Pene 9

Te mau Peropheta a te Atua

O te mau Peropheta te mau Ti‘a o te Atua i ni‘a i te Fenua nei

Eaha te mau mana e te mau horo‘a o te hoê peropheta ?

« Aita a te Fatu ra a Iehova e peu i rave, maori râ ia faaite i ta’na parau i mo‘e i ta’na ra mau tavini i te mau peropheta » (Amosa 3:7).

E rave rahi taata e ora nei i roto i te poiri, ma te ite papû ore i te hinaaro o te Atua. Te ti‘aturi nei ratou e, ua tapirihia te mau uputa o te ra‘i, e na te taata ana‘e iho e aro atu i te mau ati o teie nei ao. Aue te fana‘o o te feia mo‘a i te mau mahana hopea nei ! Ua ite tatou e, e paraparau mai te Atua i to te Ekalesia na roto i Ta’na peropheta. E na roto i te aau mehara te himene nei te feia mo‘a na te ao taatoa nei i te himene ra « Mauruuru matou e te Atua no to na peropheta, ia arata‘i noa mai ia matou i teie nei tau hopea » (Te mau Himene, no. 10).

Te peropheta o te hoê ïa taata i piihia e te Atua ia riro ei ti‘a No’na i ni‘a i te fenua nei. Ia paraparau te hoê peropheta na roto i te i‘oa o te Atua, e au ïa e, o te Atua iho teie e paraparau mai nei (a hi‘o PH&PF 1:38). Ua riro atoa te peropheta ei ite taa ê no te Mesia, ma te faaite papû i To’na huru atua e ma te haapii i Ta’na evanelia. E haapii te peropheta i te parau mau e e tatara ho‘i i te parau na te Atua. E ti‘aoro oia i te feia parau-ti‘a ore ia tatarahapa. E farii oia i te mau heheuraa e te mau arata‘iraa no ô mai i te Fatu ra ei maitai no tatou. E ti‘a ia’na ia hi‘o i roto i te tau amuri a‘e e ia tohu i te mau mea e tupu mai ia nehenehe i to te ao nei ia faaarahia.

E ti‘a mai te hoê peropheta mai roto mai i te mau huru vahi atoa o te oraraa nei. E riro paha oia ei taata apî e aore râ ei taata paari, ei taata ite e aore ra ei taata haere ore i te haapiiraa. Penei a‘e e taata faaapu, e auvaha ture e aore ra e orometua haapii. I mutaa iho ra, e oomo te mau peropheta i te mau aahu roroa e e ta‘ita‘i ho‘i i te raau i roto i te rima. Area te mau peropheta no teie tau ra, e pereue ïa to ratou, e e ta‘ita‘i ratou i te pute vairaa parau paari. No reira, na te aha ïa e faaite mai i te peropheta mau ? Na te Atua iho e ma‘iti i te peropheta mau e e piihia oia na roto i te mana ti‘a mau o te autahu‘araa (a hi‘o Te mau Hiro‘a Faaroo 1:5).

E paturu te feia mo‘a i te mau mahana hopea nei i te Peresideniraa Matamua e i te Tino Ahuru Ma Piti Aposetolo ei peropheta. Area râ, ia parau ana‘e tatou i te parau no « te peropheta o te Ekalesia », te parau nei ïa tatou i te Peresideni o te Ekalesia, oia te peresideni o te autahu‘araa teitei.

Mai mutaa iho mai â ua pii te Atua i te mau Peropheta no te arata‘i i te taata nei

E mea nahea to te mau peropheta arata‘iraa i te mau tamarii a te Atua i mutaa iho ra ?

