Pene 36
E Nehenehe te Utuafare ia Riro ei mea Mure Ore
Te Faufaa o te Utuafare
-
No te aha te Metua i te Ao ra i tono mai ai ia tatou i te fenua nei ei melo no te utuafare ?
« Na te Atua i haamau i te faaipoiporaa i rotopu i te tane e te vahine. …Tei ropu te utuafare i te faanahonahoraa a tei Hamani no te hopearaa mure ore o Ta’na mau tamarii » (« Te Utuafare: E Poro‘i i to te Ao nei », Ensign, Novema 1995, 102).
I muri a‘e i to te Metua i te Ao ra faaipoiporaa ia Admau raua o Eva, ua faaue atu ra Oia ia raua ia fanau i te tamrii (a hi‘o Genese 1:28). Ua heheu mai Oia e, te hoê o te mau tumu o te faaipoiporaa o te horo‘araa ïa i te tino tahuti i Ta’na mau tamarii varua. E apiti te mau metua i to tatou Metua i te Ao ra. Ua hinaaro Oia i Ta’na mau tamarii tata‘itahi ia farii i te hoê tino tahuti e ia ora i te fenua nei. Ia fanau mai te hoê tane e te hoê vahine i te tamarii i roto i te ao nei, te tauturu nei ïa raua i te Metua i te Ao ra ia faatupu i Ta’na faanahonahoraa.
E mea ti‘a ia farii-poupou-hia te tamarii apî tata‘itahi i roto i te utuafare. E tamarii ana‘e tatou na te Atua. E rave tatou i te taime no te faaoaoa i ta tatou mau tamarii, ia hauti e o ratou, e ia haapii ia ratou.
Ua parau te Peresideni David O. McKay e, « Ma to‘u aau atoa te ti‘aturi nei au e, te vahi maitai a‘e no te faaineine no te …ora mure ore o te utuafare ïa » (« Blueprint for Family Living », Improvement Era, Eperera 1963, 252). I te utuafare, e to tatou utuafare, e nehenehe ta tatou e haapii i te haavi ia tatou iho, te tusia, te haapa‘o, e te faufaa o te ohipa. E haapii tatou i te here, te horo‘a, e te tavini te tahi e te tahi.
E hopoi‘a na te metua tane e te metua vahine ia haapii i ta raua mau tamarii no ni‘a i te Metua i te Ao ra. E faaite raua na roto i te hi‘oraa e, ua here raua Ia’na no te mea te haapa‘o nei raua i Ta’na mau faaueraa. E haapii atoa te mau metua i ta ratou mau tamarii ia pure e ia haapa‘o i te mau faaueraa (a hi‘o Maseli 22:6).
-
No te aha te utuafare i riro ai ei vahi maitai a‘e no te faaineine no te ora mure ore ?
-
Nahea e ti‘a ai ia tatou ia tauturu i te feia apî o te Ekalesia ia ite i te mo‘a o te utuafare e o i te fafauraa o te faaipoiporaa ?
Te Utuafare Mure Ore
E ti‘a i to tatou utuafare ia amuï-tahi-hia e amuri noa’tu. No te farii i taua haamaitairaa ra, ua titauhia ia tatou ia faaipoipo i roto i te hiero. Ia faaipoipohia te taata i rapae au i te hiero, e hope ïa taua faaipoiporaa ra ia pohe te hoê o raua. Ia faaipoipohia râ tatou i roto i te hiero na roto i te mana o te Autahu‘araa a Melehizedeka, ua faaipoipohia ïa tatou no teie tau e no te tau amuri atu. Mai te mea e, e haapa‘o tatou i ta tatou mau fafauraa i te Fatu ra, e amuï-tahi-hia to tatou utuafare ei tane e ei vahine faaipoipo e te mau tamarii e amuri noa’tu. E ore e ti‘a i te pohe ia faataa ê ia tatou.
Te mau Autaatiraa Here o te Utuafare
-
Nahea tatou ia faahotu i te au maite rahi a‘e i roto i to tatou utuafare ?
E ti‘a i te tane e te vahine faaipoipo ia faaite i te haapa‘o maitai e te mărû te tahi e te tahi. Eiaha raua e rave e aore râ, e parau i te hoê mea o te haape‘ape‘a i te aau o te tahi e te tahi. E tamata atoa raua i te imi i te mau rave‘a atoa no te faaoaoa i te tahi e te tahi.
Ia ite te mau metua i te Atua e ia rohi ia riro mai Ia’na te huru, e haapii ïa ratou i te mau tamarii ia here te tahi e te tahi. I roto i te Buka a Moromona, ua haapii mai te Arii Beniamina e:
« E ore roa outou e tuu noa’tu i ta outou mau tamarii … ia tama‘i e ia mârô ho‘i te tahi e te tahi. …
« E haapii râ outou ia ratou ia haere na te e‘a o te parau ti‘a e te haapa‘o maitai ra; e haapii ho‘i outou ia ratou ia aroha te tahi i te tahi, e ia tauturu te tahi i te tahi » (Mosia 4:14–15).
Ei mau melo no te utuafare e nehenehe ta tatou e tauturu i te tahi e te tahi ia ti‘aturi na roto i te faaitoitoraa e te haapoupouraa. E ti‘a i te tamarii tata‘itahi ia ite e, e mea faufaa oia. E ti‘a i te mau metua ia faaite i to ratou anaanatae i te mau mea e ravehia nei e ta ratou mau tamarii e ia faaite i to ratou here e te mana‘ona‘o i ta ratou mau tamarii. E na reira atoa te mau tamarii i te faaite i to ratou here i to ratou na metua. Ia riro ratou ei mau tamarii haapa‘o e ia tamata ia ora i te huru oraraa o te hopoi mai i te faaturaraa i to ratou na metua e i te i‘oa o to ratou utuafare.
