Pene 11
Te Oraraa o te Mesia
Ua Tohu-a‘e-na-hia te Oraraa o te Mesia hou To’na Fanauraa
Ua ti‘aturi te mau taata atoa e haere mai Iesu Mesia i ni‘a i te fenua nei no te faatupu i te fafauraa ta’na i faaoti i te ra‘i ra, oia hoi, ia riro ei Faaora no tatou. Ia ore Oia ra, ua ore atoa ïa te taatoaraa o te opuaraa o te faaoraraa. No te faufaa rahi o te misioni a te Mesia, ua faaite papû mai te mau peropheta atoa mai ia Adamu e tae roa mai i te Mesia e, e tae papû mai Oia (a hi‘o Te Ohipa 10:43). Ua faaite mai te mau peropheta atoa mai te tau o te Mesia e, e haere mai oia. E mea ti‘a ia tatou tata‘itahi ia tuatapapa i te oraraa o te Faaora e ia pee Ia’na ma te haapa‘o i roto i to tatou oraraa taatoa.
Ua parau atu te hoê melahi ia Adamu e, te i‘oa o te Faaora, o Iesu Mesia ïa (a hi‘o Mose 6:51–52). Ua ite o Enoha e e pohe o Iesu i ni‘a i te satauro e e ti‘a faahou mai (a hi‘o Mose 7:55–56). Ua faaite atoa o Noa raua o Mose no ni‘a Ia’na (a hi‘o Mose 1:11; 8:23–24). Ua ite Isaïa i te oraraa o te Faaora e 800 matahiti hou te fanau-raa-hia te Faaora i ni‘a i te fenua nei. I to Isaïa iteraa i te mauiui e te oto ta te Faaora e farii no te aufau i ta tatou mau hara, ua na ô a‘era Oia e:
« I vahavahahia Oia, e aore ra i haapa‘ohia e te taata; e taata mataro i te oto, e ua ite hoi i te mihi. …
« …Ua rave mau râ Oia i to tatou paruparu, e ua hopoi ê oia i to tatou oto. …
« I paruparu râ oia i ta tatou nei hara, i tairihia oia i to tatou nei ino. …
« Ua rave-ino-hia ho‘i Oia, e ua faahaehaahia mai ra, aita râ To’na vaha i parau; i arata‘ihia Oia mai te fanau‘a mamoe i te taparahiraa ra » (Isaia 53:3–5, 7).
Ua ite atoa o Nephi i te hoê orama no ni‘a i te fanauraa e te ohipa a te Faaora. Ua ite oia i te hoê paretenia purotu maitai , e ua faaite mai te hoê melahi e, «Inaha, te paretenia ta outou e hi‘o nei, o te metua vahine ïa o te Tamaiti a te Atua i te tino » (1 Nephi 11:18). E ua ite atu ra o Nephi i te paretenia i te tape‘araa i te hoê tama iti i roto i to’na rima. E ua na ô maira te melahi, « Inaha te arenio a te Atua, oia ïa te Tamaiti a te Metua Hau Mure Ore ra ! » (1 Nephi 11:21).
124 matahiti hou te fanau-raa-hia o Iesu, ua ite atoa te Arii Beniamina, te tahi faahou atu peropheta Ati Nephi, i te oraraa o te Faaora:
« Inaha ho‘i, e tae te tau, e ua fatata roa ho‘i te tau, ta te Fatu Puai Hope, tei ia’na te hau, o te vai ra, e te vai nei mai tahito mai â, e te vai e amuri noa’tu, e tae mai i raro nei no te ra‘i mai, i rotopu i te mau tamarii a te taata nei ma te mana, e e parahi ho‘i i roto i te tino repo, e e haere atu i rotopu i te taata nei i te raveraa i te mau semeio rarahi, oia ho‘i, i te faaoraraa i te taata ma‘i, e te faati‘a-faahou-raa i te taata pohe, e haere te piri‘o‘i ia’na, e ora te matapô, e faaroo te turi, e e ora ho‘i te mau huru ma‘i atoa ia’na ra.
