Buka ’e ha’api’ira’a
Pene 4: Te Ti‘amâraa ia Ma‘iti

Pene 4

Te Ti‘amâraa ia Ma‘iti

Man standing at crossroads

E Parau Tumu Mure Ore te Ti‘amâraa

  • Mai te mea e, e ui mai te hoê taata ia outou e, no te aha e mea faufaa ia vai te ti‘amâraa, eaha ta outou pahonoraa ?

« Tei ia oe iho te ma‘iti, ua horo‘ahia’tu te reira ia oe » (Mose 3:17).

Ua parau mai te Atua ia tatou na roto i Ta’na mau peropheta e, e ti‘amâraa to tatou no te ma‘iti i rotopu i te maitai e te ino. E ti‘a ia tatou ia ma‘iti i te ti‘amâraa e te ora mure ore na roto i te peeraa ia Iesu Mesia. E ti‘amâraa atoa to tatou no te ma‘iti i te faatitiraa e te pohe na roto i te peeraa ia Satane. (A hi‘o 2 Nephi 2:27). Te ti‘araa no te ma‘iti i rotopu i te maitai e te ino e no te rave i te ohipa no tatou iho, ua parauhia te reira e, te ti‘amâraa.

I roto i to tatou oraraa hou te tahuti nei e feia ti‘amâ tatou i te pae morare. Te hoê tumu o te oraraa i te fenua nei o te faaiteraa ïa e, eaha te mau ma‘itiraa ta tatou e rave (a hi‘o 2 Nephi 2:15–16). Mai te mea e, e faahepohia tatou ia ma‘iti i te maitai, eita ïa e ti‘a ia tatou ia faaite e, e aha ta tatou e ma‘iti no tatou iho. Oia atoa, e hau a‘e to tatou oaoa i te raveraa i te mau ohipa mai te mea e, na tatou iho i rave i ta tatou mau ma‘itiraa.

Ua riro te ti‘amâraa ei hoê o te mau tumu parau rarahi i tuapapahia i roto i te Apooraa Rahi i te ao ra. O te hoê ïa o te mau tumu rahi i tupu ai te pe‘ape‘a i rotopu i te feia tei pee i te Mesia e te feia tei pee ia Satane. Na ô atu ra Satane, « inaha, tei ŏnei au, a tono ia‘u, ei tamaiti ho‘i au na oe, e na‘u e faaora i te taata atoa, ia ore e mo‘e te hoê, e oia mau na‘u e rave i te reira; no reira, a horo‘a mai ia‘u to oe na tura » (Mose 4:1). I te reira parau, ua « orurehau oia i [te Atua] e ua titau ia haamou i te ti‘amâraa o te taata » (Mose 4:3). Ua pato‘ihia ta’na opuaraa, e ua hurihia oia i rapae i te ra‘i ra e to’na atoa ra mau taata (a hi‘o PH&PF 29:36–37).

Ua riro te ti‘amâraa ei tuhaa faufaa rahi no te faanahonahoraa o te faaoraraa

Te faariro nei te ti‘amâraa i to tatou oraraa i te fenua nei ei pu‘e tau tamataraa. A faaineine ai te Atua e hamani i Ta’na mau tamarii i roto i to ratou huru tahuti nei, na ô a‘era Oia e, « e tamata tatou ia ratou i reira, ia ite tatou e, e haapa‘o anei ratou i te mau mea atoa ta te Fatu to ratou Atua e faaue ia ratou ra » (Aberahama 3:25). Ahiri aita te horo‘a o te ti‘amâraa, e ore roa ïa e ti‘a ia tatou ia faaite i to tatou Metua i te Ao ra e, e haapa‘o tatou i te mau mea atoa Ta’na i faaue mai ia tatou. Inaha râ, no te mea ho‘i ua ti‘a ia tatou ia ma‘iti, no reira, tei ia tatou ïa te hopoi‘a no ta tatou mau ohipa e rave (a hi‘o Helamana 14:30–31).

Ia ma‘iti tatou e haapa‘o i te faanahonahoraa a te Atua no tatou nei, e paari to tatou ti‘amâraa. Na te mau ma‘itiraa ti‘a e faarahi i to tatou puai no te rave rahi atu i te mau ma‘itiraa maitai.

Ia haapa‘o tatou i te mau faaueraa atoa a to tatou Metua, e tupu tatou i te rahi i roto i te paari e i roto ho‘i i te puai o to tatou huru taata. E tupu to tatou faaroo i te rahi. E ite tatou e, e mea ohie a‘e ia rave i te mau ma‘itiraa ti‘a.

Ua haamata a‘e na tatou i te rave i te mau ma‘itiraa a vai tamarii varua ai tatou i mua i te aro o te to tatou Metua i te Ao ra. Na taua mau ma‘itiraa ra i faati‘amâ ia tatou ia haere mai i te fenua nei. Ua hinaaro to tatou Metua i te Ao ra ia tupu tatou i te rahi i roto i te faaroo, te puai, te ite, te paari, e i roto ho‘i i te tahi atu â mau mea maitai ra; Mai te mea e haapa‘o tatou i Ta’na mau faaueraa e ia rave hoi i te mau ma‘itiraa maitai, e roaa te ite e te haroaroa ia tatou. E riro tatou mai Ia’na ra te huru. (A hi‘o PH&PF 93:28).

