Pene 14
Faanahonahoraa o te Autahu‘araa
Tei te Fenua nei te Autahu‘araa i teie Mahana
Ua faaterehia te Ekalesia a Iesu Mesia i te Feia Mo‘a i te mau Mahana Hopea nei na roto i te autahu‘araa. Ua apitihia te autahu‘araa i te ohipa a te Atua, e « e vai noa ho‘i te reira i roto i te ekalesia a te Atua i te mau u‘i atoa ra, e aore to te reira e haamataraa o te mahana e aore râ e hopea no te mau matahiti » (PH&PF 84:17). Tei te fenua nei te reira i teie mahana. E bapetizohia te tane apî e tei paari i roto i te Ekalesia, e mai te mea e, e mea ti‘amâ ratou e faatoro‘ahia ratou i te autahu‘araa. E horo‘ahia ia ratou te mana ei mono i te Fatu e no te rave i Ta’na ohipa i ni‘a i te fenua nei.
E Piti Tuhaa o te Autahu‘araa
-
E mea nahea te roaaraa mai te i‘oa o te Autahu‘araa a Melehisedeka e to Aarona ?
Ua tatuhaahia te autahu‘araa i roto e piti tuhaa: te Autahu‘araa a Melehizedeka e te Autahu‘araa a Aarona (a hi‘o PH&PF 107:1). « Ua parauhia te matamua te Autahu‘araa a Melehizedeka … no te mea o Melehizedeka te hoê tahu‘a rahi maitai.
« Hou To’na ra mahana ua parauhia ïa te Autahu‘araa Mo‘a, mai te au i te haapa‘oraa a te Tamaiti a te Atua.
« Tera râ no te faaturaraa i te i‘oa o Tei Teitei Roa ra, ia ore ho‘i ia faahiti-pinepine-noa-hia to’na ra i‘oa, na ratou, o te Ekalesia, i tahito ra, i parau i taua autahu‘araa ra i te i‘oa o Melehizedeka, oia ho‘i te Autahu‘araa a Melehizedeka » (PH&PF 107:2–4; papa‘iraa opa i roto i te papa‘iraa mo‘a).
Te autahu‘araa iti ra e tu‘atiraa ïa no te Autahu‘araa a Melehizedeka. Ua parauhia te reira te Autahu‘araa a Aarona no te mea ua horo‘ahia te reira ia Aarona e i ta’na mau tamaiti i roto i to ratou mau u‘i atoa. Te feia tei mau i te Autahu‘araa a Aarona, e mana ïa to ratou no te faatere i te mau Oro‘a tahuti o te oro‘a mo‘a e te bapetizoraa. (A hi‘o PH&PF 20:46; 107:13–14, 20).
Te feia o tei mau i te Autahu‘araa a Melehizedeka e mana ïa to ratou e te ti‘araa ho‘i no te arata‘i i te Ekalesia e ia faatere ho‘i i te pororaa o te evanelia i te mau vahi atoa o te ao nei. Na ratou e faatere i te mau ohipa pae varua atoa a te Ekalesia (a hi‘o PH&PF 84:19–22; 107:8). E faatere ratou i te ohipa e ravehia i roto i te mau hiero; na ratou e peresideni i te mau paroita, te mau amaa, te mau tĭtĭ, e te mau misioni. Te peropheta ma‘itihia a te Fatu, te Peresideni o te Ekalesia, oia te tahu‘a rahi peresideni i ni‘a i te Autahu‘araa a Melehizedeka (a hi‘o PH&PF 107:65–67).
Te mau Taviri o te Autahu‘araa
-
Eaha te vahi taa ê i rotopu i te autahu‘araa e te mau taviri o te autahu‘araa ? O vai te mau ti‘a faatere autahu‘araa e farii i te mau taviri ?
Te vai ra te taa-ê-raa i rotopu i te faatoro‘araa i roto i te hoê toro‘a i roto i te autahu‘araa e te fariiraa i te mau taviri o te autahu‘araa. Teie ta te Peresideni Joseph F. Smith i haapii mai:
« Te Autahu‘araa o te mana ïa i horo‘ahia i te tane ia rave i te ohipa ei mono no te Atua. Te taata atoa o tei faatoro‘ahia i te hoê toro‘a no te Autahu‘araa, ua horo‘ahia ïa taua mana ra ia’na.