« E e ti‘avaru oia i te mau diabolo, oia ho‘i i te mau varua faufau e noho i roto i te aau o te mau tamarii a te taata nei.
« E inaha, e roohia oia i te mau faahema, e te mauiui o te tino, e te poia, e te poihâ, e te rohirohi, e ore e ti‘a i te taata ia faaoroma‘i i te reira, maori râ e tae oia i te pohe; inaha ho‘i, e hou oia i te toto no to’na mauiui rahi e te ohipa ino e te faufau a to’na ra mau taata.
« E e ma‘irihia to’na i‘oa, o Iesu Mesia, te Tamaiti a te Atua, te Metua o te ra‘i, e te fenua, Tei Hamani i te mau mea atoa mai te matamua mai â; e e ma‘irihia to’na metua vahine i te i‘oa ra ia Maria » (Mosia 3:5–8).
-
Eaha te tahi mau parau tohu i mutaa iho ra no ni‘a ia Iesu Mesia ?
O Oia te Tamaiti Fanau tahi a te Metua
-
Eaha ta Iesu Mesia i farii mai roto mai i To’na Metua ? Eaha Ta’na i farii mai roto mai i To’na metua vahine ?
Ua papa‘ihia te aamu no te fanauraa e te oraraa o te Faaora i roto i te Faufaa Apî, i roto i te buka a Mataio, a Mareko, a Luka e a Ioane. Te ite nei tatou i roto i ta ratou mau papa‘iraa e, ua fanauhia o Iesu e te hoê paretenia tei parauhia o Maria. Ua momo‘ahia oia ia Iosepha i te taime a fâ mai ai te hoê melahi a te Atua ia’na ra. Ua parau mai te melahi ia’na e, e riro oia ei metua vahine no te Tamaiti a te Atua. Ua ani atu oia e mea nahea te reira e tupu ai (a hi‘o Luka 1:34). Ua parau mai te melahi ia’na e, « E pou mai te Varua Maitai i ni‘a iho ia oe, e na te mana o te Teitei e tamărû i ni‘a iho ia oe, e parauhia‘i ho‘i tena na tamaiti mo‘a, o te Tamaiti na te Atua » (Luka 1:35). No reira, ua riro mai te Atua te Metua ei Metua mau no Iesu Mesia.
O Iesu ana‘e te taata i ni‘a i te fenua nei tei fanauhia i te hoê metua vahine tahuti e te hoê metua tane tahuti ore. No reira oia i parauhia‘i te Tamaiti Fanau Tahi. Ua farii oia i te mau mana hanahana na roto mai i To’na Metua. Na roto mai i To’na metua vahine ua farii Oia i te huru tahuti, e e roohia Oia i te poia, te poihâ, te rohirohi, te mauiui e te pohe. Aore e taata e rave i te ora o te Faaora maori râ ua farii oia. E mana To’na no te horo‘a i to’na ora, e e mana ho‘i no te faati‘a faahou i To’na tino i muri a‘e i te pohe. (A hi‘o Ioane 10:17–18).
Ua ora oia i te hoê oraraa ti‘a mau
-
Eaha te auraa o te oraraa o te Faaora no tatou nei ?
Mai To’na apîraa mai â, ua haapa‘o o Iesu i te mau mea atoa ta to tatou Metua i te Ao ra i titau Ia’na ra. I raro a‘e i te arata‘iraa a Maria raua o Iosepha, ua hau atu te paari o Iesu i to te tahi atu mau tamarii. Ua here e ua haapa‘o Oia i te parau mau. Te parau mai nei Luka ia tatou e, « Tupu atura taua tamaiti ra, e itoito atura te aau, î a‘era hoi i te paari: e te vai ra te maitai a te Atua i ni‘a ia’na » (Luka 2:40; a hi‘o atoa PH&PF 93:12–14).
