11).

Teie te parau a te peropheta Lehi:

« E teie nei, inaha, ahiri aita Adamu i hara, aore atoa oia i hi‘a (tapu-ê-hia mai mua’tu i te aro o te Atua), i vai â râ oia i roto i te Ô i Edene. E ia vai noa te mau mea atoa i hamanihia ra i roto i te hoê â vairaa i vai ai te reira i muri iho i te poiete-raa-hia e tia‘i. …

« E aita i ti‘a ia raua ia fanau tama i reira, i vai ai râ raua ma te hara ore; aore o raua e oaoa, no te mea aita raua i ite i te ati, aore â raua e haapa‘oraa i tei maitai, no te mea aita raua i ite i te hara.

« Inaha râ, ua ravehia te mau mea atoa i te paari no’na, no te ite i te mau mea atoa.

« Ua hi‘a Adamu ia vai te mau taata; e te vai nei te mau taata ia noaa to ratou oaoa » (2 Nephi 2:22–25).

  • I to outou mana‘oraa no te aha e mea faufaa ia ite i te parau no te Hi‘araa e e mea nahea te reira i te faauru ia outou ?

Te tahi atu mau papa‘iraa mo‘a