Area râ, e mea titauhia i te mau ohipa atoa e ravehia i raro a‘e i taua mana ra ia ravehia te reira i te taime e te vahi tano, ia au ho‘i i te raveraa ti‘a e te faanahoraa ti‘a. Te mana no te faatere i taua mau ohipa ra, e parauhia ïa te mau taviri o te Autahu‘araa. Hoê ana‘e taata e mau i te mau taviri i te taime hoê i roto i to ratou îraa, oia hoi, te peropheta e peresideni o te Ekalesia. E nehenehe ta’na e horo‘a i te hoê tuhaa o te reira mana i te tahi taata ê, e na roto i te reira, ua mau ïa te reira taata i te mau taviri o taua ohipa taa ê ra. No reira, te peresideni o te hoê hiero, te peresideni o te hoê tĭtĭ, te episekopo o te hoê paroita, te peresideni o te hoê misioni, te peresideni o te hoê pŭpŭ autahu‘araa, ua mau ratou tata‘itahi i te mau taviri o te mau ohipa e ravehia i roto i taua pŭpŭ ra. Aita to’na Autahu‘araa i rahi atu na roto i teie piiraa to’na; … ei hi‘oraa, aita te Autahu‘araa o te peresideni o te hoê pŭpŭ peresitibutero i hau atu i to te mau melo o te reira pŭpŭ. Tera râ, ua mau oia i te mana no te faatere i te mau ohipa e ravehia i roto … i te reira pŭpŭ, e aore ra, te mau taviri no taua tuharaa ra o te ohipa » (Te mau haapiiraa a te mau Peresideni o te Ekalesia: Joseph F. Smith [1998], 141; papa‘iraa opa i roto i te buka).
-
Nahea te mau taviri o te autahu‘araa ia paruru i te Ekalesia ?
Te mau Toro‘a e te mau ohipa o te Autahu‘araa a Aarona
-
E mea nahea te mau melo o te Autahu‘araa a Aarona ia tavini ?
Ia horo‘a-ana‘e-hia te Autahu‘araa a Aarona i te hoê tane e aore ra i te hoê tamaiti, e faatoro‘ahia ïa oia i te hoê toro‘a i roto i te reira autahu‘araa. Teie te mau toro‘a i roto i te Autahu‘araa a Aarona, oia ho‘i, te diakono, te haapii, te tahu‘a e te episekopo. E ohipa e e hopoi‘a to roto i te toro‘a tata‘itahi. E peresidenihia te pŭpŭ tata‘itahi na te hoê peresideni, o te haapii i te mau melo i ta ratou mau ohipa e te ani ia ratou ia haapa‘o i te mau faaueraa ohipa.
Te tomo mai nei e aore ra te ho‘i faahou mai nei te tahi mau tane i roto i te Ekalesia i muri a‘e i te matahiti i faataahia no te farii i te mau toro‘a o teie autahu‘araa. E faatoro‘ahia ratou i te hoê toro‘a i roto i te Autahu‘araa a Aarona e e nehenehe ratou e faatoro‘a-oioi-hia i te tahi atu mau toro‘a mai te mea e e vai ti‘amâ noa ratou.
Diakono
Te hoê taure‘are‘a tei bapetizohia e tei haamauhia ei melo no te Ekalesia e e mea ti‘amâ, e nehenehe oia e faatoro‘ahia i te toro‘a diakono mai te mea e 12 to’na matahiti. Ua faataahia te mau diakono no te opere i te oro‘a mo‘a i te mau melo o te Ekalesia, no te haapa‘o i te mau fare e te aua a te Ekalesia, no te riro ei ve‘a no te feia faatere o te autahu‘araa, e no te rave i te tahi mau ohipa mai te haereraa e ohi mai i te mau Ô haapaeraa maa.
Haapii
E faatoro‘ahia te hoê taure‘are‘a ti‘amâ ei haapii i te 14 o to’na matahiti e aore ra hau atu. Ua mau te mau haapii i te mau ohipa atoa, te mau ti‘araa e te mana o te toro‘a diakono e te tahi atu. Ua titauhia i te mau haapii i roto i te Autahu‘araa a Aarona ia tauturu i te mau melo o te Ekalesia ia haapa‘o i te mau faaueraa (a hi‘o PH&PF 20:53–59). No te tauturu ia ratou ia rave i teie hopoi‘a, e faauehia ratou ia tavini ei mau taea‘e hahaere. E hahaere ratou i te mau utuafare o te mau melo o te Ekalesia e e faaitoito ia ratou ia haapa‘o i te mau parau tumu o te evanelia. Ua faauehia ratou ia haapii i te mau parau mau o te evanelia i roto i te mau papa‘iraa mo‘a (a hi‘o PH&PF 42:12). E faaineine atoa te mau haapii i te faraoa e te pape no te oro‘a mo‘a.