  • Nahea te mau ma‘itiraa maitai e tauturu ai ia tatou ia rave rahi atu i te mau ma‘itiraa maitai ?

Ia Vai te Ti‘amâraa, e Vai atoa te Ma‘itiraa

  • No te aha e mea titauhia na pae e piti i te mau mea atoa ra ?

Aore e ti‘a ia tatou ia ma‘iti i te parau ti‘a maori râ, tei mua atoa ia tatou na pae e piti, te maitai e te ino. Ua parau o Lehi, te hoê peropheta rahi no te Buka a Moromona, i ta’na tamaiti o Iakoba e, no te faatupu i te mau Ôpuaraa mure ore a te Atua, ia vai ïa « na pae e piti i te mau mea atoa ra. Ahiri aita te reira,… e ore ïa e ti‘a ia faatupu i te parau ti‘a, e ore atoa i te parau ino; e e ore i te parau mo‘a, e ore atoa i te ati; e e ore i te maitai, e ore atoa i te ino » 2 Nephi 2:11).

Ua faati‘a te Atua ia Satane ia pato‘i i te maitai. Teie te parau a te Atua no ni‘a ia Satane:

« I faaue ai au ia hurihia oia i raro;

« E ua riro oia o Satane, oia ïa, o te diabolo, te metua o te mau haavare atoa, ia haavare e ia haamatapo i te taata, e ia arata‘i ia ratou ei tîtî ia au i to’na ra hinaaro, o ratou atoa o te ore e faaro i to‘u nei reo » (Mose 4:3–4).

Te imi nei o Satane i te mau rave‘a atoa no te haamou i te ohipa a te Atua. Te titau nei oia i te « pohe no te mau taata atoa. … Te titau nei oia ia roohia te taata atoa i te ati mai ia’na ihora » (2 Nephi 2:18, 27). Aita oia e here ia tatou. Aita oia e hinaaro hoê noa a‘e mea maitai no tatou (a hi‘o Moroni 7:17). Aita oia e hinaaro ia oaoa tatou. Te hinaaro nei oia e faariro ia tatou ei tîtî na’na. Te faaohipa nei oia e rave rahi mau haavarevareraa no te haru ia tatou.

Ia pee ana‘e tatou i te mau faahemaraa a Satane, te taoti‘a ra ïa tatou i ta tatou mau ma‘itiraa. Na teie hi‘oraa e faaite mai i te huru o te reira. A feruri na e, te ite atu ra outou i te hoê tapa‘o i te pae tahatai te faaite ra e: « E Fifi – te pape. Opanihia ia hopu i teie vahi ». E riro tatou i te feruri e, e taoti‘araa tera. Tera râ, te reira mau anei ? Ua rau ta tatou ma‘itiraa. E ti‘amâraa to tatou no te haere e hopu i te tahi atu vahi. E ti‘amâraa to tatou no te ori haere na ni‘a i te pae tahatai e ia ohi i te poreho. E ti‘amâraa to tatou no te mata‘ita‘i i te toparaa mahana. E ti‘amâraa to tatou no te ho‘i i te fare. E ti‘amâraa atoa to tatou no te tau‘a ore i te reira tapa‘o e ia haere e hopu i te reira vahi fifi. Ia ô ana‘e râ tatou i roto i te opape e ia hutihia i raro, e mea iti roa ta tatou ma‘itiraa i taua taime ra. E nehenehe ta tatou e tamata ia faaora ia tatou, e aore ra, e nehenehe ta tatou e pii i te tauturu, tera râ, e riro tatou i te paremo.

Noa’tu e, e ti‘amâraa to tatou no te ma‘iti i te ohipa ta tatou e rave, aita tatou i ti‘amâ no te ma‘iti i te mau hopearaa o ta tatou mau ohipa. E tae mai te mau hopearaa, te mea maitai anei e aore ra, te mea ino anei, ia au i te ma‘itiraa i ravehia e tatou (a hi‘o Galatia 6:7; Apokalupo 22:12).

Ua faaite mai te Metua i te Ao ra ia tatou e mea nahea ia ape i te faatîtîraa a Satane. E mea ti‘a ia tatou ia ara e ia pure tamau noa, ma te ani i te Atua ia tauturu mai ia tatou ia pato‘i i te mau faahemaraa a Satane (a hi‘o 3 Nephi 18:15). Eita to tatou Metua i te Ao ra e farii ia tamatahia tatou i ô atu i to tatou puai (a hi‘o 1 Korinetia 10:13; Alama 13:28).

E arata‘i te mau faaueraa a te Atua ia tatou i te atea ê i te ati e i te ora mure ore ra. Na roto i te ma‘itiraa ma te paari, e roaa ia tatou te faateiteiraa, te tupuraa mure ore, e te oaoa mau (a hi‘o 2 Nephi 2:27–28).

  • Eaha te tahi mau hi‘oraa o te mau ohipa e taoti‘a i ta tatou mau ma‘itiraa ? Eaha te tahi mau hi‘oraa o te mau ohipa o te horo‘a ia tatou i te ti‘amâraa ?

Te tahi atu mau papa‘iraa mo‘a