I vai na ho‘i te mau peropheta i te fenua nei mai ia Adamu mai â. Ua riro te mau ohipa a te reira mau taata ei faaitoitoraa e ei faaururaa ia tatou. Ua arata‘i o Mose, te hoê peropheta no te Faufaa Tahito, e rave rahi tauatini o to’na ra nunaa i rapae i te fenua Aiphiti e i te faatîtîraa no te haere i te fenua i parauhia ra. Na’na i papa‘i i na buka matamua e pae o te Faufaa Tahito e i na Ture hoê Ahuru. Ua fano atu o Nephi, te hoê peropheta no te Buka a Moromona mai Ierusalema e tae atu i te fenua Amerika e 600 matahiti hou te fanauraa o te Mesia. Ua horo‘a mai teie ti‘a faatere rahi e teie taata iimi e rave rahi mau papa‘iraa faufaa i roto i te Buka a Moromona. Ua ma‘itihia o Ioane Bapetizo no te faaineine i to te ao nei i te taeraa mai o te Fatu o Iesu Mesia. Na roto ia Iosepha Semita, te hoê peropheta no te anotau hopea nei, ua faaho‘i faahou mai te Fatu i te Ekalesia. Ua iriti atoa o Iosepha Semita i te Buka a Moromona i to’na ra apîraa.

Eaha ta outou i apo mai i roto i te oraraa e te mau haapiiraa a te mau peropheta ?

E peropheta ora to tatou i te fenua nei i teie mahana.

No te aha tatou i hinaaro ai i te hoê peropheta ora i teie mahana ?

E peropheta ora to tatou i ni‘a i te fenua nei i teie mahana. Teie peropheta o te peresideni ïa o te Ekalesia a Iesu Mesia i te Feia Mo‘a i te Mau Mahana Hopea nei. Te mau nei oia i te ti‘araa no te farii i te heheuraa no te Ekalesia taatoa. Te mau nei oia i « te mau taviri o te basileia » oia ho‘i, tei ia’na te mana no te faatere i te Ekalesia e te basileia taato‘a o te Atua i ni‘a i te fenua nei, e tae noa’tu i te faatereraa i te mau Oro‘a o te autahu‘araa (a hi‘o Mataio 16:19). Aita e taata ê atu e ti‘a ia farii i te hinaaro o te Atua no te mau melo taatoa o te Ekalesia maori râ te peropheta e te Peresideni ma‘itihia. Ua parau te Fatu e, « aita’tu maori râ te taata hoê i ni‘a i te ao nei i te taime hoê o tei horo‘ahia’tu teie nei mana e te mau taviri ho‘i no teie nei autahu‘araa » (PH&PF 132:7). E tauturuhia te Peresideni o te Ekalesia na to’na na tauturu i roto i te Peresideniraa Matamua e na te mau melo o te Pŭpŭ no te Tino Ahuru Ma Piti, tei riro atoa ei mau peropheta, ei mau hi‘o e ei mau heheu parau.

E rave tatou i te mau mea ta te mau peropheta e parau mai ia tatou ia rave. Ua parau mai te peresideni Wilford Woodruff e, eita roa te hoê peropheta e faati‘ahia ia arata‘i ê i te Ekalesia:

« Eita roa te Fatu e faatia ia‘u nei e aore ra, i te hoê noa’tu taata o te ti‘a mai ei peresideni no teie Ekalesia ia arata‘i ê ia outou. Aita te reira i roto i te faanahonahoraa. Aita ho‘i te reira i roto i te feruriraa o te Atua. Mai te mea e, e tamata vau i te rave i te reira, e iriti ê te Atua ia‘u i to‘u parahiraa » (Te mau haapiiraa a te mau peresideni o te Ekalesia: Wilford Woodruff [2004], 199).

E mea nahea te peropheta ora i te faaururaa i te Ekalesia ?

E paturu tatou i te Peropheta a te Fatu

Eaha te ti‘a ia tatou ia rave no te pee e no te paturu i te peropheta ?

E rave rahi o te feruri nei e, e mea ohie ia ti‘aturi i te mau peropheta o te anotau tahito. Tera râ e mea maitai a‘e ia ti‘aturi e ia pee i te peropheta ora. Te afa‘i nei tatou i to tatou rima i ni‘a no te paturu i te Peresideni o te Ekalesia ei peropheta, ei hi‘o, e ei heheu parau.

Nahea tatou i te paturu i te peropheta ? E pure tatou no’na. E mea teimaha ta’na hopoi‘a, e te titau nei oia ia faaitoitohia oia na roto i te mau pure a te feia mo‘a.

