Buka ’e ha’api’ira’a
Pene 7: Te Varua Maitai

Pene 7

Te Varua Maitai

Ua Haere mai ra te Varua maitai ia Adamu e ia Eva ra.

  • No te aha Adamu e o Eva i hinaaro ai i te arata‘iraa a te Varua Maitai ?

I muri a‘e i to Adamu e i to Eva faaru‘eraa’tu i te Ô i Edene ra, ua haamata a‘e ra raua i te faaapu i te fenua e i te rave i te tahi atu mau ohipa no to raua oraraa. Ua fanau raua e rave rahi tamarii, e ua faaipoipo ta raua mau tamaiti e mau tamahine (a hi‘o Mose 5:1–3). No reira, ua haamata te mau tamarii varua a to tatou Metuai te Ao ra i te faaru‘e atu ia’na no te haere mai i te fenua nei mai tei fafauhia ia ratou ra (a hi‘o Aberahama 3:24–25). I to ratou taeraa mai i te fenua nei, ua mo‘e ia ratou te parau no to ratou faaearaa i te ao ra. Aita râ te Metua i iriti ê i Ta’na faaururaa ia ratou. Ua tono Oia i te Varua Maitai no te tamahanahana e no te tauturu e no te arata‘i i Ta’na mau tamarii varua paatoa.

Ua ti‘aoro o Adamu e o Eva i te Metua i te Ao ra na roto i te pure. Ua paraparau Oia ia raua e ua horo‘a ia raua i te mau faaueraa, o ta raua i haapa‘o. Ua haere mai te hoê melahi a te Fatu e haapii ia Adamu e ia Eva i te faanahonahoraa o te faaoraraa. Ua tono mai te Fatu i te Varua Maitai no te faaite papû i te Metua e i te Tamaiti e no te haapii ia Adamu e o Eva i te evanelia. (A hi‘o Mose 5:4–9).

Na roto i te mana o te Varua Maitai, ua haamata a‘e ra o Adamu i te « tohu no ni‘a i te mau Ôpu atoa o te fenua nei, i te na-ô-raa e: Ia haamaitaihia te i‘oa o te Atua, i te mea no to‘u ofatiraa i te ture, ua araara to‘u mata, e i roto i teie oraraa e roaa mai ia‘u te oaoa, e i roto i te i‘o nei e ite faahou ai au i te Atua » (Mose 5:10). E no te faaiteraa a te Varua Maitai ia Eva ra, na ô a‘e ra oia e, « ahiri aita taua i hi‘a, aore ïa i noaa to taua huaai, e aore atoa taua e ite i te maitai e te ino, e te oaoa o to taua faaoraraahia ra, e te orama mure ore o ta te Atua e horo‘a ia ratou atoa o te haapa‘o » (Mose 5:11).

  • E mea nahea to tatou hinaaro i te arata‘iraa no ô mai i te Varua Maitai ra e tuati ai i to Adamu raua o Eva ?

Te mau Huru o te Varua Maitai

  • Eaha te taa-ê-raa i rotopu i te Varua Maitai e te Metua i te Ao ra e te Tamaiti ? No te aha e mea faufaa taua taa-ê-raa ra no tatou ?

Ua riro te Varua Maitai ei melo i roto i te Atuaraa (a hi‘o 1 Ioane 5:7; PH&PF 20:28). E « taata varua » oia (PH&PF 130:22). Tei te vahi hoê noa iho oia i te taime hoê, area Ta’na faaururaa ra, tei te mau vahi atoa ïa i te taime hoê.

Te Metua i te Ao ra, o Iesu Mesia e te Varua Maitai ua parauhia ratou e, te Atuaraa. Ua hoê ratou i roto i te opuaraa. E tuhaa ohipa faufaa rahi ta ratou tata‘itahi i roto i te faanahonahoraa o te faaoraraa. To tatou Metua i te Ao ra to tatou Metua e to tatou faatere. O Iesu Mesia to tatou Faaora. Te Varua Maitai te heheu e te faaite papû i te mau parau mau atoa.

