Pene 41
Te Ao Varua i Muri a‘e i te Pohe
Te Oraraa i muri a‘e i te Pohe
-
Eaha te tupu i ni‘a ia tatou i muri a‘e i to tatou poheraa ?
Ua faaineine te Metua i te Ao ra i te hoê faanahoraa no to tatou faaoraraa. Ei tuhaa no te reira faanahonahoraa, ua tono Oia ia tatou mai ô mai Ia’na ra ia haere mai e ora i te fenua nei e ia farii i te tino i‘o e te toto tahuti. Ia tae i te hopea e pohe to tatou tino tahuti, e e haere to tatou varua i te ao varua ra. Te ao varua e vahi tia‘iraa ïa, vahi ohiparaa, haapiiraa, e, no te feia parau ti‘a, e vahi faafaaearaa ïa i te ati e te oto. E ora noa to tatou varua i reira e tae roa’tu i te taime e ineine ai tatou no to tatou ti‘a-faahou-raa. I muri iho e nati faahou â to tatou tino tahuti i to tatou varua, e e farii tatou i te hanahana ta tatou i faaineine (a hi‘o i te pene 46 i roto i teie buka).
E rave rahi taata tei ui maere e, mai te aha te huru o te ao varua. Ua horo‘a mai te mau papa‘iraa mo‘a e te mau peropheta o te mau mahana hopea nei ia tatou i te haamaramaramaraa no ni‘a i te ao varua.
-
Eaha te hau e roaa ia outou na roto i te iteraa e, te vai ra te hoê oraraa i muri a‘e i te pohe ? Nahea e ti‘a ai ia tatou ia faaohipa i to tatou iteraa i te parau o te ao varua i muri a‘e i te pohe no te tamahanahana ia vetahi ê ?
Tei Hea te Ao Varua i Muri a‘e i te Pohe ?
Ua parau mai te mau peropheta o te mau mahana hopea nei e, aita te varua o te feia tei pohe i atea roa ia tatou. Ua parau mai te Peresideni Ezra Taft Benson e: « I te tahi taime, e mea rairai roa te paruru i rotopu i teie oraraa e te oraraa i ô mai. Aita te mau taata ta tatou i here e tei pohe i atea roa ia tatou » (i roto i te Conference Report, Eperera 1971, 18; e aore râ, Ensign, June 1971, 33). Ua haapii mai te Peresideni Brigham Young e, te ao varua i muri a‘e i te pohe tei ni‘a ïa i te fenua nei, ati a‘e ia tatou (a hi‘o Te mau Haapiiraa a te mau Peresideni o te Ekalesia: Brigham Young [1997], 279).
Eaha te Huru o to Tatou Varua ?
Hoê â hoho‘a to te tino varua e to te taata tahuti nei, hoê noa râ vahi taa ê, oia ho‘i, e huru maitai roa to te tino varua (a hi‘o Etera 3:16). E ta‘ita‘i te mau varua na muri iho ia ratou, mai te fenua’tu nei, i ta ratou mau peu o te haapa‘o e aore râ, o te pato‘i i te mau mea o te parau ti‘a (a hi‘o Alama 34:34). Hoê â mau hiaai e te mau hinaaro to ratou mai to te tau a ora ai ratou i ni‘a i te fenua nei. E hoho‘a taata paari to te mau varua atoa. E taata paari ratou hou to ratou oraraa tahuti nei, e e hoho‘a taata paari to ratou i muri a‘e i te pohe, noa’tu e, ua pohe ratou ei aiû e aore râ, ei tamarii (a hi‘o Te mau Haapiiraa a te mau Peresideni o te Ekalesia: Joseph F. Smith [1998], 131–32).
-
No te aha e mea faufaa ia ite e, e tape‘a noa to tatou varua i roto i te ao varua i ta ratou mau huru peu i teie nei ?
Eaha te mau Huru i Roto i te Ao Varua i Muri a‘e i te Pohe ?
Ua haapii mai te peropheta Alama i roto i te Buka a Moromona no ni‘a e piti na tuhaa e aore ra, huru i roto i te ao varua:
« Ei reia e fariihia te mau varua o te feia parau ti‘a ra i roto i te hoê vairaa mauruuru ra o tei parauhia te paradaiso; e vahi faaearaa ïa, e te hau, ei reira e faaea ai ratou i to ratou pe‘ape‘a, i te ati, e te oto ho‘i.
« Ei reira te mau varua o te feia parau ino e te viivii, inaha ho‘i, aita o ratou e tuhaa i te Varua o te Fatu; inaha ho‘i, i ma‘iti ratou i te ino, aore i te maitai; no reira i ô ai te varua o te diabolo i roto ia ratou, e ua rave i to ratou ti‘ahapa; e hurihia ïa ratou i te poiri ra, tei reira te oto, e te ta‘i, e te auauraa niho; e ua na reira, no ta ratou iho ohipa ino, i arata‘i-tîtî-hia ho‘i ratou e te hinaaro o te diabolo.
« E teie nei, o te vairaa teie o te varua o te taata ino; oia ïa, tei roto i te poiri ratou, e te hoê vairaa ri‘ari‘a, e te măta‘u, e te mana‘oraa i te mainaina u‘ana e te riri o te Atua, o te tae i ni‘a ia ratou; e na reira noa ratou i te vairaa, e o te reira atoa te vairaa o te feia parau ti‘a i roto i te paradaiso e tae roa’tu i to ratou ti‘a-faahou-raa » (Alama 40:12–14).