I te 12raa o To’na matahiti, ua ite Oia e, ua tonohia mai Oia no te haapa‘o i te hinaaro o To’na ra Metua. Haere atu ra oia i Ierusalema na muri iho i To’na na metua. E ia ho‘i a‘e ra To’na na metua i te fare, ua ite ihora raua e aita o Iesu i roto i ta raua pŭpŭ. Ua ho‘i faahou atu raua i Ierusalema no te imi Ia’na. « E ru‘i toru a‘e ra, ua ite atu ra raua Ia’na i roto i te hiero ra, te parahi ra i rotopu i te mau orometua, te faaroo atu ra e te ui atu ra ia ratou ». (Iritiraa a Iosepha Semita, Luka 2:46). « Maere ana‘e ihora te feia atoa i faaroo Ia’na ra, i To’na ite e Ta’na parau » (Luka 2:47).
Ua ore atu ra te mana‘o tapitapi o Iosepha raua o Maria i te iteraa’tu Ia’na, area râ, « hitimaue atura raua: ua parau atura ta’na metua vahine ia’na, E ta‘u tamaiti, eaha oe i na reira mai ai ia maua ? Inaha, i imi noa na maua o to metua tane ia oe ma te oto ». Ua parau atura Iesu ia’na na ô atura, « Aita orua i ite e ia haapa‘o vau i ta ta‘u Metua (i te Ao ra) e ti‘a‘i » (Luka 2:48–49).
No te faatupu i Ta’na ohipa, ua titauhia ia Iesu ia haapa‘o i te hinaaro o To’na Metua i te Ao ra. I muri a‘e, ua parau Oia e, « Aore a‘u peu rave noa, o ta tau Metua râ i haapii mai ia‘u ra, o ta‘u ïa e parau nei. …E aore hoi au i faaea i te rave i te mea e mauruuru ai oia ra » (Ioane 8:28–29).
Ia 30 a‘e ra te matahiti o Iesu, ua haere maira Oia ia Ioane Bapetizo ra ia bapetizohia Oia i roto i te pape i Ioridana ra. Ua oti‘ati‘a rii o Ioane ia bapetizo ia Iesu i te mea e, ua ite oia e, ua rahi a‘e Iesu ia’na. Ua ani râ Iesu ia Ioane ia bapetizo Ia’na « ei faati‘araa hoi i te mau parau-ti‘a atoa ra ». No reira, ua bapetizo ihora Ioane i te Faaora, ma te utuhi i To’na tino taatoa i roto i te pape. Ia oti a‘e ra Iesu i te bapetizohia, ua parau maira To’na Metua mai te ra‘i mai, na ô maira, « Ta‘u Tamaiti here teie, ua mauruuru roa vau ia’na ». Ua pou maira te Varua Maitai, mai te uupa ra te huru. (a hi‘o Mataio 3:13–17).
I muri a‘e i to Iesu bapetizo-raa-hia, ua haapae oia i te maa e 40 mahana e e 40 ru‘i no te parahi i piha‘i iho i te Atua. I muri iho i te reira, ua haere maira Satane e faahema Ia’na. Ua pato‘i etaeta Iesu i te mau faahemaraa atoa a Satane e ua faaue atu ra ia Satane ia haere ê atu. (a hi‘o Mataio 4:1–11; a hi‘o atoa Iritiraa a Iosepha Semita, Mataio 4:1, 5–6, 8–9, 11). Ua vai hara ore noa Iesu Mesia, te taata parau ti‘a hope roa tei taahi i ni‘a i te fenua nei (a hi‘o Hebera 4:15; 1 Petero 2:21–22).
-
Eaha te mau aamu no ni‘a i te oraraa o te Faaora tei riro ei mea faufaa no outou ?
Ua haapii mai Oia ia tatou nahea ia here e ia tavini i te tahi e te tahi
-
E mea nahea to te Faaora haapiiraa mai ia tatou e nahea ia here e ia tavini i te tahi e te tahi ?