Tahu‘a
E faatoro‘ahia te hoê taure‘are‘a haapa‘o maitai ei tahu‘a i te 16 o to’na matahiti e aore râ hau atu. Ua mau te mau tahu‘a i te mau ohipa, te mau ti‘araa e te mau mana o te toro‘a diakono e te haapii e te tahi atu mau ohipa (a hi‘o PH&PF 20:46–51). E nehenehe te hoê tahu‘a e bapetizo. E nehenehe ta’na e haamaitai i te oro‘a mo‘a. E nehenehe ta’na e faatoro‘a i te tahi atu mau tahu‘a, haapii e te diakono. E nehenehe te hoê tahu‘a e faatere i te mau pureraa mai te mea e, aita e melo Autahu‘araa a Melehizedeka. E poro oia i te evanelia i te mau taata e haati ra ia’na.
Episekopo
E faatoro‘ahia e e faataahia te hoê episekopo no te faatere i te Autahu‘araa a Aarona i roto i te hoê paroita. E peresideni oia no te pŭpŭ tahu‘a (a hi‘o PH&PF 107:87–88). Ia rave oia i te ohipa i roto i to’na toro‘a no te Autahu‘araa a Aarona, e haapa‘o oia na mua roa i te mau ohipa no te pae tino, mai te faatereraa i te faufaa e te mau parau e te arata‘iraa i te ohipa atuaturaa i te feia veve e te rava‘i ore (a hi‘o PH&PF 107:68).
E faatoro‘a-atoa-hia te episekopo ei tahu‘a rahi ia ti‘a ia’na ia faatere i te mau melo atoa i roto i te paroita (a hi‘o PH&PF 107:71–73; 68:15). E haava te hoê episekopo no Iseraela (a hi‘o PH&PF 107:74) e e uiui oia i te mau melo no te parau faati‘a no te hiero, no te faatoro‘araa i te autahu‘araa e no te tahi atu mau hinaaro. E ti‘araa to’na ia farii i te horo‘a o te iteraa i roto i te varua.
-
E mea nahea outou i te haamaitai-raa-hia na roto i te ohipa a te mau melo o te Autahu‘araa a Aarona ?
Te Toro‘a e te mau ohipa o te Autahu‘araa a Melehizedeka
-
E mea nahea te mau melo o te Autahu‘araa a Melehizedeka ia tavini ?
Teie te mau toro‘a o te Autahu‘araa a Melehizedeka, peresibutero, tahu‘a rahi, patereareha, Hitu Ahuru e Aposetolo.
Peresibutero
Ua piihia te peresibutero no te haapii, tatara i te parau, faa‘o, bapetizo e ia tia‘i i te Ekalesia (a hi‘o PH&PF 20:42). E mau peresibutero ana‘e te mau melo o te Autahu‘araa a Melehizedeka. E mana to ratou no te horo‘a i te horo‘a o te Varua Maitai na roto i te tuuraa rima (a hi‘o PH&PF 20:43). E faatere te mau perisibutero i te mau pureraa a te Ekalesia ia au i te arata‘iraa a te Varua Maitai (a hi‘o PH&PF 20:45; 46:2). E nehenehe te mau peresibutero e haamaitai i te taata ma‘i (a hi‘o PH&PF 42:44) e haamaitai ho‘i i te mau tamariirii (a hi‘o PH&PF 20:70). E nehenehe te mau peresibutero e faatere i te mau pureraa a te Ekalesia mai te mea e, aita e tahu‘a rahi (PH&PF 107:11).
Tahu‘a Rahi
E horo‘ahia i te tahu‘a rahi te mana no te faatere i roto i te Ekalesia e no te faatere i te mau ohipa pae varua (a hi‘o PH&PF 107:10, 12). E nehenehe atoa ta’na e faatere i roto i te mau toro‘a iti a‘e (a hi‘o PH&PF 68:19). Te mau peresideni tĭtĭ, peresideni misioni, melo apooraa teitei, episekopo e te tahi atu mau ti‘a faatere o te Ekalesia, ua faatoro‘ahia ratou paatoa ei tahu‘a rahi .