Te Varua Maitai te afa‘ifa‘i parau o to tatou Metua i te Ao ra e ua riro oia ei horo‘a taa ê no tatou (a hi‘o i te pene 21 i roto i teie buka).

Te Ohipa a te Varua Maitai

  • Eaha te tahi mau parau mau ta te Varua Maitai e heheu mai ia tatou ?

Te ohipa a te Varua Maitai o te faaite ïa i te Metua e i te Tamaiti e i te parau mau i te mau mea atoa.

Na te Varua Maitai e faaite ia tatou e, o Iesu to tatou Faaora (a hi‘o 3 Nephi 28:11; PH&PF 20:27). E heheu mai oia ia tatou e, o to tatou Metua i te Ao ra te Metua o to tatou mau varua. E tauturu Oia ia tatou ia ite e, e faateitei-atoa-hia tatou mai to tatou Metua i te Ao te huru. (A hi‘o Roma 8:16–17). Ua fafau mai te mau peropheta a te Fatu e, « e na roto i te mana o te Varua Maitai e ite ai outou i te parau mau i te mau mea atoa ra » (Moroni 10:5).

Aita ana‘e te Varua Maitai ra, eita ïa tatou e ite e o Iesu te Mesia. Ua papa‘i te Aposetolo Paulo e, « aore roa e taata e ti‘a ia parau e o Iesu te Fatu, maori râ, o tei parau i ta te Varua Maitai ra » (1 Korinetia 12:3). Ua na ô mai te Faaora iho e, « teie ho‘i te ora mure ore, ia ite ratou ia oe i te Atua mau ra e ia Iesu Mesia i ta oe i tono mai » (Ioane 17:3). E mea na roto i te mana o te Varua Maitai e roaa ai ia tatou te ite e e ora ai tatou i te evanelia a Iesu Mesia.

No te puai o te mana haaputapu o te Varua Maitai aita’tura tatou e feaa faahou e, e ere te parau mau te mau mea Ta’na i heheu mai. Ua parau te peresideni Joseph Fielding Smith e:

« Ia faauru ana‘e mai te Varua Maitai i te hoê taata, e vaiiho mai oia i te hoê iteraa atea i ni‘a i te varua o te reira taata, te hoê iteraa e ere i te mea ohie ia tumâ. Te Varua teie e paraparau nei i te varua, e tupu te reira ma te puai. Ia fâ mai te hoê melahi, e aore ra, te Tamaiti iho a te Atua, e riro ïa ei ohipa maere no te mata e no te feruriraa e e mo‘e te reira, area te mau faaururaa a te Varua Maitai, e vai papû te reira i roto i te varua, e e ere ïa i te mea ohie ia tumâ » (Te mau pahonoraa no te mau uiraa o te evanelia, haaputuraa. Joseph Fielding Smith Jr., buka 5). [1957–66], 2:151).

Ua parau atoa te Peresideni Smith e, « na roto i te Varua Maitai e mau roa te parau mau i roto i te tino eita ho‘i e mo‘e faahou » (Doctrines du Salut, haaputuraa. Bruce R. McConkie, buka 3. [1954–56], 1:48).

Tatou te mau melo o te Ekalesia a Iesu Mesia i te Feia Mo‘a i te mau Mahana Hopea nei, ia vai ti‘amâ noa tatou no te farii i teie ve‘a taa ê e te ite o to tatou Metua i te Ao ra e o Iesu Mesia.

  • A feruri na i te mau taime a tauturu ai te Varua Maitai ia outou ia tupu i te rahi i roto i to outou iteraa papû. Mai te mea e, e tano, a faaite i te tahi mau iteraa i mua i te mau melo o te piha haapiiraa e aore ra i te mau melo o te utuafare.

Te tahi atu mau papa‘iraa mo‘a