E oti a‘e ra Oia i te haapae e i te aro ia Satane, ua haamata a‘era Iesu i Ta’na ohipa i rotopu i te taata nei. Ua haere mai oia i te fenua nei eiaha no te pohe noa no tatou, no te haapii atoa râ ia tatou e nahea ia ora. Ua haapii Oia e, te vai ra e piti faaueraa rahi: a tahi, ia aroha i te Atua ma to tatou aau atoa, to tatou varua atoa, e to tatou puai atoa; e te piti, ia aroha ia vetahi ê mai to tatou aroha ia tatou iho (a hi‘o Mataio 22:36–39). Ua riro To’na oraraa ei hi‘oraa na tatou nahea tatou ia haapa‘o i teie na faaueraa e piti. Mai te mea e, e here tatou i te Atua, e ti‘aturi ïa tatou Ia’na e e faaroo Ia’na, mai ia Iesu i na reira. Mai te mea e aroha tatou ia vetahi ê, e tauturu ïa tatou ia ratou, e pahono i to ratou mau hinaaro i te pae tino e te pae varua.
Ua ora Iesu ma te tavini ia vetahi ê. Ua faaora i to ratou mau ma‘i. Ua ite te matapô, ua faaroo te turi, e ua haere te piri‘o‘i. I te hoê taime a faaora ai Oia i tei pohehia i te ma‘i, ua ma‘iri roa te taime e ua po‘ia te taata. Aita oia i faaho‘i ia ratou, ua haamaitai râ Oia e pae faraoa e e piti i‘a, e na roto i te hoê a‘e ra ua amu te tiri‘a taata e 5,000. (a hi‘o Mataio 14:14–21). Ua haapii mai Oia e, ia ite noa’tu tatou i te hoê taata tei po‘ia, tei to‘eto‘e, tei vai tahaa noa, e aore râ, tei vai otare noa, e imi tatou i te mau rave‘a atoa no te tauturu ia ratou. A tauturu ai ho‘i tatou ia vetahi ê ra, te tavini ra ïa tatou i te Fatu. (A hi‘o Mataio 25:35–46).
Ua aroha Iesu ia vetahi ê ma To’na aau atoa. E mea pinepine To’na aau i te î i te aroha e te oto ho‘i. Ua here Oia i te mau tamarii, i te ruhiruhia, e tei haehaa, te feia ha‘iha‘i tei faaroo Ia’na. Ua here atoa Oia i tei hara, e na roto i te aroha rahi ua haapii Oia ia ratou ia tatarahapa e ia bapetozohia. Ua haapii Oia e, « O vau te e‘a, e te parau mau e te ora » (Ioane 14:6).
Ua here atoa Oia i tei hara ia’na ra e aita i tatarahapa. I te hopea o To’na oraraa, a patitihia ai Oia i ni‘a i te satauro, ua pure Oia i te Metua no te mau faehau tei faasatauro Ia’na, mai te parau e, « E tau Metua, e faaore mai i ta ratou hara, aore ho‘i ratou i ite i ta ratou e rave nei » (Luka 23:34). Ua haapii mai Oia e, « Teie tau parau, ia aroha outou ia outou iho, mai ia‘u e aroha’tu ia outou na » (Ioane 15:12).
-
Eaha te tahi mau rave‘a e ti‘a ai ia tatou ia faaite i te Fatu e, ua here tatou Ia’na ?
Ua faanahonaho Oia i te hoê noa iho Ekalesia mau
-
Eaha te Faaora i faanahonaho ai i Ta’na Ekalesia e i faatoro‘a ai i te mau Aposetolo ?
Ua hinaaro Iesu ia haapiihia Ta’na evanelia i te taata ati a‘e te fenua nei, no reira, ua ma‘iti Oia hoê ahuru e ma piti Aposetolo no te faaite Ia’na. O ratou te mau ti‘a faatere matamua o Ta’na Ekalesia. Ua farii ratou i te mana no te rave i te ohipa i To’na ra i‘oa e ia rave i te mau ohipa ta ratou i ite Ia’na i te raveraa. Te feia tei farii i te mana no roto mai ia ratou, ua ti‘a atoa ïa ia ratou ia haapii, ia bapetizo, e ia rave i te tahi atu mau oro‘a i To’na ra i‘oa. I muri a‘e i To’na poheraa, ua tamau noa ratou i te rave i Ta’na ohipa e tae roa’tu i te taime ua ino roa te taata e ua tae roa i te taparahi pohe i te mau Aposetolo.
Ua Faaora Oia ia Tatou i ta Tatou mau Hara e i te Pohe
-
Ia tuatapapa outou i teie tuhaa, a feruri maite i ni‘a i te mau ohipa tei tupu no ni‘a i te Taraehara.