Patereareha
Na te Huimana Faatere Rahi o te Ekalesia e aore ra, na te mau peresideni tĭtĭ na roto i te parau faati‘a a te Tino Ahuru Ma Piti, e faatoro‘a i te mau patereareha no te horo‘a i te mau haamaitairaa patereareha i te mau melo o te Ekalesia. Na te reira mau haamaitairaa e horo‘a mai ia tatou i te tahi mau iteraa no ni‘a i to tatou mau piiraa i ni‘a i te fenua nei. Te parau te reira a te Fatu iho i ni‘a ia tatou. E faatoro‘a-atoa-hia te mau patereareha ei tahu‘a rahi. (A hi‘o PH&PF 107:39–56).
Hitu Ahuru
Ua riro te mau Hitu Ahuru ei mau ite taa ê no Iesu Mesia i mua i to te ao, e e tauturu ratou i te paturaa e i te faatereraa i te Ekalesia i raro a‘e i te arata‘iraa a te Peresideniraa Matamua e te Pŭpŭ no te Tino Ahuru Ma Piti Aposetolo (a hi‘o PH&PF 107:25, 34, 38, 93–97).
Aposetolo
Ua riro te Aposetolo ei ite taa ê no te i‘oa o Iesu Mesia i te ao taatoa nei (a hi‘o PH&PF 107:23). Na te mau Aposetolo e faatere i te mau ohipa a te Ekalesia i te ao atoa nei. O ratou tei faatoro‘ahia i te toro‘a Aposetolo i roto i te Autahu‘araa a Melehizedeka, e faataahia ïa ratou ei melo no te Pŭpŭ no te Tino Ahuru Ma Piti Aposetolo. E horo‘ahia ia ratou tata‘itahi te mau taviri atoa o te basileia o te Atua i ni‘a i te fenua nei, tera râ, o te Aposetolo tahito ana‘e, oia ho‘i te Peresideni o te Ekalesia, o te faaohipa i te reira mau taviri taatoa. E rave te tahi atu mau Aposetolo i te ohipa i raro a‘e i ta’na arata‘iraa.
-
E mea nahea outou i te haamaitai-raa-hia na roto i te ohipa a te mau melo o te Autahu‘araa a Melehizedeka ?
Te mau Pŭpŭ o te Autahu‘araa a Aarona
Ua haapii mai te Fatu e, ia faanahonahohia te mau melo o te autahu‘araa ei mau pŭpŭ autahu‘araa. Te hoê pŭpŭ autahu‘araa o te hoê ïa amuiraa taea‘e tei mau i te hoê â toro‘a autahu‘araa.
E toru pŭpŭ autahu‘araa i roto i te Autahu‘araa a Aarona:
-
Te pŭpŭ diakono, 12 diakono te faito rahi roa (a hi‘o PH&PF 107:85). Na te episekopo e pii i te peresideniraa o te pŭpŭ diakono i rotopu i te mau melo iho o te pŭpŭ.
-
Te pŭpŭ haapii, e 24 te faito rahi roa (a hi‘o PH&PF 107:86). Na te episekopo e pii i te peresideniraa o te pŭpŭ haapii i rotopu i te mau melo iho o te pŭpŭ.
-
Te pŭpŭ tahu‘a, e 48 te faito rahi roa (a hi‘o PH&PF 107:87–88). Na te episekopo o te paroita e faatere i te pŭpŭ tahu‘a o te reira paroita. E tahu‘a rahi te episekopo e e melo atoa oia no te pŭpŭ tahu‘a rahi.
Mai te mea e, e hau atu te rahiraa o te mau melo o te pŭpŭ i te faito i faataahia, e nehenehe e vahi i te pŭpŭ.
Te mau Pŭpŭ o te Autahu‘araa a Melehizedeka
No te Ekalesia taatoa, ua riro te mau melo o te Peresideniraa Matamua ei pŭpŭ, e na reira atoa na Ahuru ma Piti Aposetolo. Ua faanahonaho-atoa-hia te mau Hitu Ahuru ei mau pŭpŭ.