E faataahia te mau varua ia au i te huru o to ratou oraraa e tae noa’tu ho‘i i te huru o to ratou haapa‘oraa i te hinaaro o te Fatu, a ora ai ratou i ni‘a i te fenua nei. E faataa-ê-hia te feia parau ti‘a i te feia parau ti‘a ore (a hi‘o 1 Nephi 15:28–30), area râ, e ti‘a i te mau varua ia haere i mua e ia taui i te huru mai te hoê faito e te tahi atu faito a haapii mai ai ratou i te mau parau tumu o te evanelia e a haapa‘o ai ratou i te reira. E nehenehe te mau varua i roto i te paradaiso e haapii i te mau varua i roto i te vahi tape‘araa (a hi‘o PH&PF 138).
Paradaiso
Mai ta Alama i parau mai, i reira te varua o te feia parau ti‘a e faaea ai i to ratou ati e to ratou ho‘i oto. Area râ, e horo‘a ratou i to ratou taime no te rave i te ohipa a te Fatu. Ua ite te Peresideni Joseph F. Smith i roto i te hoê orama i te haereraa’tu Iesu Mesia e farerei i te feia parau ti‘a i roto i te ao varua ra i muri noa iho i to’na faasatauro-raa-hia. Ua faataa Oia i te mau ve‘a, ua horo‘a i te puai e te mana ia ratou, e ua faaue ia ratou « ia haere e ia afa‘i i te maramarama o te evanelia ia ratou o te faaea ra i roto i te poiri, e tae noa’tu i te mau varua atoa o te taata nei » (PH&PF 138:30).
Ua faati‘ahia te Ekalesia i roto i te ao varua, e e rave tamau noa te mau melo autahu‘araa i ta ratou mau hopoi‘a i reira (a hi‘o PH&PF 138:30). Ua haapii mai te Peresideni Wilford Woodruff e: « E vai atoa teie nei autahu‘araa i te tahi pae i te paruru. … Te mau Aposetolo atoa, te mau Hitu Ahuru atoa, te mau Peresibutero atoa, e te vai atu ra, tei pohe i roto i te faaroo e ua haere atu i ô mai i te paruru, e hope paatoa ratou i te rave i te ohipa a te Fatu » (Deseret News, Tenuare 25, 1882, 818).
E mea faufaa atoa te mau autaatiraa utuafare. Ua ite te Peresideni Jedediah M. Grant, e tauturu no Brigham Young, e ua faataa’tu ia Heber C. Kimball i te faanahonahoraa i reira: « Ua parau oia e, te mau taata ta’na i ite atu i reira, ua faanahohia ïa i roto i te faanahoraa utuafare. … Ua parau oia e, ‘ia hi‘o a‘e ra vau i te mau utuafare, ite atu ra vau i te paruparu i roto i te tahi pae … inaha ho‘i, ua ite atu vau i te mau utuafare tei opanihia ia haere mai e ia parahi amui ratou ra, no te mea aore ratou i haapa‘o i to ratou piiraa i ô nei’ » (Deseret News, Dec. 10, 1856, 316–17).
Te Vahi Tapearaa o te Varua
Ua faaau te Aposetolo Petero i te ao varua i muri a‘e i te pohe mai te hoê vahi tape‘araa varua, ei vahi tape‘araa no te tahi pae (a hi‘o 1 Petero 3:18–20). Te mau varua o te feia tei ore â i farii i te evanelia a Iesu Mesia o ratou ïa te parahi i roto i te vahi tape‘araa varua. Tei ia ratou noa â to ratou ti‘amâraa, e e nehenehe hoi ratou e faauruhia e te maitai e te ino. Mai te peu e, e farii ratou i te evanelia e i te mau Oro‘a i ravehia no ratou i roto i te mau hiero, e ti‘a ïa ia ratou ia faaru‘e i te vahi tape‘araa varua e ia parahi i roto i te paradaiso.
E vai atoa i roto i te vahi tape‘araa varua te feia tei pato‘i i te evanelia a porohia ai te reira ia ratou i ni‘a anei i te fenua nei e aore ra, i roto anei i te vahi tape‘araa varua. E farii ïa te reira mau varua i te mamae o hade. Ua tapu ê ratou ia ratou iho i te maitai o Iesu Mesia, tei na ô mai e, « No te mea inaha, ua faaoroma‘i au, o te Atua, i teie nei mau mea no te taata’toa, ia ore ratou ia roohia i te mamae mai te mea e e tatarahapa ratou; tera râ, mai te mea e aita ratou e tatarahapa ia roohia ratou i te mamae rahi e ti‘a ai ia au i ta‘u i faaoroma‘i ra; na te reira mamae rahi i faatupu i roto ia‘u, oia o te Atua, tei hau a‘e i te mau mea atoa ra, i te rurutaina no te mauiui, e ua tahe maira te toto na te mau poa’toa e ua mauiui i te tino e te varua atoa ho‘i » (PH&PF 19:16–18). I muri a‘e i to ratou mauiuiraa no ta ratou mau hara, i reira ratou e fariihia ai, na roto i te Taraehara a Iesu Mesia, ia fatu i te hanahana haehaa roa a‘e, oia ho‘i te basileia tiretia.
-
Eaha te tuatiraa o te huru i roto i te ao varua e te huru i roto i teie nei oraraa ?
Te Tahi atu mau Papa‘iraa Mo‘a
-
1 Petero 4:6 (e porohia te evanelia i tei pohe)
-
Mose 7:37–39 (ua faaineinehia te vahi tape‘araa varua no te feia parau ti‘a ore)
-
PH&PF 76 (te heheuraa no ni‘a i na basileia hanahana e toru)
-
Luka 16:19–31 (te huru o te taata veve e te taata tao‘a rahi i roto i te ao varua)