I te pae hopea o Ta’na ohipa i te tahuti nei, ua faaineine Iesu Ia’na no te rave i te tusia hopea no te mau hara atoa a te taata nei. Ua faautuahia Oia i te utua pohe no te mea ua faaite Oia i mua i te taata e, Oia te Tamaiti a te Atua.
I te aru‘i hou To’na faasatauroraa, ua haere atu Iesu i roto i te hoê aua tei parauhia o Getesemane. E i reira ua ite Oia i te teimaha rahi o te pe‘ape‘a e ua ua pure Oia ma te oto. Ua faati‘ahia ia Orson F. Whitney, te hoê Aposetolo o te mau mahana hopea nei, ia ite i te mamae o te Faaora i roto i te hoê orama. A ite ai oia i te oto o te Faaora, na ô a‘e ra oia e: « Ua oto roa a‘e ra vau i to‘u iteraa i te reira e ua ta‘i au, no to‘u here ia ratou. E aroha rahi to‘u Ia’na; ua here au Ia’na ma to‘u aau atoa, e aita e nehenehe e parau to‘u hinaaro ia parahi i piha‘i iho Ia’na » (« Te hanahana o Iesu Mesia », Improvement Era, Tenuare 1926, 224–25; a hi‘o atoa Ensign, Titema 2003, 10). « Haere atu ra (Iesu) i mua iti atu, tipapa ihora i raro ma te pure, na ô atu ra, E tau Metua e, ia ti‘a ra, e hopoi ê atu i teie nei au‘a, ia tupu râ to oe hinaaro, eiaha to‘u » (Mataio 26:39).
I roto i te hoê heheuraa no teie tau, ua faaite mai te Faaora i To’na mamae rahi, ma te parau e, na te reira i faatupu « i te rurutaina no te mauiui, e ua tahe maira te toto na te mau poa atoa, e ua mauiui i te tino e te varua atoa ho‘i » (PH&PF 19:18). Ua faaoroma‘i Oia « i te mamae tino », ia rave i ni‘a Ia’na iho i to tatou mau mauiui, to tatou mau ma‘i, to tatou mau paruparu e ta tatou mau hara (a hi‘o Alama 7:10–13). Aore e taata tahuti e ti‘a ia haro‘aro‘a i te teimaha o taua utu‘a ra. Aore e taata ê atu e nehenehe e faaoroma‘i i taua huru mamae o te tino e te varua. « Ua pou Oia i raro a‘e i te mau mea atoa ra … ia ti‘a ia’na ia vai i roto i te mau mea atoa e na roto hoi i te mau mea atoa te maramarama no te parau mau » (PH&PF 88:6).
Aita râ taua mauiui No’na ra i hope i reira. I te mahana i muri a‘e, ua taparahihia Iesu, ua faahaamahia, e ua tufahia i te huare. Ua faahepohia Oia ia amo i To’na satauro; ua hutihia e ua patitihia Oia i ni‘a iho. Ua rave-ino-hia Oia i te hoê o te mau raveraa ri‘ari‘a aita te taata i na reira a‘e nei. I muri a‘e i To’na mauiui rahi i ni‘a i te satauro, ua piihua’tura Oia ma te oto, « E tau Atua, E tau Atua, Eaha oe i faaru‘e mai ai ia‘u ? » (Mareko 15:34). I roto i taua hora ahoaho roa a‘e no Iesu ra, ua faaatea ê te Metua Ia’na, ia ti‘a ia Iesu ia faaoti hope roa i te mauiui o te faautuaraa no te mau hara a te mau taata atoa, ia ti‘a ia Iesu ia upooti‘a hope roa i ni‘a i te mau puai o te hara e te pohe (a hi‘o Iakobo E. Talmage, Iesu te Mesia, neneiraa 3 [1916], 660–61).