I roto i te mau ti‘ahapa o te Ekalesia – i roto i te mau paroita e te mau amaa e te mau tĭtĭ e te mau mataeinaa – e faanahonahohia te mau melo o te Autahu‘araa a Melehizedeka ei mau pŭpŭ:
Pŭpŭ Peresibutero
Te pŭpŭ peresibutero tata‘itahi «ua haapa‘ohia ïa no te mau orometua vai maoro; noa’tu i te reira e ti‘a ïa ia ratou ia tere haere, teie râ, ua faatoro‘ahia ratou ei mau orometua vai maoro » (PH&PF 124:137). E rave ratou i te rahiraa o ta ratou ohipa i piha‘i iho i to ratou fare. Te faito rahi roa i roto i te pŭpŭ peresibutero e 96 ïa, e e peresidenihia te reira e te hoê peresideniraa pŭpŭ. Ia hau ana‘e te reira numera, e ti‘a ïa ia vahi te pŭpŭ.
Te Pŭpŭ Tahu‘a Rahi
E tai‘ohia i roto i te reira pŭpŭ te mau tahu‘a rahi atoa e noho ra i roto i te oti‘a o te hoê tĭtĭ, ma te tai‘o atoa i te mau patareareha e te mau episekopo. Te peresideni tĭtĭ e to’na na tauturu te peresideniraa o te reira pŭpŭ. E faanahohia te mau tahu‘a rahi o te paroita tata‘itahi ei pŭpŭ e na te tia‘i pŭpŭ e faatere.
Te Faufaa o te mau Pŭpŭ Autahu‘araa
-
Nahea te mau pŭpŭ autahu‘araa ia tauturu no te haapuai i te mau taata e te mau utuafare ?
Ia faatoro‘ahia te hoê taata e aore râ te hoê tamaiti i te autahu‘araa, e riro mai oia ei melo no te pŭpŭ autahu‘araa. Mai taua taime ra e i roto i te oraraa taatoa, ua titauhia ia’na ia vai noa ei melo no te hoê pŭpŭ autahu‘araa ia au i to’na toro‘a (a hi‘o Boyd K. Packer, « Eaha te Ti‘a i te mau Peresibutero atoa ia Ite – e te mau Tuahine atoa: E Omuaraa no te mau Parau Tumu o te Faatereraa Autahu‘araa », Ensign, Fepuare 1993, 9).
Mai te mea e, e tere maitai te hoê pŭpŭ autahu‘araa, e itoito te mau melo o te pŭpŭ, e haamaitaihia ratou, e tupu te auhoaraa, e e haapiihia ratou i te evanelia na to ratou mau ti‘a faatere. Noa’tu e, e haamauruuruhia te hoê taata i to’na piiraa i roto i te Ekalesia, mai te hoê orometua haapii, te peresideni pŭpŭ autahu‘araa, te episekopo, te melo apooraa teitei, e aore ra, te peresideni tĭtĭ, aita e taui to’na ti‘araa melo i roto i te pŭpŭ. E faarirohia te ti‘araa melo i roto i te hoê pŭpŭ autahu‘araa ei haamaitairaa mo‘a.
Te mau pŭpŭ tauturu i te Autahu‘araa
-
Nahea te mau pŭpŭ tauturu i te autahu‘araa ia tauturu i te faaitoitoraa i te mau taata e te mau utuafare ?
E rave te mau pŭpŭ tauturu atoa i roto i te Ekalesia i te ohipa i raro a‘e i te arata‘iraa a te mau ti‘a faatere o te autahu‘araa e e tauturu ia ratou ia rave i te ohipa a te Fatu. Ei hi‘oraa, e tavini te mau peresideniraa o te Sotaiete Tauturu, te Feia Apî Tamahine, te Feia Apî Tamaroa, te Paraimere e te Haapiiraa Sabati, i raro a‘e i te arata‘iraa a te episekoporaa. E parauhia taua mau pŭpŭ ra te mau pŭpŭ tauturu i te autahu‘araa.
-
Outou te mau taata tata‘itahi, eaha ta outou ohipa e rave no te tauturu i te mau pŭpŭ autahu‘araa e te mau pŭpŭ tauturu ia manuïa ?
Te tahi atu mau Papa‘iraa Mo‘a
-
Alama 13:1–19 (te huru no te faatoro‘araa i te tane i roto i te autahu‘araa)
-
Mataio 16:19; PH&PF 68:12 (horo‘ahia i te mau aposetolo te mau taviri e te mana o te autahu‘araa; ta ratou e haamau i ni‘a i te fenua nei e haamau-atoa-hia i te ra‘i ra)
-
PH&PF 20:38–67 (te mau ohipa a te mau peresibutero, te mau tahu‘a, te mau haapii, te mau diakono)
-
1 Korinetia 12:14–31 (e mea faufaa te mau toro‘a atoa o te autahu‘araa)