E tuatapapa tatou i ta’na mau parau. E nehenehe ta tatou e faaroo i ta’na mau a‘oraa i roto i te amuiraa. E nehenehe atoa ta tatou e hoo i te Ensign e aore râ te Liahona no te tai‘o i ta’na mau a‘oraa no te amuiraa e i te tahi atu mau parau poro‘i ta’na.

E haapa‘o hope roa tatou i ta’na mau haapiiraa faauruhia. Eiaha tatou e haapa‘o noa i te tahi tuhaa o ta’na mau a‘oraa faauruhia e ia faaru‘e i te tuhaa aita tatou i au e aore ra, e ere i te mea ohie. Ua faaue mai te Fatu ia tatou ia pee i te mau haapiiraa faauruhia a To’na peropheta:

« E haapa‘o outou i ta’na (ta te peropheta) mau parau e i ta’na mau faaueraa atoa o ta’na e horo‘a’tu ia outou mai te noaa ia’na ra, i te haereraa mo‘a i mua ia‘u nei;

« E farii ho‘i outou i ta’na parau mai te mea ra e, no roto i to‘u iho nei vaha, ma te faaoroma‘i e te faaroo » (PH&PF 21:4–5)

E ore roa te Fatu e vaiiho i te Peresideni o te Ekalesia ia arata‘i ê ia tatou.

Eaha ta te peresideni o te Ekalesia i haapii e aore ra i haapapû mai ia tatou i te mau taime i ma‘iri a‘e nei ?

E Haamaitairaa Rahi te Roaa mai i Muri a‘e i te Faarooraa i te Parau a te Peropheta.

Mai te mea e, e haapa‘o tatou, ua fafau mai te Fatu e, « e ore roa outou e noaa i te mau uputa o hade; oia ïa, e na te Fatu ra o te Atua e haapurara ê atu i te mau mana no te pouri mai mua atu ia outou, e e faaueue ho‘i i te ra‘i ei maitai no outou na, e i to’na i‘oa ra hanahana ho‘i » (PH&PF 21:6). Mai te mea e, e rave tatou mai ta te peropheta i faaue mai, e niniihia mai te mau haamaitairaa na ni‘a mai i te ra‘i.

E ti‘a papû te Ekalesia mau ia patuhia te reira « i ni‘a iho i te niu a te mau aposetolo e te mau peropheta, e o Iesu Mesia iho te tihi rahi » (Ephesia 2:20). Ua haamaitaihia tatou i roto i teie nei ao papû ore i te fariiraa i te hoê peropheta, na roto hoi ia’na e heheu mai ai te Fatu i To’na hinaaro.

Eaha te mau iteraa tei roaa ia outou a haapa‘o ai outou i te a‘oraa a te peropheta ?

Te tahi atu mau papa‘iraa mo‘a

Numera 12:6 (te paraparau mai nei te Atua na roto i te mau peropheta)
1 Samuela 9:9 (peropheta tei parauhia e hi‘o)
Amosa 3:7 (e heheu mai te Atua i Ta’na mau parau mo‘e i te mau peropheta)
Mosia 8:16–18 (e nehenehe ta te hoê hi‘o e ite i te mau mea i tupu na e i te mau mea e tupu mai)
Luka 1:70 (te paraparau mai nei te Atua na roto i te mau peropheta)
PH&PF 45:10, 15 (te paraparau mai nei te Atua i teie mahana mai tei mutaa ihora)
1 Nephi 22:2 (na roto i te Varua i faaitehia mai ai te mau mea atoa i te mau peropheta ra)
PH&PF 68:3–5 (ia paraparau ana‘e te mau tavini o te Fatu na roto i te faaururaa a te Varua Maitai, te mana‘o ïa, te hinaaro ïa, e te reo ïa o te Fatu )
PH&PF 107:65–67, 91–92 (te mau ohipa a te Peresideni o te Ekalesia)
PH&PF 43:1–7 (te peropheta ana‘e tei faati‘ahia ia farii i te mau heheuraa no te Ekalesia)