Ia ite a‘era te Faaora e ua farii te Metua i Ta’na tusia, ua piihua a‘era To’na reo i te na ôraa e, « Ua oti » (Ioane 19:30). « E tau Metua, te tuu atu nei au i tau varua i to rima na » (Luka 23:46). Ua taupe ihora To’na upoo i raro e ua tuu atura i To’na varua. Ua pohe ihora te Faaora. Tupu ihora te aueueraa rahi i te fenua nei.
Ua rave a‘e ra te tahi mau hoa i te tino o te Faaora tuu atura i roto i te menema, e toru a‘era mahana i te vairaa i reira. I taua taime ra, ua haere atu To’na varua e faanahonaho i te ohipa misionare no te tahi atu mau varua tei titau-atoa-hia ia farii i Ta’na evanelia (a hi‘o 1 Petero 3:18–20; PH&PF 138). I te toru o te mahana, e Sabati, ua ho‘i faahou mai Oia e rave i To’na tino. Oia te matamua tei upooti‘a i ni‘a i te pohe. Tupu mau atu ra te parau i tohuhia ra e « e ti‘a faahou mai oia i pohe ra » (Ioane 20:9).
I muri noa iho i To’na ra Tia‘-faahou-raa, ua fâ atu te Faaora i to te Ati Nephi e ua faati‘a’tura i Ta’na Ekalesia i te fenua Amerika. Ua haapii Oia i te mau taata i reira ra e ua haamaitai ia ratou. E itehia teie aamu nehenehe i roto i te 3 Nephi 11 e tae atu i te 28.
Ua riro To’na Tusia ei Faaiteraa i To’na Here i To’na Metua e ia Tatou nei
Ua haapii mai Iesu e: « Ia horo‘a te taata i to’na iho ora no to’na ra mau taua, aita roa e taata aroha ê atu i te reira. O outou to‘u mau taua, ia haapa‘o outou i te mau parau atoa ta‘u i parau atu ia outou na » (Ioane 15:13–14). Ua farii Oia ma te hinaaro mau e te haehaa i te oto i Getesemane e te mamae i ni‘a i te satauro ia ti‘a ia tatou ia farii i te mau haamaitairaa atoa o te faanahonahoraa o te faaoraraa. No te farii i te reira mau haamaitairaa, e haere mai tatou Ia’na ra e ti‘a ai, e tatarahapa i ta tatou mau hara, e ia here Ia’na ma to tatou aau atoa. Ua parau mai Oia e:
« Inaha, o teie te evanelia ta‘u i horo‘a’tu ia outou – I haere mai au i te ao nei e rave i to te Metua hinaaro, no te mea na ta‘u Metua i to’no mai ia‘u.
« I tono mai ta‘u Metua ia‘u ia faateiteihia vau i ni‘a i te satauro, e ia oti to‘u faateitei-raa-hia i ni‘a i te satauro ra, ia ume mai au i te mau taata atoa ra ia‘u … ia haavahia ratou i te au i ta ratou mau ohipa. …
« O ta‘u hoi ohipa i rave i to outou hi‘oraa ra, o ta outou ïa e rave. …
« No reira, eaha to outou huru e au ai ? Amene e parau atu vau ia outou, mai to‘u nei ïa » (3 Nephi 27:13–15, 21, 27; papa‘i faaopa i amuihia’tu).
-
Eaha to outou mau mana‘o a feruri hohonu ai outou i te tusia o te Faaora no outou ?
Te tahi atu mau papa‘iraa mo‘a e te tahi atu mau tautururaa
-
2 Nephi 25:12 (Te Tamaiti Fanau Tahi a te Metua i te tino nei)
-
Mose 6:57 (I parauhia Iesu Mesia te Tamaiti Fanau Tahi)
-
Mataio, Mareko, Luka, Ioane (te oraraa e te mau haapiiraa a Iesu Mesia)
-
Mataio 10:1–8; Luka 9:1–2 (Faatoro‘ahia te mau Aposetolo na roto i te puai e te mana)
-
Mataio 26–28; Mareko 14–16; Luka 22–24; Ioane 18–20 (Iesu i roto i te aua; hamani-ino-hia; faasataurohia, e ti‘afaahou)
-
« Te Mesia ora: Te iteraa papû o te mau Aposetolo », Ensign, Eperera 2000, 2–3