-
Nahea te mau metua ia faaitoito i ta ratou mau tamaiti e te mau tamahine ia riro ei mau hoa maitai te tahi e te tahi ? Nahea te mau taea‘e e te mau tuahine ia faatupu tamau noa i to ratou auhoaraa te tahi e te tahi ?
-
Nahea te tane e te vahine faaipoipo ia tauturu te tahi e te tahi ia oaoa ?
Nahea e Noaa ai te Hoê Utuafare Maitai
-
Eaha ta outou e rave nei no te haapuai i to outou utuafare e ia faariro ei utuafare manuïa ?
Ua haapii mai te Peresideni Harold B. Lee e, « Te ohipa faufaa roa a‘e a te Fatu ta outou e rave, tei roto ïa i na papa‘i o to outou iho fare » (Te mau Haapiiraa a te mau Peresideni o te Ekalesia: Harold B. Lee [2000], 134).
Ua ite o Satane i te faufaa rahi o te utuafare i roto i te faanahonahoraa a to tatou Metua i te Ao ra. Te imi nei oia i te rave‘a ia haamou i te reira na roto i te opaniraa ia tatou ia haafatata i te Fatu ra. E faahema oia ia tatou ia rave i te mau mea o te faaatea i to tatou utuafare.
Ua parau mai te Peresideniraa Matamua e te Pŭpŭ no te Tino Ahuru Ma Piti Aposetolo e, « Ua haamauhia e te tape‘ahia nei te mau faaipoiporaa e te mau utuafare manuïa i ni‘a i te mau parau tumu o te faaroo, te pure, te tatarahapa, te faaoreraa hapa, te faatura, te here, te aroha, te ohipa e te mau faaoaoaraa maitai » (Ensign, Novema 1995, 102).
Te hinaaro nei tatou paatoa i te utuafare oaoa e te manuïa. Teie te tahi mau mea e tauturu ia tatou ia farii i te reira:
-
A faatupu i te pure utuafare i te mau pô e i te mau po‘ipo‘i atoa (a hi‘o 3 Nephi 18:21). E pure amui te tane e te vahine faaipoipo.
-
A haapii i te tamarii i te evanelia i te mau hepetoma atoa i roto i te pô utuafare.
-
A tai‘o tamau i te mau papa‘iraa mo‘a e te utuafare.
-
A amui te utuafare no te rave i te tahi mau mea, mai te mau Ôpuaraa ohipa, te haereraa e orihaere, e te raveraa i te faaotiraa.
-
A haapii ia riro ei taata maitai, te faaoroma‘i, te faaoroma‘i maoro, e te aroha (a hi‘o Moroni 7:45–48).
-
A haere tamau i te mau pureraa a te Ekalesia (a hi‘o PH&PF 59:9–10).
-
A haapa‘o i te a‘oraa a te Fatu i roto i te PH&PF 88:119: « A haamau na ia outou iho, a faaineine i te mau mea atoa e hinaarohia ra; e a haamau i te hoê fare, oia ei fare no te pure, ei fare no te haapaeraa maa, ei fare no te faaroo, ei fare no te haapiiraa, ei fare no te hanahana, ei fare no te haapa‘o, ei fare ho‘i no te Atua ».
-
A papa‘i i te aamu utuafare, haere amui e rave i te ohipa i te hiero, e ia farii i te mau Oro‘a taatiraa o te hiero.
Te utuafare te ti‘ahapa faufaa roa a‘e i roto i te Ekalesia a Iesu Mesia i te Feia Mo‘a i te mau Mahana Hopea nei. Te vai nei te Ekalesia no te tauturu i te mau utuafare ia roaa te mau haamaitairaa mure ore e te faateiteiraa. Ua faataahia te mau pŭpŭ tauturu e te mau faanahonahoraa i roto i te Ekalesia no te faaitoito ia tatou tata‘itahi e no te tauturu ia tatou ia ora ei utuafare e a muri noa’tu.
-
Eaha ta te utuafare e rave i roto i te mau taime fifi ?
-
Eaha te tapa‘o tei faaite ia outou e, ua tupu mau te taa-ê-raa na roto i te mau ohipa i ravehia mai te pure utuafare, tai‘oraa te utuafare i te mau papa‘iraa mo‘a, te apooraa utuafare, te taamaaraa utuafare, e te pô utuafare ?
Te Tahi atu mau Papa‘iraa Mo‘a e mau Tautururaa
-
Mose 2:27–28 (ua hamanihia e ua haamaitaihia te tane e te vahine)
-
Genese 2:24 (e ati atu te tane i ta’na vahine)
-
PH&PF 49:15–16 (na te Atua i haamau i te faaipoiporaa)
-
Ephesia 6:4 (a haapii i te tamarii i roto i te parau ti‘a)
-
PH&PF 132:15–21 (faaipoiporaa mure ore)
-
PH&PF 88:119–26 (te mau arata‘iraa no te hoê utuafare maitai)
-
PH&PF 93:40–50 (ua faaue mai te Fatu i te mau metua ia arata‘i i ta ratou mau tamarii i roto i te maramarama e te parau mau)
-
« Te Utuafare: E Poro‘i i to te Ao nei » (te vai ra i ni‘a i te LDS.org e i roto i te mau buka e rave rahi a te Ekalesia, mai te Ensign, Novema 1995, page 102; No te Puai o te Feia Apî: Raveraa i ta Tatou Ohipa i te Atua [buka numera 36550], api 44; e Haapa‘o i te Faaroo: Faahororaa Evanelia [buka numera 36863], api 59–61)